Sapate 16 'Epeleli, 2017

Saame 16:10; Hosea 6:1-3; Luke 24:1-12

Saame 16:10

" 10He tala‘ehai te ke li‘aki ‘a hoku laumālie ki Lolofonua;

‘E ‘ikai te ke tuku ‘a ho‘o Pele ke sio ki he ‘auha."

Hosea 6:1-3

"1HA‘U Ā, ka tau foki kia Sihova: he ko ia ia kuo ne hae, pea te ne faito‘o kitautolu; kuo ne taa‘i, pea te ne ha‘iha‘i kitautolu. 2Hili ‘a e ‘aho ‘e ua te ne fakamānava hake kitautolu: ‘i hono ‘aho tolu te ne fokotu‘u kitautolu, pea te tau mo‘ui, ‘o fe‘ao mo ia. 3Pea ke tau ‘ilo; ke tau tuli ki he ‘ilo ‘o Sihova; ko ‘ene hopo hake kuo tu‘utu‘uni hangē ko e hengihengi: pea te ne ha‘u kiate kitautolu hangē ko e ‘uha, hangē ko e ‘uha mui, ko vaimui ‘ene mape‘epe‘e ki he fonua."

Luke 24:1-12

"1PEA lolotonga ‘a e Sāpate na‘a nau mālōlō ‘o hangē ko e tu‘utu‘uni: ka ‘i he ‘uluaki ‘aho ‘o e uike, ‘oku kei hengihengi ‘aupito, na‘a nau ‘alu ki he fonualoto, ‘o ‘ave ‘a e ahi kuo nau teu. 2Pea nau ‘ilo ‘a e maka kuo teka‘i mei he fonualoto. 3Ka ‘i he‘enau hū ki ai, na‘e ‘ikai te nau ‘ilo ‘a e sino ‘o e ‘Eiki ko Sīsū. 4Pea lolotonga ‘enau puputu‘u ‘i he me‘a ko ia, pea tā na‘e tu‘u mai kiate kinautolu ha ongo tangata na‘e huhulu hona kofu. 5Pea ‘i he‘enau manavahē fu‘u, mo fo‘ohifo ki he kelekele, na‘a na pehē kiate kinautolu, Ko e hā ‘oku mou kumi ai ‘a ia ‘oku mo‘ui ki he kau pekia? 6‘Oku ‘ikai te ne ‘i heni, ka kuo toetu‘u: manatu ki he‘ene me‘a kiate kimoutolu ‘i he‘ene kei ‘i Kāleli, ‘o pehē, 7Kuo pau ki he Fanautama ‘a Tangata ke tukuange ia ki he kakai angahala, pea ke kalusefai, pea ke toetu‘u ‘i hono ‘aho tolu. 8Pea nau manatu ai ki he‘ene ngaahi lea, 9pea nau foki mei he fonualoto, ‘o nau tala ‘a e ngaahi me‘a ko ia ki he kau Hongofulu mā taha, pea mo hono toe ‘o e kakai. 10Pea ko Mele mei Makitala, mo Sioana, mo Mele ko e fa‘ē ‘a Sēmisi, ko kinautolu ia na‘e tala; pea ko hono toe ‘o e kau fefine ‘a ia na‘e kau mo kinautolu, na‘e tala foki ‘e kinautolu ‘a e ngaahi me‘a ko ia ki he kau ‘Aposetolo. 11Ka na‘e hā ‘a e ngaahi lea ko ia kiate kinautolu ‘o hangē ko e muna; pea na‘e ‘ikai te nau tui ki he kau fefine. 12Ka na‘e tu‘u ‘a Pita, ‘o ne lele ki he fonualoto, ‘o ne tulolo ‘o sio ko e ngaahi tupenu pē; ‘o ne ‘alu ki ‘api, ‘oku ne ofoofo ‘i he me‘a kuo hoko."

