Monite 26 Sept, 2016

Nomipa 15:22-26; Levitiko 4: 2,14,20 

Nomipa 15:22-26

“(22) Pea ka ai ha‘amou laka hala, ‘o ‘ikai te mou fai hono kotoa ‘o e ngaahi tu‘utu‘uni ko ‘eni, ‘a ia kuo folofola‘aki mai ‘e Sihova kia Mōsese, (23) ‘io, ‘a e ngaahi me‘a kehekehe kuo tu‘utu‘uni ma‘amoutolu ‘e he ‘Eiki, ‘o fakafai ‘ia Mōsese, ‘o kamata mei he ‘aho na‘a ne tu‘utu‘uni ai, ‘o fai atu ki homou ngaahi to‘utangata; (24) pea kapau ko e fai ta‘e‘ilo, ‘o puli mei he fakataha, pea ‘e toki feia ‘e he fakataha ha pulu mui ko e feilaulau-mōifua, mo‘o ngangatu fakahōifua kia Sihova, ai mo hono kinaki mo hono kava, ‘o hangē ko e konisitūtone, pea mo ha kosi tangata mo‘o feilaulau-angahala. (25) Pea ‘e fai ‘e he taula‘eiki ha fakalelei ma‘a e fakataha kātoa ‘o ha‘a ‘Isileli, pea ‘e fakamolemole kinautolu; he ko e matavalea ia, pea kuo nau ‘omi ‘enau kōpano ko e feilaulau tutu kia Sihova, mo ‘enau feilaulau-angahala foki kuo nau ‘omi ki he ‘ao ‘o Sihova, ko e holo ‘o ‘enau matavalea. (26) Pea ‘e fakamolemole ‘a e fakataha kotoa ‘o ha‘a ‘Isileli mo e muli ‘oku ‘āunofo kiate kinautolu; he ko e me‘a ki he fakataha ko ‘enau matavalea pē.”

Levitiko 4:2, 14, 20

"(2) Kapau ‘e hia ta‘e‘ilo ‘e ha taha, ‘i he ngaahi me‘a na‘e tu‘utu‘uni ‘e Sihova ke ‘oua ‘e fai, ka kuo ne hanga ‘o fai ha me‘a.

(14) pea ka ‘iloa ‘a e angahala kuo nau fai, pea ‘e toki ‘omi ‘e he Fakataha ha pulu mui ma‘anau feilaulau-angahala, pea te nau taki mai ki he mata Tēniti Fe‘iloaki‘anga.

(20) Pea ko e me‘a te ne fai ki he pulu; hangē ko ia na‘a ne fai ki he pulu feilaulau-angahala ko ē, ‘e pehē ‘ene fai ki heni: pea ‘e fai fakalelei ma‘anautolu ‘e he taula‘eiki, pea ‘e fakamolemole kinautolu."

Ko e feilaulau ma’ae matavaleaˊ. Ka ai ha’amou laka hala ‘o ‘ikai te mou fai ‘a e tu’utu’uni ko ‘eni´, ‘e fai leva ‘a e ngaahi feilaulau ko e fakafofonga ia ‘o e kakaiˊ, he ‘oku malava ma’u pë, ke ‘i ai ‘a e laka hala, ko e matavalea, pë angahala ta’e’ilo ‘i he mo’ui ‘a e kakai´. ‘Oku mahino ki he kau Siuˊ ‘a e tauhi ‘aitoli, pë ko e lotu ‘oku hala, ‘o fou mai ia ‘i he hala, ‘o ‘enau kau faiako´. Ko e fa’ahinga me’a pehë´, ‘e lau ia ko e angahala fakafonua, he kuo nau tukupä, ke fai ta’e’ilo, pea fai anga’aki ‘a e hala ko ia´, ‘e he fakataha´ kotoa, ko e sino ia ‘o e kakaiˊ ‘a ë ‘i he veesi 25. Pea fai ‘a e fakalakalaka ‘o taimi´, pea e’a hake ‘a e fehalaaki´ mo e laoˊ ‘a e me’a ‘oku nau fai´. Pea kuopau leva ke fai ‘a e feilaulau ma’ae fakataha´ fakakätoa, pea ‘e fakamolemole leva ‘o ‘ikai tautea. Ko hono taau ia, ‘o e fakamaau’anga fakafonua´. 

Ko kitautoluˊ kotoa pë, ko e kau angahala, ka na’e ‘ikai ke tau ‘ilo ki ai. Na’a tau fai ‘a e angahala kotoa, ‘ikai te tau ‘ilo ko e angahala ia. “Pea ko e angahala ko ia´, ‘oka kakato ‘oku ne fä’ele’i ‘a e mate´” (Semisi 1:15). Pea ko e ola faka’osi ia ‘o e angahala´, ‘i he’etau mo’uiˊ, ko e taimi ko ë, ‘e ‘osi ‘a hotau taimi ‘i mämani´, pea te tau mate. Pea ko ‘etau mavahe ia mei he ‘Otua´, ‘o kapau ‘oku ‘ikai ke tau mo’ui. Ko e angahala´ ‘oku mata si’isi’i, mo faingofua, ka ko hono olaˊ ‘oku pehë ia, “He ko e totongi ‘o e angahalaˊ ko e mate” (Loma 6:23). Ko e feilaulau ma’a hotau fakamo’uiˊ kuo ‘osi fai ‘e he ‘Eiki ko Sīsū Kalaisi´, ‘i he funga kolosi´. Pea hili ‘Ene fai iaˊ na’a Ne talamai “Kuo ‘osi” (Sione. 19:30). Ko hotau fakamo’ui´, kuo kakato, pea kuo ‘osi. He’ikai ke tau lava, ‘o fakamo’ui kitautolu. Ko Sīsū tokotaha pë, koe’uhi´, kuo ‘osi ‘a e ngäue ki hotau fakamo’ui´. Pea he’ikai ha me’a, te tau lava ‘o toe tänaki ki ai, ko e fiema’u pë, ke tau tui kiate Ia, ko hotau Fakamo’ui´, pea te tau mo’ui (Ngaue 16:31). Kuo ke falala kiate Ia? Pea neongo na’a tau angahala, ko ‘etau ta’e’ilo ki ai, kae fakafeta’i kuo fai ‘e Kalaisi, ‘etau feilaulau´, pea tau hao ai mei he ‘auha´.