Sapate 4 Sune, 2017

Teutalonome 22:28-30; 22:24; 27:20; ‘Ekisoto 22:16,17; ʻIsikeli 16:8; 1 Kolinito 5:1

Teutalonome 22:28-30

"28Ka ma‘u ‘e ha tangata ha ta‘ahine tāupo‘ou ‘a ia kuo ‘ikai polo‘i ki ha taha, ‘o ne puke ia, ‘o ne mohe mo ia, ‘o ‘iloa kinaua; 29pea ko e tangata na‘e mohe mo ia te ne ‘ange ki he tamai ‘a e ta‘ahine ha siliva ‘e nimangofulu, pea te ne hoko ko hono uaifi, koe‘uhi kuo ne fakamo‘ulaloa‘i ia, ‘e ‘ikai ngofua ke ne tukuange ia lolotonga ‘ene mo‘ui. 30‘E ‘ikai mali ha tangata mo e ‘unoho ‘o ‘ene tamai, ‘o ‘ikai te ne tatala ‘a e vala ‘o ‘ene tamai."

Teutalonome 22:24

"24pea te mou ‘omi kinaua fakatou‘osi ki he matanikolo ko ia, pea te mou tolomaka‘i kinaua ke na pekia; ko e ta‘ahine koe‘uhi na‘e ‘ikai te ne kaila, he ‘oku ne ‘i he kolo; pea ko e tangata, koe‘uhi kuo ne fakamo‘ulaloa‘i ‘a e uaifi ‘o hono kaungā‘api: ka ke ‘ave ‘a e kovi mei ho lotolotonga."

Teutalonome 27:20

"20Mala‘ia ā ka ko ia ‘oku mohe mo e ‘unoho ‘o ‘ene tamai; he ko ‘ene tatala ‘a e vala ‘o ‘ene tamai. Pea ‘e pehē ‘e he kakai kotoa, ‘Ēmeni."

‘Ekisoto 22:16,17

"16Kapau ‘e kākaa‘i ‘e ha tangata ha ta‘ahine kuo te‘eki polo‘i, ‘o ne mohe mo ia, kuo pau te ne ‘ange ki he mātu‘a ‘a e koloa totonu, ka ne ma‘u ia mōno uaifi. 17Kapau ‘oku ‘ikai ‘aupito loto ‘ene tamai ke foaki ia kiate ia, ka te ne ‘ange pē ha pa‘anga ‘o taau mo e fakakoloa ‘o ha ta‘ahine."

ʻIsikeli 16:8

"8Pea u laka ofi atu, pea u vakai tā kuo hoko ho taimi, ‘a e taimi ‘ofa; pea u folahi hoku tapa‘i kofu ‘i ho funga, ‘o ‘ufi‘ufi ho‘o telefua; pea u fuakava kiate koe, ‘io, na‘a ku fai kovinānite mo koe–ko ‘Ātonai Sihova ia mei he Ta‘ehāmai–pea na‘a ke hoko ko ‘eku me‘a."

1 Kolinito 5:1

"1TĀ ‘oku kātaki pē ‘a e fe‘auaki ‘iate kimoutolu, kae‘uma‘ā ko e fe‘auaki ‘oku taha ‘ana, na‘a mo e hīteni ‘e ‘ikai te nau kātaki ha me‘a pehē, ‘a ia ko e mali ‘e ha tangata mo ha fefine ‘oku nonofo mo ‘ene tamai."

KO E LAO ENI KE FAKATOKANGAʻI ʻAKI ʻA E KAU TALAVOÚ. Ko e ngaahi lao ko ení ʻoku felāveʻi ia mo e fekau hono 7 ʻi he fekau ʻe 10, ʻo ʻai hono fakangatangata, ʻaki hono ʻai ha tautea ʻo e ngaahi holi fakakakanó, ʻo fai tauʻaki, ke fakafepakiʻi ʻa e laumalie ʻo e tangatá mo e fefiné. Ko e ngaahi laó ni ʻoku nau akoʻi kitautolu ʻi he kākā kotoa ko hono maumauʻi ʻa e ngaahi tuʻunga ʻo e malí, ko e angahala, pea ne fakatupu ʻa e fakaloto-mamahi ʻi he kahaʻu. Ko e angahala kotoa pe ko e vale ia, tautefito ki he ʻuli. Pea ko e kotoa ʻo e ui kuo tau lave ki ai, ko e taʻemaʻa ʻi ʻIsileli.

Ko e tangata pe eni kuo ne maʻu ha taʻahine taupoʻou, ka naʻe ʻikai poloʻi ki ha tangata ʻo fakaangahalaʻi, pea fai ʻa e ʻilo ki ai, pea koeʻuhi ko ʻene hanga ʻo fakamoʻulaloaʻi ʻa e taʻahiné, te ne totongi ki he tamai ʻa e taʻahiné ʻa e sikeli, pe konga siliva ʻe 50, pea hoko ʻa e taʻahiné ko hono uaifi, ki heʻena mate. Pea ke ʻoua naʻa ngalo ʻiate kitautolu ʻa e kovi makehe ʻaupito ʻa e feʻauakí ʻi he fotunga kotoa pe, pea ko e tautea ʻoku tali mai kia kinautolu ʻoku halaia ai. ʻI he hoko ʻa e ʻahiʻahi, ke tau tangi ki he ʻOtuá ki heʻene tokoní pea ʻoku totonu ke tau tōtōivi taha ai. ʻI heʻetau tangi kiate ia he ʻoku ne ofi taʻengata mai, mo mateuteu ke tokoniʻi kitautolu, pea ko ʻene Kelesí ʻe feʻunga maʻu pe ia maʻa kitautolu. Pea ʻoku talamai ʻe he ʻapositoló, “Ka ko au mole ke mamaʻo haʻaku polepole, ka ʻi he kolosi ʻo hotau ʻEiki ko Sīsū Kalaisi ʻa ia kuo kalusefai ai ʻa māmani kiate au, mo au ki māmani” (Kal 6:14). Ko māmani ʻoku fonu ʻi he fakatauvele. Ko e founga pe ʻe taha ke ke hola mei he ngaahi tohoaki fakaʻauha ko eni ʻa e māmani, ke tau kole ki he ʻOtuá ke tokoni ʻo kalusefai ʻetau manako māmaní ʻo hangē pe naʻe fai ʻe Paula (2:20 ; 5:24). Ko ʻetau ʻia Kalaisi Sīsuú ʻoku tau tutuki ki he kolosí ʻa e kakano, mo hono ngaahi oʻi mo e holi. Kuopau ke tau tukulolo fakaʻaho hotau natula angahala ki he ʻOtuá mo ʻene pulé, pea kalusefai fakaʻaho kinautolu mei he momeniti ki he momeniti ke ʻoua ʻe toe hoko ʻa e ngaahi angahala motuʻá.