Tusite 11 'Epeleli, 2017

Ma’ake 11:20-26; Matiu 26:6-13

Ma’ake 11:20-26

"20Pea ‘i he‘enau fononga ange hengihengi, na‘a nau vakai ‘a e fu‘u fiki kuo mate ‘o a‘u ki hono tefito. 21Pea manatua ‘e Pita, ‘o ne pehē kiate ia, Lāpai, vakai ange, ko e fu‘u fiki na‘a ke tukitala‘i kuo mate. 22Pea tali ‘e Sīsū ‘o ne pehē kiate kinautolu, Mou tui pē ki he ‘Otua. 23Ko au ē, ‘oku ou tala atu, Ka ai ha taha te ne pehē ki he mo‘unga ni, Fei mo mahiki koe, ‘o patū ki tahi; ‘o ‘ikai te ne tāla‘a ‘i hono loto, ka ne tui pē ‘oku hoko ‘ene lea; pea ‘e hoko ia. 24Ko ia ‘oku ou tala atu, Ko e ngaahi me‘a kotoa pē ‘oku mou hūfia mo kolea, tui pē na‘a mou ma‘u ia, pea ‘e hoko kiate kimoutolu. 25Pea ka mou ka tu‘u leva ke lotu, pea ka ai ha me‘a ‘oku mou kovi‘ia ai ki ha taha, fakamolemole mu‘a ia: koe‘uhi kae fakamolemole ho‘omou ngaahi angahala ‘e ho‘omou Tamai ‘a ia ‘oku ‘i Hēvani. 26Ka ‘o kapau ‘e ‘ikai te mou fakamolemole, pea ‘e ‘ikai fakamolemole ‘e ho‘omou Tamai ‘oku ‘i Hēvani ho‘omou ngaahi hala."

Matiu 26:6-13

"6Pea ko eni, lolotonga ‘a e nofo ‘a Sīsū ‘i Pētani, ‘i he fale ‘o Saimone ko e kilia, 7mo e ‘unu‘unu mai ha fefine kuo ha‘u mo ia ha hina ‘alapasita, na‘e fonu ‘i he lolo tākai mātu‘aki mahu‘inga, ‘o ne lilingi ia ki hono fofonga, lolotonga ‘ene tokoto ‘i he kai. 8Pea ‘i he sio ki ai ‘e he kau ako na‘a nau lāunga, ‘o nau pehē, Ko e maumau me‘a pehē koe‘uma‘ā? 9He ka ne fakatau ia, ne ma‘u ai ha me‘a lahi ke foaki ki he masiva. 10Ka ka mea‘i ‘e Sīsū, ‘o ne pehē kiate kinautolu, Ko e hā ‘oku mou fakamamahi ai ki he fefine? He ko e ngāue lelei kuo ne fai kiate au. 11He ko e me‘a ki he masiva te mou feangai ai pē mo kinautolu; ka ‘e ‘ikai te mou feangai ai pē mo au. 12He ko ‘ene laku? ‘a e lolo ni ki hoku sino, ko ‘ene fai pē ko e teu hoku ‘anga‘anga ki fa‘itoka. 13Ko au ē ‘oku ou tala atu, ‘Ilonga ha potu ‘i māmani kātoa ‘e malanga‘aki ai ‘a e Kōsipeli ni, ‘e lea‘aki ai foki ‘a e me‘a ne fai ‘e si‘i fefine ni, ko e fakamanatu kiate ia."

KO E ʻAHO TUSITE ENI ʻO E UIKE NGĀUE FAKAʻOSI ʻA KALAISÍ, PEA KO E ʻAHO LAHI TAHA ENI ʻA E NGAAHI MEʻA NAʻÁ NE FAÍ, PEA MO HOKO KIATE IÁ. Ke tau vakai pe ki he meʻa ko eni ʻe ua, naʻe hoko ʻi he ʻahó ni. 1. Ko e lesoni ʻoe mate ʻa e fuʻu fikí pea 2. Ko hono tākai holo ʻi Petani.

