Falaite 7 'Epeleli, 2017

Teutalonome 12:1-4, 4:9,10; 6:1; Ekisoto 34:13; 2 Tuʻi 16:4,17; 10:11; Selemaia 3:64

Teutalonome 12:1-4

"1KO eni ‘a e ngaahi lao mo konisitūtone, ‘a ia te mou tauhi ‘o fai ki ai ‘i he fonua kuo foaki atu ‘e Sihova ko e ‘Otua ‘o ho tupu‘anga, ke ke ma‘u ‘i he ngaahi ‘aho kotoa pē ‘oku mou mo‘ui ai ‘i māmani. 2Te mou mātu‘aki faka‘auha ‘a e ngaahi potu kotoa pē, ‘a ia na‘e tauhi ai ki honau ngaahi ‘otua ‘e he ngaahi pule‘anga te mou ma‘u, ‘i he ngaahi funga mo‘unga mā‘olunga, mo e ngaahi fo‘i mā‘olunga, mo e lolo ‘akau mata fua pē: 3pea te mou holoki ‘enau ngaahi ‘ōlita, mo laiki ‘enau ngaahi pou tapu, pea tutu ‘enau ngaahi ‘āsela; pea te ke tā ‘a e ngaahi ‘īmisi ‘o honau ‘otua, pea te ke tāmate‘i honau hingoa mei he ngaahi potu ko ia. 4‘E ‘ikai te mou fai pehē kia Sihova ko homou ‘Otua."

Teutalonome 4:9,10

"9Kae sinoeme‘a ke ke tokanga kia koe, mo lamalama lahi ho laumālie ‘i he ‘aho kotoa pē ‘o ho‘o mo‘ui, na‘a ngalo ‘a e ngaahi me‘a ne māta‘i ‘e ho mata, pea na‘a mole ia mei ho loto; ka ke fakamatala ia ki ho‘o fānau, mo e fānau ‘a ho‘o fānau– 10‘a e ‘aho na‘a ke tu‘u ‘i he ‘ao ‘o Sihova ko ho ‘Otua ‘i Hōlepi, mo e folofola mai ‘a Sihova, Fakataha mai ‘a e kakai kiate au, ka u tuku ke nau ongo‘i ‘eku lea, ke nau ako ai ke ‘apasia kiate au lolotonga ‘oku nau mo‘ui ‘i he funga kelekele, pea ke nau ako ‘enau fānau."

Teutalonome 6:1

"1PEA ko eni ‘a e ngaahi fekau mo lao mo konisitūtone kuo fekau ‘e Sihova ko homou ‘Otua ke ako kiate kimoutolu, ke mou fai ki ai ‘i he fonua ‘oku mou ‘alu ki ai ke ma‘u."

Ekisoto 34:13

"13ka te ke holoki honau ngaahi ‘ōlita, pea te ke laiki ‘enau ngaahi pou tapu, pea te ke tā ‘enau ngaahi ‘āsela."

2 Tuʻi 16:4,17

"4Na‘a ne fai feilaulau foki mo tutu ‘inisēnisi ‘i he ngaahi ‘esi mo e ngaahi sia, pea mo e lolo ‘akau mata kehe kehe. 17Pea tu‘usi ‘e Kingi ‘Āhasi ‘a e ngaahi pāneli mei he ngaahi tu‘unga; pea ne hiki mei honau funga ‘a e kumete; pea ne ‘ohifo ‘a e Tahi mei he funga pulu palasa na‘e hilifaki ai, ‘o ne tuku ia ki ha tuva maka."

2 Tu'i 10:11

"11Pea taa‘i ‘e Sehu ‘a e toe kotoa ‘o e fale ‘o ‘Ēhapi ‘i Sisilili, mo hono hou‘eiki, mo hono kau fe‘iloaki, mo ‘ene kau minisitā; ‘o ‘ikai te ne fakatoe hano toenga."

Selemaia 3:6

"6Pea folofola ‘a Sihova kiate au ‘i he taimi ‘o Kingi Siosaia, Kuo ke mamata ki he me‘a kuo fai ‘e he holomui ko ‘Isileli? Na‘a ne ‘alu hake ki he funga mo‘unga mā‘olunga fua pē, pea ki he lolo ‘akau mata kotoa pē, pea na‘a ne fai fe‘auaki ai."

