Teutalonome 11:8-17
"8Ko ia te mou tauhi ‘a e tu‘utu‘uni kotoa ‘a ia ‘oku ou tu‘utu‘uni atu he ‘aho ni, koe‘uhi ke mou mālohi, pea ke mou hū ‘o ma‘u ‘a e fonua ‘oku mou a‘a atu ke ma‘u; 9pea koe‘uhi ke mou fakalahi homou ngaahi ‘aho ‘i he kelekele, ‘a ia na‘e fuakava ai ‘e Sihova ki ho‘omou ngaahi kui te ne foaki kiate kinautolu mo honau hako, ko e fonua ‘oku mahutafea ‘i he hu‘akau mo e honi. 10He ko e fonua ‘oku ke hū ki ai ke ma‘u ‘oku ‘ikai hangē ko e fonua ‘o ‘Isipite, ‘a ia na‘a mou ha‘u mei ai, ‘a ia na‘a ke tō ai ho‘o pulopula, pea ke fakaviviku ‘aki ho va‘e, ‘o hangē ha ngoue mohuku kai; 11ka ko e fonua ‘oku ke a‘a atu ke ma‘u, ko e fonua mo‘unga‘ia mo tele‘a‘ia, ‘oku inu vai ‘uha mei langi: 12ko e fonua ‘oku mamahi‘i ‘e Sihova; ‘oku toka ai ‘a e ongo fo‘i fofonga ‘o Sihova ko ho ‘Otua, mei he kamata‘anga ‘o e ta‘u ‘o a‘u ki hono ngata‘anga. 13Pea ko eni, kapau te mou mātu‘aki tokanga ki he‘eku ngaahi fekau, ‘a ia ‘oku ou ‘atu he ‘aho ni, ke ‘ofa ki he ‘Eiki ko homou ‘Otua, pea ke tauhi ia ‘aki ‘a e kotoa ‘o ho loto mo e kotoa ‘o ho laumālie. 14Pea te u toki ‘atu ‘a e ‘uha ‘o homou fonua ‘i hono taimi totonu, ko e vai mu‘a mo e vai mui, koe‘uhi ke ke utu ho‘o koane, mo ho‘o uaine, mo ho‘o lolo. 15Pea te u ‘atu mohuku ‘i ho ngaahi vao ki ho‘o monumanu, pea te ke kai ‘o mākona. 16Lamasi kimoutolu na‘a oloa homou loto, ‘o mou afe ai ‘o tauhi ‘otua kehe, ‘o lotu ki ai; 17pea langa‘i ai ‘a e houhau ‘o Sihova kiate kimoutolu, pea ne tāpuni ‘a e langi, ‘o ‘ikai ha ‘uha, ‘o ‘ikai lakuna ‘e he kelekele hono mahu; pea mou ‘auha vave mei he fonua lelei ‘oku foaki ‘e Sihova kiate kimoutolu."
Teutalonome 4:26, 40
"26‘oku ou ui ki he langi mo māmani ke hopo he ‘aho ni mo kimoutolu, ‘o fakamo‘oni te mou mātu‘aki mole ke vave mei he funga fonua ‘oku mou a‘a ai ‘i Soatani ke ma‘u; ‘e ‘ikai fakalahi homou taimi ai, ka te mou mātu‘aki ‘auha. 40Pea te ke tauhi ‘a e ngaahi fekau mo tu‘utu‘uni ‘a‘ana, ‘a ia ‘oku ou kouna atu he ‘aho ni, koe‘uhi ke ke tu‘umālie, ‘a koe mo ho‘o fānau ‘amui, pea koe‘uhi ke lahi ho ngaahi ‘aho ‘i he funga kelekele ‘oku ‘atu ‘e Sihova ko ho ‘Otua ‘o lauikuonga."
Teutalonome 8:7
"7He ko Sihova ko ho ‘Otua ‘oku ne taki koe ki ha fonua lelei, ko e fonua vaitafe‘ia, pea ‘i ai ha ngaahi fauniteni mo vai lolofonua, ‘oku puna ‘i he ngaahi tele‘a mo e ngaahi mo‘unga"
Teutalonome 28:12
"12‘E fakaava ma‘au ‘e Sihova hono falekoloa lelei ko e langi, ke ‘atu ‘a e ‘uha ‘o ho fonua ‘i hono taimi totonu, pea ke fakamonū‘ia ‘a e ngāue kotoa pē ‘a ho nima: pea te ke tali ‘a e nō ‘a e ngaahi fo‘i pule‘anga lahi, ka ‘e ‘ikai te ke nō koe."
