Monite 5 Tisema, 2016

Nomipa 26:42-43 ; Senesi 46:23 

Nomipa 26:42-43

"(42) Ko eni ‘a e hako ‘o Tani faka-e-honau-ngaahi-fāmili: meia Sūhami, ‘a e fāmili ‘o ha‘a Sūhami. Ko e ngaahi fāmili ia ‘o Tani faka-e-honau-ngaahi-fāmili. (43) Ko e ngaahi fāmili kotoa ‘o ha‘a Sūhami, ‘a kinautolu na‘e lau, ko e toko ono mano mā fā afe mā fāngeau."

Senesi 46:23

"(23) Pea ko e hako ‘o Tani; ko Hūsimi. 24Pea ko e hako ‘o Nafitalai ko ‘Iakasili, mo Kuni, mo ‘Ieseli, mo Sīlemi. 25Ko e hako eni ‘o Pila ‘a ia na‘e foaki ‘e Lēpani ki hono ‘ōfefine ko Lesieli, pea na‘a ne fā‘ele‘i ‘a kinautolu ni kia Sēkope: lau fakataha ko e toko fitu."

Ko e hako ʻo Taní ʻo fakafāmili. Ko Suhami pē mo hono fāmili, ko honau lau fakakātoá naʻa nau toko 64,400 pea ko honau lau fakatohi kakai kimuʻa naʻa nau toko 62, 700, ʻa ia naʻa nau tupu ʻaki honau tokolahí ʻa e toko 1,700. Ko e hako ko eni ʻo Taní ka ko Tani mo Nafetaleni ko ʻena faʻeé ko Pilā. Ko e kaunanga ia ʻa Lesieli. Kaekehe, ʻoku tau haʻu hokohoko ʻi he ngaahi hako ʻo e fānau ʻa Sekopé ki he fakatupu kinautolu, ke nau hoko ko hono kakai makehe, kae tautau ko hono fakafou mai ai ʻe he ʻOtuá ʻa hono ʻaló ke ne hoko ʻe ia, ko e fakakauʻanga ʻo māmani angahala, ki he fāmili ʻo e ʻOtuá. Ko Tani mo hono hakó naʻe fili pē kinautolu ʻe he ʻOtuá ko hono kakai ʻo nau fakatupu kakai maʻae ʻOtuá ʻi he sino. Pea tali mai leva ʻe he Tohitapú “Ka ka ʻilonga kinautolu naʻe maʻu iá naʻa ne fakamafaiʻi kinautolu ke nau hoko ko e fānau ʻa e ʻOtuá, ʻio, ʻakinautolu ʻoku tui pikitai ki hono huafa” (Sn 1:12). Ko kinautolu kotoa pē ʻoku nau talitali ʻa sisu Kalaisi ko honau ʻEiki ʻi heʻenau moʻui, ʻoku toe fanauʻi fakalaumālie kinautolu ʻo maʻu ʻa e moʻui foʻou mei he ʻOtuá ʻo fou ʻi he tui kia Kalaisí. Ko e fanauʻi foʻou koʻení ko e liliu ʻo kitautolu mei he loto ki tuʻa, ko hono toe fokotuʻutuʻu hotau ʻulungaangá mo ʻetau ngaahi holí mo hotau ʻuhingá. Naʻe ʻuluaki fanauʻi kitautolu koe sinoʻi tangata, ʻo tuku kitautolu ki he ngaahi fāmili ʻi hotau ngaahi mātuʻá (Sn 1:13). Ko e fanauʻi ʻe he ʻOtuá kuo tau hoko ʻo moʻui fakalaumalie mo fakakau kitautolu ki he fāmili ʻo e ʻOtuá. Kuo ke kole kia Kalaisi ke ngaohi koe, ko e tokotaha foʻou? Ko e kamata foʻou ko eni ʻi he moʻuí ʻe ala maʻu ia ʻe he tokotaha kotoa pē ʻoku tui kia Kalaisí, ko ʻene ʻa e moʻui foʻou pea kuo tau kau he fāmili ʻo e ʻOtuá ʻia Kalaisi ʻi heʻene fakakau kitautolu ki aí.