Nomipa 22:9-14
"(9) Pea hā‘ele mai ‘a e ‘Otua kia Pēlami, ‘o ne folofola mai, Ko e tu‘unga tangata hā ena ‘oku ‘iate koe? (10) Pea fakatau folofola ‘a Pēlami kia ‘Elohimi, Ko Pēlaki ko e ‘alo ‘o Sīpoa, ko e Tu‘i Moape, kuo ne pōpoaki mai ‘o pehē, (11) Vakai, ko e kakai kuo ha‘u mei ‘Isipite ‘oku ‘ikai ke hā ‘a e kelekele koe‘uhi ko kinautolu: ko ia ke ke ha‘u ‘o tutuku‘i ia ma‘aku; hei‘ilo te u mafai ai ke tau‘i ia, ‘o kapusi. (12) Pea folofola ‘a e ‘Otua kia Pēlami, ‘Oua te ke ‘alu mo kinautolu; ‘oua te ke tukitala‘i ‘a e kakai ko ē: he ko e kakai tāpuekina. (13) Pea tu‘u pongipongi hake ‘a Pēlami, ‘o ne pehē ki he hou‘eiki ‘a Pēlaki, Mou ō ki homou fonua; he kuo ta‘eloto ‘a Sihova ke tukuange au ke ‘alu mo kimoutolu. (14) Pea tutu‘u ‘a e hou‘eiki Moape, ‘o nau a‘u kia Pēlaki, pea nau pehē, Na‘e ‘ikai loto ‘a Pēlami ke ha‘u mo kimautolu."
Senesi 20:3
"(3) Pea hā‘ele ‘a e ‘Otua kia ‘Apimeleki ‘i ha misi po‘uli, ‘o ne folofola ki ai, Ko eni ko e koto pekia koe, koe‘uhi ko e fefine kuo ke ma‘u; he ko e fefine alafia."
Loma 11:28
"(28) ‘Oku mo‘oni ‘i he sio faka-Kōsipeli, ‘oku ne fili ‘aki kinautolu koe‘uhiā ko kimoutolu; ka ‘i he sio faka-e-tu‘utu‘uni-fili, tā ‘oku nau ‘ofeina koe‘uhi ko ‘enau ngaahi kui."
Siutasi 1:11
"(11) ‘Oiauē ‘a kinautolu! he kuo nau ‘alu ‘i he ‘alunga ‘o Keini, ‘o nau tafe atu ‘i he hē ‘a Pēlami ko e sio totongi, pea nau ‘auha ‘i he angatu‘u ‘a Kola."
Naʻe finangalo ʻa e ʻOtuá, ke ʻave ʻa e fekau ki he kau Moapé, he kuo nau fili ke nau ngāue mo Pelami. Ko Pelami, ʻoku ʻatā ia ki he ʻOtuá, ke ne ngāueʻaki, ʻo hangē ko hono ngāueʻaki ʻa Felo ʻe he ʻOtuá, ke aʻusia ʻa hono finangaló ki ʻIsipite (ʻEkisotosi 10:1). Naʻe hū ʻa Pelami ki hono fatongia fakapalofitá, ka ko hono lotó naʻe tuifio, naʻá ne maʻu pe ʻa e ʻilo niʻihi ki he ʻOtuá, ka naʻe ʻikai feʻunga ke ne liʻaki ʻene fai fakalouʻakau, mo tafoki kakato ki he ʻOtuá. ʻOku hiki ʻe he Tohitapú, ko Pelani naʻe ʻikai ke ne lava ʻo fakafepakiʻi ʻa e ʻahiʻahi ʻa e paʻangá mo e ʻaitolí (31:16 Siutasi 11). Naʻe ʻikai fai tōnunga ʻa Pelami ʻene fakahoko ʻa e tali ʻa e ʻOtuá, ki he kau talafekau, naʻá ne tala pe, ʻoku taʻeloto ʻa Sihova, ke tukuange au ke ō mo kimoutolu. Naʻe ʻikai te ne talaange kiate kinautolu ko ʻIsilelí, ko e kakai ʻoku tapuekina, pea ʻoku ʻikai ha ʻuhinga ke nau mafeia ai. Kaekehe, naʻe fakahā ʻe Pelami ki he kau talafekaú, ke nau foki ki honau fonuá. He ʻoku ʻikai loto ʻa Sihova, ke tukuange ia ke ō mo kinautolu. Pea nau aʻu ʻa e kau Moapé ʻo fakahā kia Pelaki, ʻoku ʻikai loto ʻa Pelami, ke ʻomi mo kinautolu. Naʻe meesi pe ʻa e ʻOtuá ʻi Heʻene tuʻutuʻuni kia Pelami, ke ʻoua ʻe ʻalu mo e kau tangatá, ke fakamalaʻia ʻa ʻIsileli, koeʻuhi he kuo fai tapuekina ia. Talu pe ʻa e fakamalumalu ʻa ʻIsileli ia ʻi he tapuaki ʻa e ʻOtuá, ko ia ʻokú ne feinga ke fakamalaʻiaʻi ʻa ʻIsileli ʻokú ne ʻohofi ʻe ia ʻa e folofola ʻa e ʻOtuá. “Ko ia tene tutukiʻi ko é ʻe fakamalaʻiaʻi” (Senesi 12:3). Pea fakamanatu mai ʻe he ʻapositoló “..ko ia kotoa pē ʻoku tui pikitai kiate Ia ke ʻoua naʻa ʻauha, kae maʻu ʻa e moʻui taʻengatá (Senesi 3:16). Ko Kalaisi ē kuo ʻomi, ko ʻetau moʻui iá, ʻo ʻikai ke toe ngata, tui kia Kalaisi, pea ko ʻene kamata leva ia ʻa e moʻui ʻoku taʻengatá, ʻoku ʻikai ngata ia he maté, he kuo tau hiki mei he maté, ki he moʻuí, he koe maté ko e sino pe, ko e foki ʻa e efu ki he efu. Ke hoko atu hotau laumalié ʻo nofo mo Kalaisi ʻo taʻengata, pea te ne toki ʻomi ʻa e sino taʻefaʻamaté, ke alāanga mo e sino ʻo ʻene langilangiʻiá. (Fili 3:21)
No comments:
Post a Comment