Siosiua 1:7
"7Kehe pē ke ke lototo‘a, mo ke tu‘u kalikali ‘aupito, ‘o tokanga ke fai ki hono kotoa ‘o e lao, ‘a ia na‘e tu‘utu‘uni atu ‘e Mōsese ko ‘eku sevāniti: ‘oua te ke afe mei ai ki he to‘omata‘u pe ki he to‘ohema, koe‘uhi ke ke fai fakapotopoto ‘i he me‘a kotoa pē te ke ‘alu ki ai."
1 Tuʻi 8:35
"35Ka tāpuni ‘a e langi, ‘o ‘ikai ha ‘uha, koe‘uhi kuo nau angahala kiate koe; ka nau ka lotu ki he potu ni, mo hu‘ekina ho huafa, mo tafoki mei he‘enau angahala, he kuo ke fakavaivai‘i kinautolu"
Sioeli 2:23
"23Mo si‘i hako ‘o Saione, mou tome‘e mo fakafiefia ‘ia Sihova ko homou ‘Otua: he ‘oku ne ‘atu kiate kimoutolu ‘a Vaimu‘a ‘i he totonu, 'io, te ne hifo kiate kimoutolu ‘a e ‘uha, ‘a Vaimu‘a mo Vaimui he ‘uluaki māhina."
KO E NGAAHI PALOMESI MO E FAKATOKANGA. Naʻe ʻai ʻe Mosese ʻi honau ʻaó maʻae kahaú ʻa e moʻuí mo e mate, ʻa e tapuaki mo e mala, ʻe fakatatau ki he meʻa te nau faí, pe ko e ʻikai ke nau tauhi ʻa e ngaahi lao ʻa e ʻOtuá, pea ʻe fakatefito ʻi he meʻa te nau fili ki ai ke nau fai, pet e nau maʻu ai ha tapuaki, pe ko e mala. Kapau te nau hū ki he moʻui, ko e hū ki Kenani. Ko ha taipe ia ʻo e moʻui taʻengata, pea ke ʻilo ai ko ha fonua lelei kiate koe, pea te ke tauhi ʻa e ngaahi lao kotoa kuo fekauʻi atu kia koe he ʻaho ni pea te ke ʻofa ki he ʻOtuá mo tauhi ʻaki ʻa e kotoa ho lotó. Ko e founga eni ke ke maʻu pea mo tauhi ai ʻa e koloa ʻo e fonua ʻo e talaʻofá. Ko e angahalá ʻoku ne fakanounou ʻa e ngaahi ʻaho ʻo e kakai, mo fakanounou ʻa e ngaahi ʻaho ʻo e kakai tuʻumalie, ka ko e talangofuá ʻokú ne fakalōlōa‘i ʻa e ngaahi ʻaho ʻo ʻenau nongá.
Ko ʻIsipite ko e fonua fuaʻiʻakau, ka naʻe tokalelei pe pea ʻikai ke ʻuha, ka naʻe fakaviviku pe ʻenau ngoue mei he vai ʻo vaitafe Nailá. Ka ko Kenani ʻoku moʻungaʻia mo teleʻaʻia, pea faʻahinga kehekehe ʻo fakatatau ki he fiemaʻu ʻa e tangata takitaha, pea nau inu vaiʻuha pe mei langi. Ko e ʻOtuá ʻoku ne tokonaki meʻa maʻa hotau tukunga ʻi tuʻa. Ko e siʻiange ʻetau ngaahi meʻa ʻoku fai maʻa hotau ngaahi sinó, ko e lahiange ia ʻa e meʻa ʻoku totonu ke tau fai maʻae ʻOtuá, mo hotau ngaahi laumalié. Naʻe taki pe kinautolu ʻe Mosese, ke nau sio ki ʻolunga ki he ʻOtua ʻoku ne foaki ʻuha mei langi, mo fakafua ʻa e ngoué ʻi hono faʻahitaʻu (Ng 14:17). Ko e meesi naʻa ne ʻomi kia kinautolu ʻa e fiemalie lahi taha, mo e melie ʻo e meʻa kotoa pea ko e haʻu kotoa ia mei Hevani, ko e meʻaʻofa ia, ʻo e ʻofa tauhi mai ʻa e ʻOtuá. Ko e ofiʻange ʻe tau fakatefito ʻi he ʻOtuá ko e lahi ange ʻa e fiefia ʻoku totonu ke tau ʻi ai ʻi he talangofua kiate iá. Ko e ʻOtuá te ne tapuakiʻi pau kinautolu ʻaki ʻa e lahi ʻo e ngaahi meʻa lelei, ʻo kapau te nau ʻofa mo tauhi fiefia kiate ia, maʻu pe, ʻia Kalaisi Sīsū, ko e ʻEiki mo e Fakamoʻui.
No comments:
Post a Comment