Sapate 11 Sept, 2016

Nomipa13:4-16; ‘Ekisoto17:4; Teutalonome1:26,27; 9:28; 10:13; Nehemaia 9:17; Ngaue 7:39; Hepelu 3:8 

Nomipa13:4-16

“(4) pea ko honau hingoa eni: mei he matakali ‘o Lūpeni, ko Samua ko e foha ‘o Sākuli. (5) Mei he matakali ‘o Simione, ko Sāfati ko e foha ‘o Holi. (6) Mei he matakali ‘o Siuta, ko Kēlepi ko e foha ‘o Sīfune. (7) Mei he matakali ‘o ‘Īsaka, ko ‘Īkali ko e foha ‘o Siosifa. (8) Mei he matakali ‘o ‘Ifalemi, ko Hosea ko e foha ‘o Nuni. (9) Mei he matakali ‘o Penisimani, ko Pāleti ko e foha ‘o Lafu. (10) Mei he matakali ‘o Sepulone, ko Katieli ko e foha ‘o Soti. (11) Mei he matakali ‘o Siosifa, ‘a e matakali ‘o Manase, ko Kati ko e foha ‘o Susi. (12) Mei he matakali ‘o Tani, ko ‘Amieli ko e foha ‘o Kēmali. (13) Mei he matakali ‘o ‘Āseli, ko Sētuli ko e foha ‘o Maikeli. (14) Mei he matakali ‘o Nafitalai, ko Nā‘api ko e foha ‘o Vōfesi. (15) Mei he matakali ‘o Kata, ko Keueli ko e foha ‘o Maki. (16) Ko e ngaahi hingoa eni ‘o e tu‘unga me‘a na‘e fekau atu ‘e Mōsese ke asiasi ‘a e fonua. Pea ui ‘e Mōsese ‘a Hosea ko e foha ‘o Nuni ko Siosiua.”

Ko e asiasi ki Kēnani´. Ko e toko hongofulu mä ua´, ko e toko taha mei he matakali ‘e 12 ‘o ‘Isileli´. Tokanga’i angeˊ ko e tokotaha mei he matakali ‘o ‘Ifalemi´ ko Hōsea (v.8) ko e foha ia ‘o Nuni, na’e liliu ‘e Mosese ia, hono hingoa´ ko Siosiua (v.16). Ko e minisitä ia ‘a Mosese´, pea ko e Seniale ia, ‘o e kongakau na’e fekau’i atu, ke nau hanga ‘o fakafepaki’i ‘a ‘Amaleki´. Ko e Hoseaˊ ‘oku ‘uhinga ia ko ha lotu ma’ae fakamo’ui “FAKAMO’UI AU”. Ko Siosiua´ ‘oku ‘uhinga ia, ko ha palomesi ‘o e fakamo’uiˊ te ne fakamo’ui, ko e tali ia ki he lotu´. ‘Oku väofi ‘a e felave’i ‘a e ngaahi lotuˊ mo e ngaahi palomesi´. Ko e ngaahi lotuˊ ‘oku nau fakalotoa, ‘a e ngaahi palomesi´ ke hoko. Ko e ngaahi palomesiˊ, ‘oku taki mo fakalotolahi’i, ‘a e ngaahi lotu. Ko Sīsūˊ, ko e hingoa tatau pë ia, mo e Siosiuaˊ, mo e huafa ‘a hotau ‘Eiki ko Kalaisi´. Ko Siosiua´ ko e taipe ia, he ko ia na’a ne fetongi ‘a Moseseˊ, pea ko e kapiteni ‘o e tau ‘o ‘Isileliˊ, ko ia na’a ne ikuna ‘a Kenani´. Na’e toe ‘i ai ‘a e hingoa tatau ‘e taha, ko ha toe taipe pë ia kia Kalaisi (Sakalaia 6:11). Na’e hoko ‘a Siosiua ko e Fakamo’ui ia, ‘o e kakai ‘a e ‘Otua´, mei he mafai ‘o Kenaniˊ, ka ko Kalaisiˊ ko e Fakamo’ui ia ‘o e kakai ‘a e ‘Otuaˊ mei he mafai ‘o Heli´. 

Ko e lisi ‘o e hingoa ko ‘eni e hongofulu ma ua´, mei he matakali ‘e 12 ‘o ‘Isileli´, ‘oku ‘ikai ko e ‘ai pë ke tu’u ai honau hingoaˊ, ka ko e kau tangata, kuo nau mateuteu fakasino, mo fakalaumälie, ke fai ‘a e ngäue, kuo ui kinautolu ki aiˊ. ‘Oku ‘ikai ko e kau taki pë, ka ko e kau sotia lelei, ‘i he tafa’aki ‘a e ‘Eikiˊ. Pea ‘oku tu’unga pehë, mo e mo’ui ‘a e kau kalisitiane´. Ko ‘etau tu’u´ ko e kau sotia ‘a Kalaisi, ko e ‘Eikitau, he ‘oku ‘i ai ‘a e fili fiu ngata’a he tau’i he tangata. Kae ‘ikai te ke tu’u ‘o tau’i ho kakano´ mo māmani, tā ‘e fa’iteliha ‘a e fili´ ia ‘i ho’o mo’uiˊ, pea ko e lotu ia ‘e ‘ikai hano aonga ‘ona ki ho’o mo’ui´. Tu’u he mafai ‘o e Laumālie Mā’oni’oni´ ‘o tau’i ‘a e filiˊ, koe’uhi´ ko e ‘Eiki´ mo Hono Ngeia´.