Pulelulu 14 Tisema, 2016

Nomipa 27:15-17 ; 16:22 ; Teut 31:2 ; Mt 9:36 ; Mk 6:34 

Nomipa 27:15-17

"15Pea fakatau folofola ‘a Mōsese ki he ‘Eiki, ‘o pehē, 16Ke fakanofo mu‘a ‘e Sihova, ko e ‘Otua ‘o e ngaahi laumālie ‘o e kakano kotoa pē, ha tangata ke pule ki he fakataha. 17Ha taha te ne fotu ma‘u pē ‘i ‘ao mo tu‘a, ha taha te ne taki atu kinautolu mo taki mai; ke ‘oua na‘a hoko ‘a e fakataha ‘a e ‘Afiona ‘o hangē ha fanga sipi ‘oku ‘ikai hanau tauhi."

Nomipa 16:22

"22Pea na tō fo‘ohifo kinaua, ‘o na pehē, ‘Ēī, ko e ‘Otua ‘o e ngaahi laumālie ‘o e kakai fuli pē, ‘e hia koā ha toko taha, pea ke tuputāmaki ki he fakataha kotoa?"

Teutalonome 31:2

"2Pea ne pehē kiate kinautolu, Kuo u teau mā uofulu ta‘u he ‘aho ni; ‘oku ‘ikai te u kei lava ke hū atu mo hū mai: pea kuo folofola kiate au ‘e he ‘Eiki, ‘E ‘ikai te ke a‘a ‘i Soatani na."

Matiu 9:36

"36Pea ‘i he‘ene sio ki he ngaahi fu‘u kakai, na‘e langa hono fatu ‘i he ‘ofa kiate kinautolu: he na‘a nau nofo ongosia mo tukuhāusia, ‘o hangē ko ha fanga sipi ta‘ehanau tauhi."

Ma'ake 6:34

"34Pea ‘i he‘ene hifo ki ‘uta, na‘a ne ‘ilo ha fu‘u kakai lahi; pea na‘e langa hono fatu ‘i he ‘ofa kiate kinautolu, koe‘uhi ko ‘enau hangē ha fanga sipi ta‘ehanau tauhi: pea na‘a ne hanga ‘o ako kiate kinautolu ha ngaahi me‘a lahi."

Kole ʻa Mosee ki he ʻOtuá hano fetongi. “Ke fakanofo muʻa ʻe Sihova ko e ʻOtuá ʻo e ngaahi laumalie ʻo e kakano kotoa pē”. Ko kitautolú ʻoku tau maʻu ʻa e sinoʻi tangata, ka ko hotau moʻoni ko hotau laumalié, ʻoku ʻi loto taautaha ʻiate kitautolu, pea ʻoku fakamahino mai ʻe Mosese “Ko e ʻOtua ʻo e ngaai laumalie kotoa pe”. Ko e sino ʻoku tau ʻi aí ko e efu ia, ko e ʻaho ʻetau mate “pea foki ʻa e efú ki he kelekelé .. pea foki ʻa e laumalié kia ʻElohimi. ʻAia naʻa ne tuku mai ia “ (Koheleti 12:7). Ko hotau mahuʻinga ē ki he ʻOtuá ko hotau laumalie. Ko e toʻo ʻe he ʻOtuá hono laumalié, ʻe foki hotau sinó ki he kelekelé, ka e toʻo ʻe he ʻOtuá ʻene kaveingá, ko ʻetau ngāué, ko e noa pē, ka toʻo ʻa e ʻofa ʻi he meʻa kotoa pē ʻoku tau faí, koeʻuhi ka taʻe ʻi ai ʻa e ʻOtuá, ko e halaʻatā mo e moʻuí ʻoku taʻeʻaonga ʻi he taʻeʻi ai ʻa e ʻOtuá, ko hotau mahuʻingá ko hotau laumalié. 

Pea ko e mahuʻinga ia ʻo e kole ʻa Mosese ki he ʻOtuá ke ʻi ai ha taha tene tokangaʻi ʻa e laumalie ʻo e kakaí ʻi tuʻa, mo loto fakatouʻosi, ke ʻomi ʻe he ʻOtuá ha taha ke taki kinautolu ki he taú, pea ke ne tokangaʻi ʻenau ngaahi fiemaʻú. Pea naʻe tali ʻe he ʻOtuá ʻaki ʻa Siosiua, ʻa e kole ʻa Mosesé. Ko e tokolahi ʻoku nau loto ke ʻiloa kinautolu, ko e kau taki, ko e niʻihi ʻoku nau poto he fakaaʻu ʻenau ngaahi kaveinga, pea ko e niʻihi ʻo e kau taki ko iá ʻoku nau tokanga loloto ki he kakai ko honau lakangá. Ko e taki lelei tahá ko Kalaisi, he naʻe langa hono fatu he ʻofa ʻi he kakaí, ʻoku nau nofo ongosia mo tukuhausia ʻo hangē ha fanga siʻi taʻeʻi ai haʻanu tauhi (Mt 9:36). Pea ko ia ʻoku ʻia Kalaisí ʻoku totonu ke ne maʻu ʻa e manavaʻofa ki he kakaí, pea mo loto maʻulalo ʻo ne hoko ko e sevaniti. Pea koe taki leleí ke ne hangē pe ko Sisū, ʻi heʻene meʻa kotoa pē, pea ko ia pē ʻa e sipinga ʻo e moʻuí ki he kakai kehé.