KO E NGAAHI MEʻA FAKAMANATU ʻO E ʻAITOLÍ, KUOPAU KE NAU FAKA-ʻAUHA ʻI HE TAIMI TE NAU MAʻU AI ʻA E FONUA KO KENANÍ. ʻO makatuʻunga ʻi he fekau hono ua ʻo e fekau ʻe 10. Ko e ʻOtuá, ko e tahaʻi Sihova ia, pea ko ia pe ʻoku fai ki ai ʻa e lotú, pea ko ia tokotaha pe. Pea ʻoku ʻikai ha toe ʻotua kehe, ke fakauouaʻi ʻaki ia. Ko e fekau ʻuluaki ia mo e fekau ua ʻo e fekau ʻe 10. Ke maluʻi kinautolu mei heʻenau liliu ki he ngaahi ʻotua loi, pea tapui kinautolu mei hono fai ʻa e lotu ki he ʻOtuá, ʻaki ʻa e ngaahi founga mo e ngaahi toʻonga ʻo e lotu ki he ʻaitoli. Ne ʻosi ʻafioʻi pe ʻe he ʻOtuá ʻi hono finangaló, ʻe faingofua pē ki ʻIsileli ke liliu ʻenau tuí, ʻo kapau te nau kamata ke ngāueʻaki ʻa e ngaahi ʻolitá mo e ngaahi naunau ʻo e ʻaitolí, ʻo fakahehemaʻi ai pe kinautolu ke nau lotu ki he ʻaitolí. Ka ko e ngaahi lao mo e ngaahi konisi-tutone ko ení kuopau ke nau fai ki ai ʻi he ngaahi ʻaho ʻenau mālōlō, mo ʻenau tuʻumalie, mo e taimi te nau puleʻi ai ʻa Kenaní. Pea ke ʻoua naʻa tau fakakaukauʻi, ko e lotu, ko e tuʻutuʻuni pe, ke tau fai ʻi he ngaahi taʻu ʻo ʻetau nofo populá, mo ʻetau fakafiefia ʻi he ngaahi feituʻu ʻetau nofo taautahá.

Pea ke nau hanga ʻo fakamaʻa ʻa e feituʻu kotoa pe, naʻe tauhi ai ʻe he kau Kenaní honau ngaahi ʻotua ʻaitolí. Ko e ngaahi feituʻu naʻa nau ngāueʻaki ke nau fakamaʻa ʻa e funga moʻungá mo e ngaahi maʻolungá, pea mo e ngaahi loloʻakau, pea kuopau ke fakaʻauha ʻa e ngaahi ʻolita, ʻa e ngaahi pou, mo e ngaahi ʻimisi naʻe ngāueʻaki ʻe he kakai ʻo e fonuá ki heʻenau lotu ki honau ngaahi ʻotuá, pea ka nau hanga ʻo tanu honau ngaahi hingoá. “Ke taʻeloi hoʻomou ʻofa. Fehiʻaʻia ki he kovi, pikitai ki he lelei (Lo 12:9). Ko e puleʻanga kuopau ke fokotuʻu ia, fakatouʻosi ʻi he kakai, mo e ngaahi feituʻu, ʻi he funga hono fakaʻauha ʻa e puleʻanga ʻo e tevolo. Heʻikai lava ia ke na tuʻu fakataha ʻo feohi fēfē ʻa e maama mo e poʻulí? ʻIo, ʻo lototaha fēfē ʻa Kalaisi mo Pileati” (2 Kol 6:15). ʻA e mahuʻinga ʻa e tuʻu tokotaha pe ʻa hotau ʻOtuá ʻi heʻetau moʻuí ʻo ʻikai ha toe meʻa ke he, ke ne fakauouaʻi. Heʻikai ke tau lava ʻo tauhi ʻa e ʻOtuá mo e koloa, pea heʻikai ke tau lava ʻo hū ki he ʻOtua moʻoní mo e ngaahi ʻaitolí. Pea ko hotau makatuʻunga ko Sīsū Kalaisi. Pea heʻikai lava ke tau ʻai ‘a Kalaisi, pea mo ʻetau fie maʻoniʻoni fakaetangata, ko Kalaisi tokotaha pē.