Tokonaki 9 Sepitema, 2017

Sios 4:9-14; 3:7; Nom 32:20,27,28

Siosiua 4:9-14

"9Na‘e fokotu‘u foki ‘e Siosiua ha maka ‘e hongofulu mā ua ‘i loto Soatani, ‘i he potu na‘e tu‘u ai ‘a e va‘e ‘o e kau taula‘eiki na‘e kauala ‘a e ‘A‘ake ‘o e Kovinānite: pea ‘oku nau ‘i he potu ko ia ‘o a‘u ki he ‘aho ni. 10He ko e kau taula‘eiki na‘e kauala ‘a e ‘A‘ake na‘a nau tu‘u ‘i loto Soatani, kae‘oua ke ‘osi‘osingamālie ‘a e ngaahi me‘a na‘e fekau ‘e Sihova kia Siosiua ke tala ki he kakai, ‘o hangē ko ia kotoa na‘e fekau ‘e Mōsese kia Siosiua; pea na‘e fakavave ‘a e kakai ‘enau a‘a atu.

11Pea ‘i he faifai pea ‘osi atu ‘a e kakai kotoa, pea na‘e toki ‘alu atu ‘a e ‘A‘ake ‘o Sihova mo e kau taula‘eiki ‘i he ‘ao ‘o e kakai. 12Pea na‘e a‘a atu ‘a ha‘a Lūpeni mo ha‘a Kata mo e vaeua ‘o e matakali ‘o Manase, ‘o fakakongakau ‘enau ‘alu, ‘i he ‘ao ‘o ha‘a ‘Isileli, ‘o hangē ko e me‘a ‘a Mōsese kiate kinautolu: 13ko e toko fā mano nai kuo ‘osi sāuni ki he tau, na‘a nau laka ‘i he ‘ao ‘o Sihova ki he ‘Alapā ‘o Sielikō ke fai ‘a e tau. 14‘I he ‘aho ko ia na‘e hākeaki‘i ‘a Siosiua ‘e Sihova ‘i he ‘ao ‘o ‘Isileli kātoa, pea na‘a nau ‘apasia kiate ia, ‘o hangē ko ‘enau ‘apasia kia Mōsese ‘i he ‘aho kotoa ‘o ‘ene mo‘ui."

Siosiua 3:7

"7Pea folofola ‘a Sihova kia Siosiua, Ko e ‘aho ni te u kamata ke hākeaki‘i koe ‘i he ‘ao ‘o ‘Isileli kātoa, koe‘uhi ke nau ‘ilo, hangē na‘a ku ‘ia Mōsese, ‘e pehē ‘eku ‘iate koe."

Nomipa 32:20, 27, 28

"20Pea me‘a ‘a Mōsese kiate kinautolu, Kapau te mou fai ‘a e me‘a ko ia; kapau te mou ‘ai mahafu ke ‘alu ‘i he ‘ao ‘o Sihova ki he tau 27ka ko ho‘o kau tamaio‘eiki ko kimautolu te mau laka atu ‘i he ‘ao ‘o Sihova ki he tau, ‘a kimautolu kotoa ‘oku ma‘u teu ki he tau, hangē ko e me‘a ‘a e Feitu‘u na. 28Ko ia na‘e fai tu‘utu‘uni ‘iate kinautolu ‘e Mōsese, ‘o ‘atu kia ‘Eliesa ko e taula‘eiki, pea kia Siosiua ko e foha ‘o Nuni, pea ki he hou‘eiki ‘ulumotu‘a ‘o e ngaahi matakali ‘o ha‘a ‘Isileli."