ʻUluaki, ko e hā ʻa e ʻuhinga naʻe tukitalaʻi ai mo mate ʻa e fuʻu fikí. Ko e potu tohi ko ení (Mk11:20-30) ʻokú ne hanga ʻo fakamamafaʻi ʻa e mafai ʻo e tui moʻoní. Pea ʻoku fokotuʻu maʻu ʻe he niʻihi, ko e fuʻu fiki naʻá ne fakafofongaʻi ʻa ʻIsileli, ko e fakafuʻulau. Kae taʻefua pea ʻe vave ʻene fehangahangai mo e fakamaau ʻa e ʻOtuá, ko e ʻauha pē. Ko e fakatātā ʻo e hiki ʻa e moʻunga ʻo pātū ki lototahi, ʻo e meʻa taʻemalava. Ka ko e poiní ko e maʻu ʻa e tui ki he ʻOtuá, ʻokú ne lava ʻa e taʻemalava. Naʻe fakamamafaʻi ʻe Maʻake kimuʻa ʻa e fakamahino ʻe Sīsū ʻa e tui (9:23,24). Ko e folofola ʻa Sīsuú naʻe ʻikai ke ʻuhinga te tau maʻu ʻotometiki ha meʻa ʻoku tau fiemaʻu, ʻokapau ʻoku tau fakakaukau ʻoku malava ke maʻu. Naʻe ʻuhinga ʻa Sīsuú ha meʻa pe, ʻoku malava , kapau ʻoku tau tui, koeʻuhi ʻoku ʻikai ha meʻa ia ʻoku faingataʻa ki he ʻOtuá. Pea heʻikai ke tau lava ʻo maʻu ʻa e meʻa kotoa pe, ʻoku tau lotu ki ai, ʻi he mana, kae ʻaki pe ʻa e tui, ʻoku tau lava ʻo maʻu ʻa e meʻa kotoa pe ʻoku tau fiemaʻu, ke tauhi ʻaki kiate ia. Pea ke fai ʻetau meʻa kotoa pe ʻi he tui falala ki he ʻOtuá ʻia Kalaisi.

ʻOku hiki ʻe Matiu mo Maʻake, ko e tākai lolo ʻe Mele ʻa Sīsuú, naʻe fai ia kimuʻa ʻi he ʻOhomohe fakaʻosí. Ko Saimone ko e kiliá naʻe fakamaʻa ia ʻe Sīsū, pea naʻá ne fakahaaʻi ʻa e houngaʻia kia Kalaisí ʻaki ʻene fakafiefia kiate ia. Ko Mele ko e tuofefine ia ʻo Lasalosi naʻe fokotuʻu ʻe Kalaisi mei he pekiá. Naʻe hanga ʻe Mele ʻo lilingi ʻa e lolo ʻAlapasita ʻi he fofonga ʻo Sīsuú, ʻoku lau ia ko e fakaʻapaʻapa maʻolunga taha ia, kuo fai ʻe Mele, ki hono ʻEikí, he naʻá ne ʻofa moʻoni ʻi he ʻEikí, neongo ko e fāmili masiva naʻe lata ki ai ʻa Sīsuú. ʻOku pehē ʻe he talanoa, ʻi he ʻalu ʻa Mele ʻo kumi ʻa e lolo ʻAlapasita, ko e lolo ko ení naʻe mamafa pe ia ʻi he falekoloá, naʻe mahino ki he faifakatau ʻene fiemaʻu loló, naʻá ne toʻo mai kia Mele ʻa e kalasi lolo maʻamaʻa, ko e fakatatau mai ʻe ia, ki he tuʻunga masiva ʻo Mele. Ka naʻe tuhu atu pē ʻa Mele ia, ki he lolo tākai ʻi he hina ʻAlapasita, pea ʻi hono ʻomi ʻe he faifakataú, ʻa e loló kia Melé, naʻe toʻo ʻe Mele mei hono koná ʻa e kofukofu ʻo ʻene sēnití ʻo ne lī kotoa atu ʻa e kofukofu sēnití, ki he faifakataú pea ne toʻo ʻe ia ʻa e loló ʻo ne ʻalu mo ia, koeʻuhi ko hono ʻEikí, ke fakahā ʻaki ʻene fakaʻapaʻapa, mo ʻene ʻofa moʻoni ʻiate ia. Ko e hā hoʻo meʻa ʻaʻaú?