Sapate 10 Sepitema, 2017

Sios 4:15-19; 3:7,15; 5:9; ‘Eki 25:16,22

Siosiua 4:15-19

"15Pea folofola ‘a Sihova kia Siosiua, ‘o pehē, 16Fekau ki he kau taula‘eiki ‘oku ha‘amo ‘a e ‘A‘ake Fakamo‘oni‘anga, ke nau ‘alu hake mei Soatani. 17Pea fekau ‘e Siosiua ki he kau taula‘eiki, ‘o pehē, Mou hake mai mei Soatani. 18Pea ‘i he ‘iloange na‘e ‘alu hake mei loto Soatani ‘a e kau taula‘eiki na‘e kauala ‘a e ‘A‘ake ‘o e Kovinānite ‘o Sihova–kuo ta‘aki ‘a e ‘aofiva‘e ‘a e kau taula‘eiki, ‘o tu‘u ki he kelekele mōmoa–pea na‘e toki foki mai ‘a e vai ‘o Soatani ki hono ‘alunga, ‘o ne lōmaki‘i hono ngaahi ngutuvai kotoa ‘o hangē ko ia ‘i mu‘a. 19Pea ko e ‘alu hake ‘a e kakai mei Soatani na‘e fai ‘i hono ‘aho hongofulu ‘o e ‘uluaki māhina, pea na‘a nau fokotu‘u tēniti ‘i Kilikali, ‘i he tafa‘aki fonua ‘o Sielikō ki hahake."

Siosiua 3:7,15

"7Pea folofola ‘a Sihova kia Siosiua, Ko e ‘aho ni te u kamata ke hākeaki‘i koe ‘i he ‘ao ‘o ‘Isileli kātoa, koe‘uhi ke nau ‘ilo, hangē na‘a ku ‘ia Mōsese, ‘e pehē ‘eku ‘iate koe. 15pea ‘i he a‘u ki Soatani ‘a e kau ha‘amo ‘o e ‘A‘ake, pea lave ‘i he ngutuvai ‘a e va‘e ‘o e kau taula‘eiki na‘e kauala ‘a e ‘A‘ake (he ko e anga ‘o Soatani ‘oku ne mahua mai, ‘o lōmekina hono ngaahi ngutuvai kotoa pē lolotonga ‘a e ututa‘u)"

Siosiua 5:9

"9Pea folofola ‘a e ‘Eiki kia Siosiua, Ko e ‘aho ni kuo u fakateka meiate kimoutolu ‘a e ma‘anga faka-‘Isipite. Ko ia na‘e ui ai ‘a e hingoa ‘o e feitu‘u ko ia ko Kilikali (Teka) ‘o a‘u ki he ‘aho ni."

'Ekisoto 25:16,22

"16Pea te ke tuku ki he ‘a‘ake ‘a e fakamo‘oni ‘a ia te u ‘atu. 2Ko e potu ia te u fetaulaki ai mo koe, pea te u alea ai mo koe ‘i he funga hōifua‘anga, mei he vaha‘a ‘o e ongo selupimi ‘a ia ‘oku ‘i he funga ‘o e ‘a‘ake fakamo‘oni‘anga; ‘io, te ta alea ai ki he ngaahi me‘a kehekehe ‘a ia te u tu‘utu‘uni kiate koe ma‘a ha‘a ‘Isileli."

NAʻE FOLOFOLA ʻA SIHOVA KIA SIOSIUA. Ke fekau ʻa e kau taulaʻeiki ʻoku nau haʻamo ʻa e ʻaʻake ʻo e kovinanité ke nau ʻalu hake mei he vai ʻo Soatané pea naʻe fai ia ʻe Siosiua, pea ʻi he ʻalu hake pe ʻa e kau taulaʻeiki mei he vai ʻo tuʻu honau vaʻé ki he kelekele momoá. Kuo foki ʻa e vai ʻo fonu ʻa e ngaahi ngutuvai ʻo hangē pe ko hono natula angamahení. Pea naʻe hoko ia ko e fakamoʻoni lahi. Ko e tauʻi ʻa e vai ʻo Soatané naʻe ʻikai tupu ia mei ha meʻa fakaenatula, ka mei he ivi ʻo e lotolotonga ʻo e ʻOtuá telia ʻa hono ʻIsilelí. Pea ko e taʻu ni naʻe foki ai ʻa ʻIsilelí ki he naʻe mahino ai ko hono lotolotonga kuo hiki ia mei he vaí, kuo foki pe ʻa e vai ʻo nomolo. Pea ʻi he ʻaho koi á naʻe hakeakiʻi ai ʻe Sihova ʻa Siosiua he ko kinautolu te nau fakalangilangi ʻa e ʻOtuá, ʻe fakalangilangi kinautolu ʻe he ʻOtuá. Naʻe ʻikai ko hono hakeakiʻi pe ʻo Siosiua, ka naʻa ne ʻoange kiate ia ʻa e mafia, koeʻuhi ko ʻene fai ngāue ki ʻIsileli, pea ki he kakaí ke nau manavahē kiate ia ʻo hangē ko ʻenau manavahe kia Mosese. He ko kinautolu ʻoku nau manavahe ʻi he ʻulungaanga lelei taha, pea ki he taumuʻa lelei taha ʻoku mahino mai ko e ʻOtuá ʻoku ʻiate kinautolu pea ʻoku nau fakamuʻomuʻa ʻiate kinautolu. Ko kinautolu ʻoku maʻoniʻoni ko e hakeakiʻi moʻoni ia pea tuha mo e langilangi loua. Naʻe hoko ʻa e meʻa ko ení ʻi he ʻaho 10 ʻo e ʻuluaki mahina, ko e taʻu ia ʻe 40 talu ʻenau haʻu mei ʻIsipite, pea ʻoku toe ʻa e ʻaho ʻe 5 pea kakato. He naʻe folofola ʻa e ʻOtuá ki ʻIsileli ʻi heʻene houhau ʻoku totonu ke mou hē holo ʻi he toafá ʻi he taʻu ʻe 40. Pea ko honau ʻuluaki taʻu pe mei ai ko e taʻu ia ʻo e ikuna ʻa ʻenau hū kituʻa mei ʻIsipite. Pea ko e fakaʻosi eni ko e taʻu ai pe ʻo e ikuna ʻi heʻenau aʻu ki he kauvai ʻe taha ʻo Soataní, pea koeʻuhi ko e kotoa ʻo e 40ʻi taʻu, naʻe ʻikai ko e ngaahi taʻu ʻo e mamahi. Pea kuo ʻomai kinautolu ki Kenani ʻoku toe ʻa e ʻaho ʻe 5 pea kakato ʻa e taʻu ʻe 40. He naʻe fokotuʻutuʻu ʻe he ʻOtuá ke nau hū ki Kenani, kimuʻa ʻi he ʻaho ʻe 4 pea hoko ʻa e katoanga fakataʻu ʻo e pasová, pea ke nau teuteu ki ai ki hono kamata. ʻIo ko Kalaisi ʻa ʻetau Pasova ʻa kitautolu.