Monite 7 Novema, 2016

Nomipa 22:15-21 ; 23:5, 12, 16, 26; 24:13 ; 1 Tuʻi 22:14 ; 2 Kalo 18:13 

Nomipa 22:15-21

"(15) Pea toe fekau atu ‘e Pēlaki ha hou‘eiki na‘e tokolahi ange mo mā‘olunga hake ‘i he ō ko ē. (16) Pea nau a‘u kia Pēlami, ‘o nau pehē ki ai, Ko e folofola eni ‘a Pēlaki ko e ‘alo ‘o Sīpoa, Ke ‘oua na‘a ke tuku ke ta‘ofi koe mei he ha‘u kiate au: (17) he te u mātu‘aki fakahīkihiki‘i koe, pea neongo pe ko e hā te ke tala mai kiate au te u fai: ko ia ke ke ha‘u mu‘a, ‘o tutuku‘i ‘a e kakai ni ma‘aku. (18) Pea tali ‘a Pēlami, ‘o ne pehē ki he kau tamaio‘eiki ‘a Pēlaki, Neongo ‘e foaki mai ‘e Pēlaki hono fale kuo fonu ‘i he siliva mo e koula, ‘e ‘ikai te u lava ke hiki mei he me‘a ‘e tō mei he fofonga ‘o Sihova ko hoku ‘Otua, ke fakasi‘isi‘i, pe fakalahi ki ai. (19) Ka ko eni ke mou nofo mu‘a heni, he pō ni foki, ka u ‘ilo pe ko e hā ha toe folofola ‘a Sihova ‘e fai mai. (20) Pea hā‘ele mai ‘a e ‘Otua kia Pēlami ‘i he pō, ‘o ne folofola kiate ia, Kapau ‘e ha‘u ‘a e tu‘unga tangata ke ui koe, pea ke tu‘u ‘o ‘alu mo kinautolu; ka neongo ia, ka ko e lea te u ‘atu kiate koe ko ia pē te ke fai. (21) Pea pongipongi hake pea tu‘u ‘a Pēlami, ‘o ne teuteu ‘ene ‘asi fefine, ‘o ne ‘alu mo e hou‘eiki Moape."

Nomipa 23:5, 12, 16, 26

"(5) Pea ‘ai ‘e he ‘Eiki ha lea ki he ngutu ‘o Pēlami, ‘o ne folofola mai, Foki kia Pēlaki, pea ‘e pehē ho‘o lea ki ai. (12) Pea tali ‘e ia ‘o ne pehē, ‘Ikai ‘oku totonu ke u ta‘ofi au ke lea‘aki ‘a e me‘a pē kuo ‘ai ‘e Sihova ki hoku ngutu? (16) Pea felāve‘i ‘a Sihova mo Pēlami, ‘o ne ‘ai ha lea ki hono ngutu, ‘o ne folofola mai, Foki kia Pēlaki, pea ‘e pehē ho‘o lea ki ai. (26) Pea tali ‘e Pēlami, ‘o ne pehē kia Pēlaki, ‘Ikai na‘a ku tala kiate koe, ‘o pehē, Ko ia kotoa ‘e folofola‘aki mai ‘e Sihova kuo pau ke u fai ia?"

Nomipa 24:13

"(13) Neongo ‘e foaki mai ‘e Pēlaki hono fale kuo fonu ‘i he siliva mo e koula, ‘e ‘ikai te u lava ke hiki mei he me‘a ‘e tō mei he fofonga ‘o Sihova, ke fai ha lelei pe ha kovi ko hoku loto pē; ko e me‘a ‘oku folofola‘aki mai ‘e Sihova ko ia pē te u lea‘aki."

1 Tuʻi 22:14

"(14) Pea tali ‘e Maikaia, Tangi ‘a e mo‘ui ‘a Sihova, ka ko ia pē ‘oku folofola‘aki mai ‘e he ‘Eiki ko ia pē te u lea‘aki."

2 Kalonikali 18:13 

"(13) Pea tali ‘e Maikaia, Tangi ‘a e mo‘ui ‘a Sihova, ka ko ia pē ‘oku folofola‘aki mai ‘e hoku ‘Otua ko ia pē te u lea‘aki."

