Tokonaki 26 Novema, 2016

Nomipa 26:5-11 ; 16:2, 35, 38 

Nomipa 26:5-11

"5Ko Lūpeni ko e ‘uluaki foha ‘o ‘Isileli; ko e ngaahi foha ‘o Lūpeni; ko ‘Īnoke, ‘a e fāmili ‘o ha‘a ‘Īnoke: meia Falu, ‘a e fāmili ‘o ha‘a Falu: 6meia Heseloni, ‘a e fāmili ‘o ha‘a Heseloni: meia Kālimi, ‘a e fāmili ‘o ha‘a Kālimi. 7Ko e ngaahi fāmili ia ‘o ha‘a Lūpeni; pea ko kinautolu na‘e lau mei ai ko e toko fā mano mā tolu afe mā fitungeau mā tolungofulu. 8Pea ko e hako ‘o Falu; ko ‘Eliapi. Pea ko e hako ‘o ‘Eliapi; ko Nemueli, mo Tētani, mo ‘Apilami. 9Ko e Tētani mo ‘Apilami ia na‘e ui ki he fakataha, ‘a ia na‘a nau kē mo Mōsese mo ‘Ēlone ‘i he kau ‘a Kola ‘i he‘enau fetakai mo e ‘Eiki. 10Pea na‘e mafa‘a ‘e he fonua hono ngutu, ‘o folo fua kinautolu fakataha mo Kola, ‘i he taimi na‘e pekia ai ‘a e kautaha ko ia; 11‘o keina ‘e he afi ‘a e uangeau mā nimangofulu‘i tangata, ‘o nau hoko ko e faka‘ilonga. Ka ko e ngaahi foha ‘o Kola na‘e ‘ikai ke pekia."

Nomipa 16:2, 35, 38

"2pea nau tutu‘u ‘i he ‘ao ‘o Mōsese fakataha mo e tu‘unga me‘a mei ha‘a ‘Isileli, ko e toko uangeau mā nimangofulu ‘i he hou‘eiki ‘o e fakataha, ha ni‘ihi na‘e ui ki ai, ko e kau tangata ‘ilonga. 35Pea pā atu ha afi meia Sihova, ‘o keina ‘a e toko uangeau mā nima-ngofulu‘i tangata na‘e to‘o ‘inisēnisi. 38pea ke nau tuki ia ‘o ngaohi ‘aki ‘a e ngaahi lau‘i ukamea, ‘o ‘ufi‘ufi ‘aki ‘a e ‘ōlita, he na‘a nau ‘atu ia ‘i he ‘ao ‘o e ‘Eiki, ko ia ‘oku nau tapu ai; pea te nau tu‘u ko e faka‘ilonga ki ha‘a ‘Isileli,"

Ko e fānau eni ʻa Lupeni, ko e foha lahi ia ʻo Sekope ʻa ia ko ʻIsileli. ʻOku fai ʻa e tokanga ko eni, ki he tuʻu fakamatakalí, pea mei ai ki he fakakulupu fakafāmili, mo honau ngaahi ʻulumotuʻa. ʻOku feʻunga ange ke lau ʻa e tohi kakai ko eni ʻoku kakató ʻi he ʻuluaki tohi kakai (vahe 1). Ko e tohi kakai ko ení, ʻoku ʻi ai ʻa e kakai pau ai, te nau hū atu mo nofoʻi ʻa e fonua ʻo e talaʻofá. Ko e ngaahi foha ʻo Lupení naʻa nau toko fā, ko ʻInoke mo hono fāmili, ko Falu mo hono fāmili. Ko Heseloni mo hono fāmili pea mo Kalimi mo hono fāmili. Ko e kātoa ʻo e fāmili ʻo Lupení ko e toko 43, 730. Ko e ʻuluaki tohi kakaí naʻa nau toko 46,500 ʻoku holo ʻaki ʻa e fāmili ʻo Lupení ʻa e toko 2,770. 

Ko Falu ʻi he fānau ʻa Lupení naʻe ʻi ai hono foha ko ʻEliapi, pea ko ʻEliapí naʻe ʻi ai hono ongo foha ko Tetani mo ʻApilami, naʻa na kau kinaua fakataha mo Kola, mo e kakai naʻa nau kau fakatahá, ʻo nau kē mo Mosese mo ʻElone ʻi heʻenau fakafepaki ki he ʻEikí, pea mafaʻa ʻe he kelekelé hono ngutú, ʻo ne folofua kinautolu mo keina ʻe he afí, ko e toko uangeau nimangofulu, ko e kau tangata, kae hao pe ʻa e ngaahi foha ʻo Kolá mei he mate ko iá. Naʻe hoko ʻa e kau maté, ko e fakamanatu ki he kakaí kotoa pe, ko e ʻOtuá ʻoku moʻui pea ʻokú ne ʻafio‘i ʻa e meʻa ʻoku totonu, mo hono finangaló, mo e meʻa ʻoku halá, pea te ne tautea ʻe ia. ʻOku mahuʻinga ʻetau fai maʻa he meʻa kotoa pē, pea ke fakasio pe ʻa e finangalo ʻo e ʻOtuá maʻu pe. Fakaʻehiʻehi mei he fai ha meʻa ʻaki ʻa e fakakaukau fakaetangatá, mo e sio fakaemāmaní. Vivili maʻu pe ke maʻu ʻa e poto mei ʻolungá, he ko hono anga tuʻukimuʻá ko e maʻa, pea hoko ai mo ʻene melino mo ʻene anga fakaʻatuʻi mo taka fakaoleole ʻo mou manavaʻofa pea fuhi ai ʻa e fua leleí, pea ʻoku ʻikai ngutungutu ua, ʻoku ʻikai momole ʻolunga (Sem 3:17).