Nomipa 26:28-34
"(28) Ko e hako ‘o Siosifa faka-e-honau-ngaahi-fāmili: ko Manase mo ‘Ifalemi. (29) Ko e hako ‘o Manase: meia Mākili, ‘a e fāmili ‘o ha‘a Mākili: pea tupu meia Mākili ‘a Kiliati: meia Kiliati, ‘a e fāmili ‘o ha‘a Kiliati. (30) Ko eni ‘a e hako ‘o Kiliati: ko ‘Iesa, ‘a e fāmili ‘o ha‘a ‘Iesa: meia Hēleka, ‘a e fāmili ‘o ha‘a Hēleka: (31) pea mo ‘Āselieli, ‘a e fāmili ‘o ha‘a ‘Āselieli: mo Sikemi, ‘a e fāmili ‘o ha‘a Sikemi: (32) pea mo Sēmita, ‘a e fāmili ‘o ha‘a Sēmita: pea mo Hēfeli, ‘a e fāmili ‘o ha‘a Hēfeli. (33) Ka ko Silofehati ko e foha ‘o Hēfeli na‘e ‘ikai ha‘ane fānau tangata, ko e ngaahi ‘ōfefine pē: pea ko e hingoa ‘o e ngaahi ‘ōfefine ‘o Silofehati ko Māhala mo Noa, ko Hōkela, Milika, mo Tīlisa. (34) Ko e ngaahi fāmili ia ‘o ha‘a Manase; pea ko kinautolu na‘e lau mei ai ko e toko nima mano mā ua afe mā fitungeau."
Nomipa 27:1
"(1) Pea ‘unu‘unu mai ‘a e ngaahi ‘ōfefine ‘o Silofehati, foha ‘o Hēfeli, foha ‘o Kiliati, foha ‘o Mākili, foha ‘o Manase, ‘o kau ki he ngaahi fāmili ‘o ha‘a Manase, ko e foha ‘o Siosifa: pea ko e ngaahi hingoa eni ‘o e ngaahi ‘ōfefine ko ia, ko Māhala, Noa, mo Hōkela, pea mo Milika mo Tīlisa."
Nomipa 36:11
"(11) he ko Māhala, Tīlisa, mo Hōkela, mo Milika, mo Noa, ko e ngaahi ‘ōfefine ‘o Silolehati, na‘a nau mali mo e ngaahi foha ‘o e ngaahi tokoua ‘o ‘enau tamai."
Senesi 46:20
"(20) Pea na‘e fā‘ele‘i kia Siosifa ‘i ‘Isipite ‘a Manase mo ‘Ifalemi, ‘a ia na‘e fā‘ele‘i kiate ia ‘e ‘Asinate ko e ‘ōfefine ‘o Potifela ko e taula‘eiki ‘o ‘Oni."
Siosiua 17:1
"(1) Pea fai ‘a e talotalo ma‘a e matakali ‘o Manase; he ko e ‘uluaki foha ia ‘o Siosifa. Ko e me‘a kia Mākili, ko e ‘uluaki foha ‘o Manase ko e tupu‘anga ‘o Kiliati, ko e pāte‘i tau ia, ko ia na‘e tō kiate ia ‘a Kiliati mo Pēsani."
1 Kalonikali 7:14, 15
"(14) Ko e hako ‘o Manase; ko ‘Aselieli, ‘a ia na‘e fanau‘i ‘e Me‘a: (ko ‘ene sinifu ko e fefine Sīlia, na‘a ne fanau‘i ‘a Mākili ko e tupu‘anga ‘o Kiliati: (15) pea ma‘u uaifi ‘e Mākili meia Hūpimi mo Sūfimi, pea ko e hingoa ‘o hono tuofefine ko Ma‘aka): pea ko e hingoa ‘o hono ua ko Silofehati: pea na‘e ma‘u fānau fefine ‘a Silofehati."
Ko e ongo foha ʻo Siosifá, naʻe toko ua, pea ko e hako eni ʻo e tokotaha, ʻa ia ko Manase pea mo hono hakó. ʻUluakí, ko Makili mo hono fāmili, ko Kiliati naʻe ʻi ai ʻa Iesa mo hono fāmili, ko Semita mo hono fāmili, pea mo Hefeli naʻe ʻikai haʻane fānau tangata, ka ko hono ngaahi ʻofefine pē, ʻa ia ko kinautolu eni, ko Silofehati, Mahala, Noa, Hokela, Milika pea mo Tilisa. Ko e hako eni ʻo Manase, ʻa ia ko honau lau fakatohi kakaí, naʻa nau toko 52,700. Ka ko honau ʻuluaki tohi kakaí ʻi he toafa Sainai, naʻa nau toko 32,200 ʻa ia naʻe tupuʻaki ʻe he hako ʻo Manasé ʻa e toko 20,500. ʻOku kau ʻa e hako ko ʻeni ʻo Manasé ʻi he tupu tokolahí. Ko ʻetau vakai fakatangata ki he tuʻunga tupu ʻa e ngaahi matakalí, ʻoku tau pehē leva, sai ē ʻoku tupu, ʻoku kovi ē, he ʻoku holo. Kaekehe, ko e taha ia ʻo e ngaahi natula ʻa hotau ʻOtuá, ko e ʻikai ke filifilimanako, he neongo ʻa e ʻikai ke ne saiʻia he angahalá, ka kuo Ne fai ʻa e ngāue fakahaofi moʻui ʻia Kalaisi. Ko e ʻikai ke ne finangalo, ke mole ha foʻi tokotaha, ʻi he angahalá. Ko e tupú, ko e fakatātā ʻo e maʻu, pea ʻoku ne finangalo, ke maʻu ʻa e tokolahi taha, maʻa hono puleʻangá ʻia Kalaisi. Ko ʻIsileli eni ʻoku tau talanoa ki aí. ʻOku fēfē leva ʻa e ngāue ʻa e ngaahi siasi hā mai, he ngaahi ʻaho ní? ʻOku nau fakahū ʻa e tokolahi taha, ki he siasi taʻehā ʻo Kalaisi! Ko hotau faktongia ia ʻi he ngaahi siasí ko hono fakakau hono kau memipá, ki he siasi taʻehā mai ʻo Kalaisí. Ko e siasi taʻehā, ko kinautolu ia kotoa pē, kuo nau tui falala kia Kalaisí, ʻo tatau ai pē, pe ko e fē ʻa e siasi ʻoku kau ki aí, ka ko ʻene moʻui ʻa Kalaisí, kuo ne memipa leva ʻi he siasi taʻehā ʻo Kalaisí. Ko ia ʻoku ʻiloa ko e taʻahiné (Sn 3:29). Ko e foki mai ʻa Kalaisí, ke maʻu ʻa e kotoa ʻo e kau tuí, ke nau nofo mo ia ʻo taʻengata. Ko e siasi taʻehā ia te nau ʻalu mo Kalaisi.
No comments:
Post a Comment