Saame 24:7-10
"7‘a e ngaahi matapā, mou hiki homou ‘ulu na;
‘Io, mou mahiki, ‘a e ngaahi matapā tupu‘a:
Kae hū atu ‘a e Tu‘i Lāngilangi ki hena.
8Ko hai tū ‘a e Tu‘i Lāngilangi?
Ko Sihova, ko e to‘a mo e mafi;
Ko Sihova, ko e to‘a ‘i he fepaki.
9‘a e ngaahi matapā, mou hiki homou ‘ulu na;
‘Io, mou mahiki, ‘a e ngaahi matapā tupu‘a:
Kae hū ‘a e Tu‘i Lāngilangi ki hena!
10Ko hai ia koā ‘a e Tu‘i Lāngilangi.
Ko Sihova Sāpaoti,
Ko ia ia ‘a e Tu‘i Lāngilangi. (Sila)"
Sakalaia 9:9-13
"9Tome‘e ke lahi, ta‘ahine Saione;
Hiki mavava, ta‘ahine Selusalema:
Ko ena ho tu‘i ‘oku me‘a mai kiate koe;
Ko e faitotonu ia mo fai fakamo‘ui foki:
Ko e ‘Eiki fa‘a kātaki, pea ‘oku ne heka ki ha ‘asi,
‘Io, ki ha ki‘i manu ko e tama ‘a ha ‘asi fefine.
10Pea te u tu‘usi ‘a e sāliote mei ‘Ifalemi, mo e hoosi mei Selusalema, pea ‘e motuhi ‘a e kaufana tau; pea te ne tala melino ki he ngaahi pule anga, pea ko ‘ene pule ‘e fai mei tahi ki tahi, pea mei he Vaitafe ki he ngata‘anga ‘o māmani.11Ko koe foki, ko e me‘a ‘i ho‘o toto fuakava‘ia kuo u tuku atu ho‘o kau pōpula mei he lepa ta‘ehano vai. 12Mou foki ki he talitau‘anga, ‘a e kau ha‘i ‘e he ‘amanaki:
Na‘a mo e ‘aho ni ‘oku ou tala atu
Te u fakafoki kiate koe ‘a e lōua.
13He kuo u teke ‘a Siuta ma‘aku kaufana,
Mo ‘Ifalemi ma‘aku ngahau:
Pea te u ue‘i hake ho ngaahi foha, si‘i Saione,
Ke fai mo ho ngaahi foha, ‘e Kalisi:
Pea te u ngaohi koe hangē ko e heletā ‘a ha helo."
Matiu 21:1-9
"1PEA ‘i he‘enau ofi ki Selusalema, pea kuo nau a‘u ki Petefesi ‘i he mo‘unga ko ‘Ōlive, na‘e toki fekau atu ‘e Sīsū ha ongo ako ‘e toko ua, 2‘o ne pehē kiate kinaua, Mo ō ki he vilisi ko ena ‘oku hanga mai, pea te mo ‘ilo leva ki ha ‘asi ‘oku no‘otaki, pea ai mo hono ‘uhiki: vete, ‘o taki mai. 3Pea ka ai ha lea ‘e fai atu ‘e ha taha, pea mo pehē, ‘Ou fiema‘u kinaua ‘e he ‘Eiki; pea te ne tuku mai leva kinaua.
4Pea na‘e fai ‘eni koe‘uhi ke fakamo‘oni ki he me‘a ne folofola‘aki ‘i he palōfita, ‘o pehē,
5Mou lea ki si‘i Saione, Ko ena ho Tu‘i ‘oku me‘a mai kiate koe.
Ko e ‘Eiki fa‘a kātaki, pea ‘oku ne heka ki ha ‘asi:
‘Io, ki ha ki‘i manu,
Ko e tama ‘a ha manu toho palau.
