Siosiua 3:1-4
"1PEA tu‘u hengihengi hake ‘a Siosiua, ‘o nau hiki mei Sītimi, ‘o nau a‘u ki Soatani, ‘a ia mo ha‘a ‘Isileli kātoa; pea nau ‘apitanga ai ‘i he‘enau teu a‘a atu. 2Pea hili ‘a e ‘aho ‘e tolu na‘e ‘alu atu ‘a e kau ‘ōfisa ‘i he loto ‘apitanga; 3‘o nau fanongonongo ki he kakai, ‘o pehē, Ka mou ka sio ki he ‘A‘ake ‘o e Kovinānite ‘o Sihova ko homou ‘Otua, ‘oku kauala ia ‘e he kau Līvai taula‘eiki, pea te mou toki hiki mei homou ngaahi feitu‘u, ‘o muimui atu. 4Ka te mou tuku hamou vaha‘a mo ia, ‘o fe‘unga nai hono fua mo e kiupite ‘e ua afe: ‘oua te mou ofi ki ai, koe‘uhi ke mou ‘ilo ‘a e hala te mou fou ai; he kuo te‘eki ke mou laka ‘i he hala ko ē ha taimi."
Siosiua 1:10,11
"10Pea tu‘utu‘uni ‘e Siosiua ki he kau ‘ōfisa ‘o e kakai, ‘o pehē, 11Mou ‘alu atu ‘i he loto ‘apitanga, ‘o fanongonongo ki he kakai ‘o pehē, Tokonaki hamou ‘oho; he ‘i he te‘eki ke ‘osi ha ‘aho ‘e tolu te mou ‘alu atu ki he kauvai ‘e taha ‘o Soatani na, ko ho‘omou ‘alu atu ke ma‘u ‘a e fonua, ‘a ia ‘oku ‘atu ‘e Sihova ko homou ‘Otua ke mou ma‘u."
Siosiua 2:1
"1PEA fekau atu mei Sītimi ‘e Siosiua ko e foha ‘o Nuni ha ongo tangata ke mataki fakafufū, ‘o ne pehē, ‘Alu ‘o vakai ‘a e fonua, kae‘uma‘ā ‘a Sielikō. Pea na ō ‘o na hū ki he fale ‘o ha fefine fe‘auaki na‘e hingoa ko Lēhapi, ‘o na mohe ai."
‘Ekisoto 19:12
"12Pea te ke fokotu‘u ha ‘ā ki he kakai takatakai, mo ke pehē, Mou faka‘ehi‘ehi ki he ‘alu hake ki he mo‘unga, mo e lave ki hano ‘eu: he ko ia ‘oku ne lave ki he mo‘unga, te ne mātu‘aki mate."
Nomipa 10:33
"33Pea nau fononga atu mei he mo‘unga ‘o Sihova ko e vaa‘i hala ‘o e ‘aho ‘e tolu; pea ko e ‘A‘ake ‘o e Kovinānite ‘o Sihova na‘e taki ‘i he fononga ‘o e ‘aho ‘e tolu ke ha‘ao hanau mālōlō‘anga."
Teutalonome 31:9,25
"9Pea na‘e tohi ‘e Mōsese ‘a e lao ko ia, ‘o ne ‘ange ki he kau taula‘eiki ko e hako ‘o Līvai, ‘a kinautolu na‘a nau fua ‘a e ‘A‘ake ‘o e kovinānite ‘a Sihova, pea ki he kau mātu‘a ‘Isileli. 25Pea toki tu‘utu‘uni ‘e Mōsese ‘a e kau Līvai na‘e fua ‘a e ‘a‘ake ‘o e kovinānite ‘o Sihova, ‘o pehē"
KO ʻISILELI ENI ʻI HE KAUVAI SOATANÍ. He ko e vaitafe ʻoku kamata ia ofi atu ki Lepanoni ʻo haʻu ia mei ai ki he Tohi Kenasaleti (Kaleli) ʻi he maile ia ʻe onongofulu, pea ʻalu hifo leva ia mei ai ʻo aʻu ki he Tahi Masimá, ʻa ia ko e maile fakakatoa ʻe teau ʻa e vaitafe Soataní. Ko e feituʻu ko eni ke fai ai ʻa e kolosi ki Kenani, ʻoku ofi ʻi he ʻiate ʻe uanoa, ʻa hono lolotó, pea ko e vaitafé ni ʻoku ʻau malohi ʻaupito, kae tautefito ki he taimi ʻoku vaia ai ʻa e sinó ʻi he ngaahi mo„unga ʻi Maʻasi mo ʻEpeleli. Ko e tuʻunga ē ʻo e vaitafe Soataní, he ʻoku ʻikai faingofua. Ka ko e tataki ʻoku fai ʻe he ʻOtuá pea ʻoku ʻikai ha meʻa ia ʻe faingataʻa Naʻe tala ʻe Lehapi ki he ongo talafekau ʻai ʻenau fanongo ki hono fakamatuʻu ʻe Sihova ʻa e Tahi Kulokula ʻi heʻenau haʻu mei ʻIsipite, pea ko e lipooti ia ʻoku tuʻu teki kotoa ki ai ʻa e kau Kenaní, ʻi ha toe meʻa, koeʻuhi, he naʻa nau ʻamanaki ko e vaitafe Soataní ko ha maluʻi lahi ia honau fonuá pea ko e meʻa tatau kia kinautolu, ka ko ʻIsileli ʻoku nau ʻamanaki ki hono vahe ʻo e fonuá, koé ʻoku teʻeki ke hā mai ia. Naʻe fai ʻe he ʻOtuá maʻa kinautolu ʻa e ngaahi meʻa naʻe ʻikai ke nau sio kinautolu ki ai (Ais 64:4). Naʻa nau haʻu ki Soataní ʻo fakataha mai ki ai, naʻa nau ʻatu pe ʻi he tui, ki he meʻa kuo tala kia kinautolu (Vahe 1:11)
Ko e kakaí kuopau ke nau muimui ki he ʻaʻake ʻo e kovinanité te nau tukuange honau ngaahi feituʻú ʻo muimui ki ai. ʻI hení ko e kotoa ʻenau tokangá ke ʻai kotoa ia ʻi he ʻaʻake ʻo muimui ki ai ʻi he tuí. He kuopau kia kitautolu ke tau laka ʻo muimui ki he pule ʻa e folofola, pea mo e tataki ʻa e Laumalie Maʻoniʻoni ʻi he meʻa kotoa pe, pea ko e nonga ʻe ʻiate kitautolu ʻo hangē naʻe ʻi ai ʻa e ʻOtua ʻo ʻIsilelí. Kuopau ke nau muimui mamaʻo pe ki he kau taulaʻeiki pe ʻo hangē ko ʻenau muimui ʻa kinautolu kia Kalaisí. He ʻia Kalaisi ʻoku hū ʻiate ia mo loto lahi ʻo kau ʻi heʻene kau maʻoniʻoni, taʻe ʻi ai haʻatau meʻa ʻe fai ka ko ʻetau tui falala pe kiate ia ʻi he ngāue maʻongoʻonga naʻá ne fai ʻo tau moʻui ai.
No comments:
Post a Comment