KO HA MAKA FAKAMANATU ʻI HE LOTO VAITAFE SOATANÍ. Naʻe toe fai foki ʻe Siosiua ʻa hono toe fokotuʻu ha maka ʻe hongofulu ma ua ʻi loto Soatani ʻi he feituʻu ko ia, naʻe tuʻu ai ʻa e vaʻe ʻo e kau taulaʻeikí naʻa nau kauala ʻa e ʻaʻake ʻo e kovinanité pea ʻoku kei ʻi ai pe ʻa e maka fakamanatu ko iá ʻo aʻu mai ki he ʻahó ni. ʻOku mahino pe ko e meʻa hā mai ʻoku taimi nounou pe pea ngalo ia. Ka ko e ngaahi ngāue ia ʻa e ʻOtuá ʻoku taau ia ke manatuʻi maʻu pe ʻa hono mahuʻinga, pea mo hono fuʻu mafai naʻa ne fakahāhā ke mahino kia kitautolu ʻa e natula mo e ivi ʻo e fuʻu ʻOtua taʻehāmaí, he ko e loto ʻo e tangata ʻoku taimi nounou pe pea ngalo ia ka ʻoku ʻi ai pe ʻa e ngaahi founga ʻoku fiemaʻu ia ke fakafoʻou ʻetau manatu, maʻae kololia ʻo e ʻOtuá, mo e lelei ki heʻetau fānaú. He ko hono fakamatuʻu ʻe he ʻOtuá ʻa e vaitafe kae aʻa atu ai ʻa e kakai ko e mana ia ʻo ʻikai fakaenatula. Ko e meʻa tatau naʻe folofola ʻaki kae aʻa atu ai ʻa e kakaí ko e mana ia, ʻo ʻikai fakaenatula. Ko e meʻa tatau naʻe folofola ʻaki ʻe Sīsuú “…ʻoku ʻikai haʻu ha tah aki he Tamaí ka ʻi heʻene fou ʻiate au” (Sn 14:6). Ko e mana ia, ʻo ʻikai fakanatula. Fou ʻia Kalaisi ki he Kenani fakalangí.

Naʻe fepalomesi ʻaki ʻa Mosee mo e haʻa Lupení, haʻa Katá mo e vaeua ʻo e haʻa Manasé te nau kau ha hū atu ki Kenani, ke tauʻi ʻa e ngaahi fili ʻo e fonua ʻo e talaʻofá, pe ko honau toko fā mano eni naʻa nau laka atu fakataha. Kuo nau ʻosi teuteu ki he taú, neongo naʻa nau maʻu tofiʻa pe kinautolu ʻi he tafaʻaki fakahahake ʻo Soataní. ʻOku fuʻu mahuʻinga kia kitautolu he ngaahi ʻahó ni ʻa ʻetau ngāue fakataha. Ko ia ʻa e fakamanatu ʻa e ʻapositolo “…ka ko e meʻa ʻi hoʻomou ʻofá ke mou nofo fetamaioʻeikiʻaki” (Kal 5:13). Pea ʻi heʻetau ngāue fetamaioʻeikí pea heʻikai leva ha ava ki he kakanó he ko e meʻa ia ʻoku fakafaikehekeheʻi ʻa ʻetau fononga ki he Kenani fakahevaní. Loto lelei Ke ke tamaioʻeiki ki ha taha he ko e sipinga ia ʻa Kalaisí (Fili 2:7)

ʻI he ʻaho ko iá naʻe hakeakiʻi ʻe Sihova ʻa Siosiua ʻi he ʻao ʻo ʻIsileli katoa, pea nau ʻapasia kiate ia, ʻo hangē ko ʻenau ʻapasia kia Mosesé. He ko kinautolu te nau fakalangilangiʻi ʻa e ʻOtuá ʻe fakalangilangiʻi kinautolu ʻe he ʻOtuá. Ko e sipinga pe ia naʻe fai ʻe Kalaisí ʻi heʻene ʻai ʻa e sinoʻi tangata ko ʻene fakatataaʻi kia kitautolu ʻa e anga hono fai ʻo e moʻui ʻa e ʻOtuá kuo ne ui ki ai kitautolú. He naʻe hakeakiʻi ia.