Nomipa 26:63-65
"(63) Ko eni na‘e lau ‘e Mōsese mo e taula‘eiki ko ‘Eliesa, ‘a ia na‘a na lau ‘a ha‘a ‘Isileli ‘i ‘Alapā-Moape, ‘i he ve‘e Soatani fe‘unga mo Sielikō. (64) Pea ‘i he kakai ko ia na‘e ‘ikai ha tangata ‘iate kinautolu na‘e lau ‘e Mōsese mo e taula‘eiki ko ‘Ēlone, ‘a ia na‘a na lau ‘a ha‘a ‘Isileli ‘i he Toafa ‘o Sainai. (65) He na‘e folofola ‘iate kinautolu ‘a e ‘Eiki, Kuo pau te nau mate ‘i he Toafa. Pea na‘e ‘ikai toe hanau toko taha, ko Kēlepi pē ko e foha ‘o Sīfune, pea mo Siosiua ko e foha ‘o Nuni."
Nomipa 14:28
"(28) Tala kiate kinautolu ko e folofola ē ‘a Sihova, Tangi ‘eku mo‘ui te u fai kiate kimoutolu ‘o hangē ko ho‘omou lea kuo tau mai ki hoku telinga!"
Teutalonome 2:14, 15
"(14) Pea ko e fuoloa ‘o ‘etau ‘alu mei Kētesi-panea ‘o a‘u ki he‘etau a‘a ‘i Vai Sēleti, ko e ta‘u ‘e tolungofulu mā valu; ko ‘ene ‘osi ai ‘a e to‘utangata tau mei he ‘apitanga, ‘o hangē ko e fuakava ‘a Sihova kiate kinautolu. (15) Kae‘uma‘ā ko e nima ‘o Sihova na‘e tu‘u ko honau fili ke nau mokulu ai mei he ‘apitanga, kae‘oua ke nau ‘osi."
1 Kolinito 10:5
"(5) Ka neongo ia, ka tala‘ehai na‘e hōifua ‘a e ‘Otua ki hanau tokolahi; he na‘e tulaki holo kinautolu ‘i he toafa."
Hepelu 3:17
"17Pea ko hai na‘a ne ‘ita ki ai ‘o fāngofulu ta‘u? ‘ikai ko kinautolu ia na‘e angahala, ‘a ia na‘e mokulu honau ngaahi kupu ‘i he Toafa?"
Ko e tohi kakai foʻou maʻae toʻutangata foʻoú. Ko e taʻu eni ia ʻe 38, kuoʻosi tohi ʻa e ʻuluaki tohi kakai lahi, ʻoku lēkooti ʻi he tohi Nomipa (1: 1 – 2:33). Pea lolotonga ʻa e vaaʻitaimi ko ení, ko e tangata ʻIsileli kotoa pē mo e fefine, kuo laka hake hono taʻú ʻi he taʻu 20, tukukehe ʻa Kelepí, Siosiua mo Mosese kuo nau ʻosi he mate. Ka neongo iá ko e ngaahi lao ʻa e ʻOtuá mo e ʻulungaanga fakalaumalie ʻo e kakaí, ʻoku kei kakato pē. ʻOku lēkooti ʻi he tohi Nomipá ni ʻa e ngaahi maná, ʻoku fakalongolongoʻi pe eni ka ko e fuʻu mafai ia ʻo e ʻOtuá. Ko e kakai kotoa naʻa nau hiki mei he fonua ʻe taha ki he fonua ʻe taha, pea naʻe mole kotoa ʻa e kakai lalahí, ka naʻe ngaohi ke pehē hono angá, ke nau tauhi ʻa e ʻalunga fakalaumalié. Ko e taimi niʻihi ʻoku tau ongoʻi, hangē ʻoku ʻikai fai ʻe he ʻOtuá ha mana ʻi heʻetau moʻuí, ka ko e ʻOtuá ia, ʻoku ngāue maʻu ia, ʻi he ngaahi founga fakalongolongo, ʻo fekauʻaki mo ʻene ngaahi taumuʻa ki hono kakaí. Kaekehe, ʻi heni ʻoku totonu ke Ne hanga ʻo ueʻi kotoa kitautolu, ke tau fakakaukau loto atu ki he natula fakafehiʻanekina, mo fakaʻauha ʻo e angahalá, ʻoku ne hanga ʻo fakatupunga ʻa e kotoa ʻo e fuʻu ʻauha, ko eni naʻe hokó. Ko ia aí ʻoku totonu mo kitautolu kotoa ke fakafoʻou ʻetau fakatomalá, mo e fekumi ki he fakamolemolé, pea ki he mahuʻinga ʻo e fakamoʻui ʻa Kalaisí, manatuʻi hotau tuʻunga pelepelengesi ʻoku tau ʻi ai, ʻi he sino fakataimi ʻoku tau ma‘ú. ʻOku mahuʻinga ʻa e mateuteu ʻi he ʻEiki ko Sisu Kalaisí, pea ketau tukuingata ke fakafonu hotau ngaahi ʻaho ʻoku toé ʻaki ʻetau tauhi hotau toʻutangatá, ʻo fakatatau ki he finangalo ʻo e ʻOtuá.
No comments:
Post a Comment