Tu'apulelulu 8 Sune, 2017

Teutalonome23:17-18; Levitiko 19:29; 2 Tuʻi 23:7

Teutalonome23:17-18
"17‘E ‘ikai ha ta‘ahine ‘Isileli ‘e pa‘umutu, pea ‘e ‘ikai ha tama ‘Isileli ‘e nofo ki he fai fakasōtoma. 18‘E ‘ikai te ke fakahū ki he fale ‘o Sihova ko ho ‘Otua ‘a e to‘ongapō ‘a ha fefine fe‘auaki, pe ko e totongi ‘a ha kulī, neongo pe ko e hā ‘a e tukumo‘ui na‘e fai: he ‘oku fakalielia‘ia ‘a Sihova ko ho ‘Otua ‘i hē mo ē fakatou‘osi."

Levitiko 19:29
"29‘Oua te ke tuku ho ‘ōfefine ke nofo ki he fe‘auaki; na‘a tō ‘a e fonua ki he fe‘auaki, pea fonu ‘a e fonua ‘i he fakalielia."

2 Tuʻi 23:7
"7Pea ne holoki ‘a e ngaahi fale ‘o e kau fakasōtoma, ‘a ia na‘e ‘i he fale ‘o Sihova,  ‘a ia na‘e lalanga ai ‘e he kau fefine ‘a e ngaahi fale tupenu ki he ‘Āsela."

KO E FONUA KO ʻISILELÍ, ʻOKU ʻIKAI KO E FALE IA MAʻAE TAʻEMAʻÁ. Ko ha fakaʻilonga eni ʻo e taʻefakahoifua ʻi hono ʻai ʻa e anga fulikivanu ko ení, heʻikai ha konga ʻo e anga fulikivanu ko ení, naʻe ʻomai ki he fale ʻo e ʻEikí, ʻo hangē ko hono fai ia ʻi he lotolotonga ʻo e kau senitailé, ko ha fuakava. Ko hono talá eni. 1. ʻE ʻikai tali ʻe he ʻOtuá ha tukumoʻui mei he kotoa ʻo e kakai fai angahalá ni. 2. ʻOku totonu ke ʻoua te nau fakakaukau ke ʻai mo totongi ha ngaahi fuakava, mo ʻomi ha tukumoʻui feilaulau ki he ʻEikí ʻo maʻu ia, kae tuku ke hoko atu pe ʻa e angahala (Palo 7:14,15). 3. Heʻikai ke tau lava ʻo fakalangilangiʻi ʻa e ʻOtuá ʻaki ʻetau meʻá, kaeʻoua ko faitotonu mo e langilangi kuo hoko mai. Pea kuopau heʻikai ke tau lau ʻa e meʻa kuo tau foakí, ka naʻe maʻu fakafēfē ia. ʻOku fehiʻa ʻa e ʻOtuá he kaihaʻa ki he feilaulau tutu mo e taʻemaʻá foki. Ko e foʻi lea Hepelu ʻoku liliu ko eni, ko e toʻonga paʻumutú, ʻoku faʻu mei ai ʻa e foʻi lea, ʻo ʻuhinga ko e “maʻoniʻoni”.       

Ko e toʻonga fakapaʻumutú, naʻe lau ia ʻe he kau Kenaní, ko e taha ia e meʻa ke “tauhi mavahe” maʻae lotu, ki honau ngaahi ʻotuá, mo e ngaahi ʻotua fefine ki he moʻui ʻa e kelekele, pea ko e kakai tangatá naʻe lotu paʻumutu mavahe pe kinautolu, he naʻe tui ʻa e kau Kenaní ia, ko e ngāue ko ení te ne ʻomai ʻa e moʻui ʻa e kelekelé, ki honau ngaahi fāmilí, pea ʻe foha ʻenau ngoué, pea ʻe tupu ʻa e ʻakau kaí. Ko e founga fakamaʻulaloʻi ko eni ʻa e lotú, ʻoku fakamoʻoniʻi, ko e taha ia ʻo e ngaahi ʻuhinga naʻe ʻomi ai ʻe he ʻOtuá ʻa e lao, mo e fakamaau fefeka ke fakafepakiʻi ʻa e kau Kenaní, mo e fakasotomá, pe ko e paʻumutu ʻa e kakai tangatá, ʻe tapu ke hā ha meʻa pehē ʻi ʻIsileli, ka ke nau mateaki honau ʻOtuá, ʻa ē ʻoku mahino hono fuʻu mafia, ʻi heʻene tataki mo akoʻi’i kinautolu ʻi he toafá he taʻu ko eni ʻe 40. Ko e ui mateaki ia kia kitautolu kāinga Moʻui Foʻou, ke ke fakaʻikaʻi koe, pea ke fua ho kolosí he ʻaho kotoa pe, pea ke tau toki hoko ko e kau muimui ʻo Kalaisi (Lk 9:23)