Sios 4:1-3; 3:12; Teut 27:2
Siosiua 4:1-3
"1PEA ‘i he ‘osi‘osingamālie leva ‘a e pule‘anga ‘enau a‘a atu ‘i Soatani, na‘e folofola ‘a Sihova kia Siosiua, ‘o pehē, 2Vahe mai mei he kakai ha tu‘unga me‘a ‘e hongofulu mā ua, ko e toko taha mei he matakali takitaha, 3pea mou tu‘utu‘uni kiate kinautolu, ‘o pehē, To‘o ma‘amoutolu mei hē ha maka ‘e hongofulu mā ua, mei loto Soatani, ‘a e potu na‘e tu‘u ma‘u ai ‘a e va‘e ‘o e kau taula‘eiki, pea ō atu mo kimoutolu ki he kauvai, ‘o tuku hifo ‘i he potu te mou ‘apitanga ai ‘i he pō ‘anai."
Siosiua 3:12
"12Pea ko eni, mou vahe mai ha toko hongofulu mā ua mei he ngaahi matakali ‘o ‘Isileli, ‘o takitaha ‘a e matakali ha tangata ‘e toko taha."
Teutalonome 27:2
" 2Pea ka faifai pea mou a‘a atu ‘i Soatani ki he fonua ‘oku foaki kiate koe ‘e Sihova ko ho ‘Otua, ko e taimi ko ia te ke fokotu‘u ai ha‘o ngaahi maka lalahi, ‘o vali lahe"
KO E MAKA ʻE TAHAUA MEI HE VAITAFE ʻO SOATANÍ. Hili ʻa e kolosi hao kotoa ʻa ʻIsileli ʻi he vaitafe Soataní. Naʻe kimuʻa ʻi haʻanau toe fai ha meʻa ki honau nofoʻanga pe ko honau ngaahi familií. Naʻe fiemaʻu kinautolu ia ke nau fai hano fakamanatu ʻo e meʻa mahuʻinga ko eni naʻe hoko, ʻa e fuʻu mana kafakafa ko eni ʻa e tuʻu fakakauʻāʻatea ʻa e vai ʻo e vaitafe Soatani, ka nau fononga atu ki Kenani ʻi ha kelekele momoa ʻa ʻIsileli kotoa, naʻa nau toko tolu miliona honau tokolahi, pea ko hai ia te ne taʻeʻilo ʻa e mafai ʻo e ʻOtuá ʻene mahulu ʻi natula ke nau falala kiate ia.
Ko e fakamanatu naʻe fai, naʻe folofola mai ʻa Sihova ke vaheʻi mai ha kau tangata ʻe toko hongofulu ma ua ʻo tautau tokotaha mei he matakali ʻe hongofulu ma ua ʻo ʻIsileli, ʻo nau ʻalu ki he loto vaitafe Soataní ʻo nau taki taha mei ai ʻa e maka, ʻa ia ko e feituʻu ia naʻe tuʻu ai ʻa e kau taulaʻeiki naʻa nau fua ʻa e aake ʻo e kovinanité, ka e mātuʻu ʻa e vai. Pea te nau ʻomai ʻa e ngaahi maká ki he feituʻu ko eni ʻoku nau ʻapitanga ai ʻi he ngutu vai ʻo fokotuʻu ai. Pea ʻi hení ʻoku ngali maʻamaʻa pe ʻi he sitepu ʻo ʻenau ngāue fakamisiona ke ikunaʻi ʻa e fonuá ka naʻe ʻikai finangalo ʻa e ʻOtuá ki hono kakaí ke nau ʻoho ki heʻenau ngāué taʻeteuteu. Pea ko ʻenau teuteu ko ʻenau fakamamaʻu kiate ia, pea ke nau manatuʻi, ko hai ʻokú ne tataki kinautolu. Ko e taimi lahi foki ʻoku tau fai pe ʻetau ngaahi ngāue ʻi heʻetau anga maheni, ko e ʻalu ki ʻuta ʻo ngaue ʻa kitautolu tangata, pea ko e kakai fefine ʻi heʻenau ngaahi ngāue fakakakai fefine kuo nau maheni aí. ʻOku ʻikai pe ke tau manatuʻi ʻe kitautolu ia ʻa e ʻOtuá, ko ia ʻoku mafai ke fakafoha ʻa e ngoué, mo e ngaahi meʻa kehekehe ʻo tatau ʻa e tangata mo e fefine. Pea hangē ko hoʻo femoʻuekina hoʻo fai ʻa e ngaahi ngāue kuo ʻoatu ʻe he ʻOtuá, ʻai haʻo ngaahi momeniti fakalongolongo, ko e ngaahi taimi ia ke ke fakamanatu ʻa e fuʻu ivi mafai ʻo e ʻOtuá, kuó ne fakahaofi ai koe ʻo fou ʻia Kalaisi, pea ko e hā pe ha meʻa ʻoku tau fai, ko ia ʻoku ne tataki kitautolu.
No comments:
Post a Comment