6Pea ‘alu ‘a e ongo ako, ‘o na fai ‘o hangē ko e tu‘utu‘uni kinaua ‘e Sīsū; 7pea na taki mai ‘a e ‘asi mo hono ‘uhiki, pea nau ‘ai ki ai honau ngaahi pulupulu, pea ne heka ai. 8Pea ko e fu‘u tokolahi ‘o e kakai na‘a nau falikiliki ‘a e hala ‘aki honau pulupulu ‘onautolu; pea ko e ni‘ihi na‘a nau tu‘usi ‘a e ngaahi va‘akau, ‘o falikiliki ‘aki ‘a e hala. 9Pea ko e fu‘u kakai na‘e ‘alu mu‘omu‘a ‘iate ia, pea mo kinautolu na‘e muimui mai, na‘a nau fekālanga‘i ‘o pehē,
Hōsana ki he Hako ‘o Tēvita!
Hoto ‘ofa kiate ia ‘oku hoko mai ‘i he huafa ‘o e ‘Eiki!
Hōsana ki Langi Taupotu!"
KO E SĀPATE ‘ENI ʻO E HŪ FAKATUʻI ʻA E MĪSAIA´ KI SELUSALEMÁ, ʻa ia naʻe palofisai ki ai ʻa e palōfita ʻi heni (v.9) ki he hū ʻa Kalaisi ki he Selusalema (Mt 21:5). He ko e palofisaí ki he Misaiá mo hono puleʻangá.
Fakatokangaʻi ʻoku omi ʻe he talaʻofa ʻo e Misaia ʻa e fuʻu fiefia lahi. Ko Kalaisí ʻoku ne maʻu ʻa e mafai kotoa ʻo Hevaní, pea mo māmaní. ʻOku huluʻi mai ʻe Saione ʻa hono langilangi, ko e Tuʻi, pea ʻi he siasi fakakosipelí, ko hono puleʻanga fakalaumalié ʻokú ne puleʻi. Ko e Tuʻi ko ʻení, ko e Pule Angatonu, pea ko e tokotaha maluʻi iviiviʻia, koeʻuhi ko e ʻOtuá ia ʻo e fakamoʻuí, ko e koloa ʻo e fakamoʻui ʻoku ʻiate ia. Ko e faʻa kataki mo e angavaivai, pea ʻoku ʻa e Tamaí ʻa e kotoa ʻo ʻene ngāué.
ʻOkú ne maʻulalo pea naʻe taʻetokaʻi pea fakaʻikai ʻe he kakaí. Ka naʻe makehe ʻa e ʻulungaanga ʻo e Tuʻí, ʻi he taimi naʻe hū ai ki Selusalema, ʻi he lotolotonga ʻo e fuʻu hiva hosanna ʻa e tokolahi. Ka naʻe ʻikai te ne heka ʻi ha meʻalele ʻo e ikuná, pe ko ha meʻalele ʻa e haʻa tuʻí, ka naʻá ne heka ʻi ha ʻuhiki ʻo ha ʻasi, ko e fakatātā ʻo e natula ʻo kinautolu ʻokú ne haʻu ke pule aí. Ka neongo eni, ka ko e ʻasi naʻe ʻikai ko haʻane meʻa, ka ko e ʻasi kole pē, pea naʻe fakamolú ʻaki pe ʻa e ngaahi pulupulu ʻo ʻene kau akó.
Ko hono puleʻangá ʻoku ʻikai ʻo e māmani ia ko ení, ka ko ha Puleʻanga fakalaumalie. Pea ʻe ʻikai tupu fakautuutu ia, ʻaki ha mālohi, pe ivi mei tuʻa, pe ko e mahafu tau fakakakano mo fakaemāmani (v.10). Ka te ne tala melino ki he hiteni. Naʻe haʻu ʻa Kalaisi naʻá ne malangaʻi ʻa e melinó ki he kakai kotoa naʻe fanongo kiate ia, ki he melino ki māmani mo e leleí ki haʻa tangata. Ko hono Puleʻangá ʻe mafola ia ki he tapa kotoa pe ʻo māmani. Ko ʻene kosipeli, ʻe malangaʻi ia ki māmani, ke fanongo ki ai ʻa e hiteni he ʻoku ʻikai ha fakangatangata ʻa hono puleʻangá, ka ʻoku ʻatā ki he taha kotoa pē, ʻa e Siú mo e Senitailé fakatouʻosi, ʻa ē kuo tau monūʻia ai ʻia Kalaisi ko e Tuʻi ʻo e ngaahi Tuʻi.
No comments:
Post a Comment