KO E TOETUʻU ʻA E ʻEIKÍ! ʻI he pongipongi Sapaté, ko e ʻuluaki ʻa ho ʻo e uiké, naʻe haʻu ʻa e kau fefiné ʻo ʻomai ʻa e sipaisi ki he fonualotó, ʻo hangē ko ʻetau ʻomai matalaʻiʻakau ki faʻitoka ʻi he ʻaho ní, ko e fakahaaʻi ʻo ʻenau ʻofa, mo e fakaʻapaʻapa. Naʻe tauhi pē ʻe he kau fefine ʻa e Sapaté, ʻo fakatatau ki he fiemaʻu ko ia ʻa e lao mei he tō ʻa e laʻaá ʻi he ʻaho Falaité, ki he tō ʻa e laʻaá ʻi he ʻaho Tokonakí, kimuʻa ia pea nau toki tānaki ʻenau ngaahi sipaisí, mo e ngaahi meʻa teuteu, pea nau toki ʻalu atu leva ki he fonualotó ʻo nau sio ai ki he ongo ʻangelo naʻá na kofu tapua, ʻo hangē ha maamá. Pea na fehuʻi ki he kau fefiné. “Ko e hā ʻoku mou kumi ai ʻa ia ʻoku moʻuí ki he kau pekiá?” Ko Sīsuú ʻoku ʻikai ke ne ʻi he kau mate. ʻOkú ne moʻui. ʻOkú ne pule ʻi he ngaahi loto ʻo e kau tui kotoa pē, pea ko ia ʻa e ʻulu ʻo hono siasí. ʻOkú ke kumi ʻa Sīsū ʻi he haʻohaʻonga ʻo e moʻuí? ʻOkú ke ʻamanaki kiate ia ʻe longomoʻui ʻi māmani, pea ʻi hono siasí? Kumi ki ha ngaahi fakaʻilonga ʻo hono iví, he ʻoku nau takatakai pē ʻiate koe. Ko e toetuʻú ʻa Sīsū mei he mate ko e moʻoni tuʻulotoloto ʻi he hisitolia ʻo e lotu fakakalisitiané, naʻe ʻikai mei ai ha siasi. Ka naʻe taʻeʻoua ʻa e toetuʻú. Ko e ngaahi lotu kehe ʻoku ʻi ai pē ʻenau ngaahi totonu mālohi, mo ʻenau ngaahi fakakaukau ʻo fekauʻaki mo Palataisi, pea mo e hili ʻa e moʻui ko ení. Ko e kalisitiané pē ʻokú ne maʻu ha ʻOtua naʻe hoko ʻo tangata, peá ne pekia maʻa hono kakaí, peá ne toetuʻu ʻi he ivi mo e kololia ke ne pule ki hono siasí ʻo taʻengata. Ko e hā ʻa hono ʻuhinga ʻoku mahuʻinga ai ʻa e toetuʻú?

1. Koeʻuhi ko Kalaisi naʻe toetuʻu mei he maté, he ʻoku tau ʻilo ko e puleʻanga ʻo Hevaní kuo maumau ia ʻi he hisitolia ʻo māmani. Pea ʻoku taumuʻa hotau māmaní ki he huhuʻi ʻo ʻikai ko e fakatuʻutamaki. He ko e ivi mafai ʻo e ʻOtuá ʻoku ngāue ke fakaʻauha ʻa e angahalá, mo fakatupu ʻa e moʻui foʻou mo teuteuʻi kitautolu ki he haʻele mai ʻa Sīsū Kalaisí.

2. Koeʻuhi ko e toetuʻú, ʻoku tau ʻilo kuo ikunaʻi ʻa mate, pea te tau toetuʻu mei he maté  ʻo moʻui taʻengata ai pe mo Kalaisi.

3. Ko e toetuʻu ʻoku fakaivia ʻa e siasí ke fakamoʻoni ʻi māmani.

4. Ko e toetuʻu ʻokú ne ʻomai ʻa e ʻuhinga ke toutou fai ʻa e ʻohomohe ʻa e ʻEikí.

5. Ko e toetuʻu ʻoku fakapapauʻi kia kitautolu, ko Kalaisi ʻoku moʻui. ʻOkú ne pule ʻi hono puleʻangá