Ko hono tuʻo ua ʻeni ʻo e fetaulaki ʻa e mātuʻa Moapé mo Mitiani, pea mo Pelani. Naʻe haʻu ko e houʻeki kinautolu, pea mo ʻenau ngaahi meʻaʻofa. Naʻe ʻai ʻe Pelaki ke lahi ange ʻa e meʻaʻofa ko ení, ʻi he ʻuluaki ʻalu naʻe fai. Naʻá ne ʻahiʻahiʻi ʻa Pelami, ʻaki ʻa e ngaahi langilangi, pea ne poupou ʻaki pe ʻa e ngaahi meʻa, ʻo ʻikai ko e ʻai pe ke lotomanumanu, ka ke ʻafungi, mo hikisia foki. Naʻe fai ʻe Pelaki ʻa e meʻa kotoa pe fakaemāmani, ke ofeʻi ʻaki ʻa e loto ʻo Pelamí, naʻá ne ngāueʻaki ʻa e meʻa kotoa pe ʻoku hē ngofua ai ʻa e tangata fakakakanó. Naʻe fai ai ʻe Pelami ʻa e lea ko ení, ki he kau tamaioʻeiki fekau ʻa Pelakí. “Neongo ʻe foaki mai ʻe Pelaki hono falé kuo fonu ʻi he siliva, moe koula, ʻe ʻikai teu lava ke hiki mei he meʻa ʻe tō mei he fofonga ʻo Sihová ko hoku ʻOtua, ke fakasiʻisiʻi pe fakalahi ki ai. Tokangaʻi langilangi ʻo ʻene lea ki he ʻOtuá, “fofonga ʻo Sihova ko hoku ʻOtua” ko e tokolahi ʻoku nau ui ʻa e ʻOtuá, ko honau ʻOtua, ka ʻoku ʻikai ke ʻoʻona ia, ʻoku ʻikai ke moʻoni, koeʻuhi, ʻoku ʻikai ko ia pe, he ʻoku ʻi ai mo e koloa ʻo e māmaní. Kapau ko e koula moe siliva ʻe halaʻatā ki ai, ʻe fakahoa ia ki he manako he ʻOtuá. ʻOku faingofua ki he kakai koví, ke lea lelei, pea fakahaaʻi mai ia ʻe honau ngutú. ʻOku ʻikai ha fakamaau ki he tangatá mo ʻenau leá, ka ʻoku ʻafioʻi pe ʻe he ʻOtuá ia, ʻa e loto. Naʻe tuku ʻe he ʻOtuá ʻa Pelami ke ʻalu mo e kau talafekau ʻa Pelakí, ka naʻá ne houhau pe ʻia Pelami, ko ʻene ʻulungaanga taʻepaú. Naʻá ne falala heʻikai ke fakafepaki ki he ʻOtuá ʻi he paʻanga. Ko hono ongoongó kuo kamata ke fakaheheke, ko ʻene havala ki he koloa naʻe ʻomai ʻe Pelakí, ʻo fakakuihi ʻaki ia, ke ʻoua te ne lava ʻo sio ki he meʻa, ʻoku feinga ʻa e ʻOtuá ke taʻofi ia mei ai. Neongo oku tau ʻilo pe ʻa e meʻa, ʻoku fiemaʻu ʻe he ʻOtuá ke tau fai, ka ʻoku tau lava pe ʻo kui ʻi he ngāue ʻa e holí, paʻangá, mo e koloá. Ko e koloá mo e paʻangá ko e meʻa fononga ʻa māmani, ka ʻoku ʻikai ke ʻuhinga, ke hoko ia ko e ʻOtua. Ko hotau ʻOtuá ʻoku tokotaha pē, pea ko ia ʻa ʻetau mataʻikoloa, ʻoku pule ia, pea Ne taki ʻi heʻetau meʻa kotoa pe, pea ʻoku tau moʻui Maʻana, pea mo hono langilangí ʻi taimi mo ʻItaniti.