Tusite 27 Sept, 2016

Nomipa 15: 27 – 31; Levitiko 4:27, 35; 5:1; Teutalonome 17:13; 2 Samamiuela 12:9; Saame 19:13; Isikeli 18:20 

Nomipa 15:27-31

“(27) Pea ka kuo hia ta‘e‘ilo ‘e ha toko taha, pea te ne ‘omi ha kosi fefine ‘oku taha ta‘u ko ‘ene feilaulau-angahala. (28) Pea ‘e fai ‘a e fakalelei ‘e he taula‘eiki ma‘a e laumālie ‘oku matavalea, he‘ene hia ta‘e‘ilo ‘i he ‘ao ‘o Sihova, ke lava hono fakalelei; pea ‘e fakamolemole ia. (29) ‘E taha pē ho‘omou lao ki he tupu‘i fonua ‘o ha‘a ‘Isileli pea ki he muli ‘oku ‘āunofo kiate kimoutolu, ki ha taha kuo hia ta‘e‘ilo. (30) Ka ko e toko taha ‘oku fai ha me‘a ko ha‘ane paetaku, pe ko e tupu‘i fonua ia, pe ko ha muli, ‘oku ne talakaa‘i ‘a Sihova, pea ‘e tu‘usi ‘a e toko taha ko ia mei he lotolotonga ‘o hono kakai. (31) Koe‘uhi ā kuo ne ta‘etoka‘i ‘a e folofola ‘a Sihova, pea kuo ne maumau ‘ene fekau: ‘e mātu‘aki tu‘usi ‘a e laumālie ko ia: te ne fua hono kovi.” 

Levitiko 4:27,35

"(27) Pea kapau ‘e hia ta‘e‘ilo ‘e ha taha ‘o e kakai tu‘a, he‘ene fai ha taha ‘o e ngaahi me‘a na‘e tu‘utu‘uni ‘e Sihova ke ‘oua na‘a fai, pea kuo ne halaia

(35) 35pea te ne hae mai hono ngako kotoa, ‘o hangē ko ‘ene hae ‘a e ngako ‘o e lami feilaulau-‘ofa; pea ‘e tutu ia ‘e he taula‘eiki ‘i he ‘ōlita, fakataha mo e ngaahi feilaulau ‘a Sihova fai‘aki ‘a e afi: pea ‘e fai ‘e he taula‘eiki ‘a e fakalelei ma‘ana ‘i he angahala kuo ne fai, pea ‘e fakamolemole ia."

Levitiko 5:1

"(1) KA ai ha taha kuo ne hia he‘ene fanongo ki he fakafuakava, ka ko e fakamo‘oni ia (pe kuo ne sio ki ai, pe kuo ne ‘ilo‘i); kapau ‘e ‘ikai te ne tala, te ne fua hono kovi."

Teutalonome 17:13

"(13) pea ‘e fanongo ki ai ‘a e kakai kotoa, pea te nau manavahē, ‘o ‘ikai te nau toe fielahi."

2 Samiuela 12:9

"(9) Ko e hā ai kuo ke ta‘etoka‘i ‘a e folofola ‘a Sihova, ke fai ‘a e me‘a ‘oku kovi ‘i hono ‘ao? Ko ‘Ūlaia Heti kuo ke taa‘i ‘aki ‘a e heletā, pea ko hono uaifi kuo ke to‘o mo‘ao ‘unoho, ka ko e tangata kuo ke fakapoongi ‘aki ‘a e heletā ‘a ha‘a ‘Āmoni. "

Saame 19:13

"(13) Ta‘ofi foki ho‘o tamaio‘eiki mei he ngaahi angahala ‘oku fai pau‘u: Ke ‘oua na‘a nau pule‘i au: Te u toki haohaoa ai, ‘O ‘ata‘atā mei he angahala lahi."

'Isikeli 18:20

"(20) Ko e laumālie ‘oku angahala ko ia ia ‘e mate; ‘e ‘ikai kau ‘a e foha ‘i he fua ‘a e kovi ‘a ‘ene tamai, pea ‘e ‘ikai kau ‘a e tamai ‘i he fua ‘a e kovi ‘a hono foha: ko e mā‘oni‘oni ‘a si‘i mā‘oni‘oni ‘e hoko kiate ia, pea ko e pau‘u ‘a e pau‘u ‘e hoko kiate ia"

Ko e ngaahi angahala, kuo fai ta’e’ilo ki ai, ‘a e fakataautahaˊ, ko ia ‘oku fiema’u ha fakalelei, ma’a kinautolu. ‘Oku kau ki ai, mo ia kuo ne ‘ilo ki he finangalo ‘o e ‘Otua´, kae ‘ikai te ne fai ia ‘e ia. Na’e lotu foki ‘a Tevita, ke faka’atā ia, mei he ngaahi angahala kuo ne fai ‘i he liloˊ mo e ta’e’ilo´ (Saame 19:12, 13). Ko e ngaahi angahala, ‘oku fai ta’e’ilo´ ‘e fakamolemole ia, ‘o fou ‘ia Kalaisi, ko e Feilaulau Lahi. ‘I He’ene foaki Ia´, ko e feilaulau tä-tu’otaha ‘i he funga kolosiˊ, na’e Ne fai ai ‘a e lotu ko ‘eni. “ ‘E Tamai, fakamolemole ‘a kinautoluˊni, he ‘oku ‘ikai ke nau ‘ilo ‘a e me’a ‘oku nau fai”. Na’e lave mo Paula ‘o felave’i mo e laoˊni, ‘o e angahala ta’e’ilo ki ai he’ene pehë. “Neongo ko e tokotaha au na’e laukovi ki he ‘Otua ‘i mu’a, mo fakatanga mo pau’u, ka na’e fai meesi kiate au, koe’uhi na’a ku fai ta’e’ilo pë he ko e ta’etui” (1 Timote 1:13). Na’e kau ki he laoˊni ‘a e kau muli na’a nau ‘i he lotolotonga ‘o ha’a ‘Isileli´. 

‘Oku fakatau’ataina ‘e Sīsū Kalaisi, ‘a e kau angahalaˊ mei he popula ki he angahalaˊ, ko e angahala ta’e’ilo ki ai. ‘Oku fakamanatu mai hotau tu’unga natula angahala´, pea mo e fiema’u ha feilaulau fakalelei, ma’ae tokotaha ko ia´. Na’e ‘i ai ‘a e tangata popula, ‘i he Tohitapu´ ko ‘Onesema, na’a ne popula kia Filimone, pea ne hola mei ai, ki hono koloˊ ‘oku ‘iloa he ‘ahoˊni ko Toake. Pea ne ‘alu mei ai ki Loma, ko ‘ene lahiˊ ke ne puli ai pë. Ko e mo’ui ‘o ha popula ko e me’a fakalotomamahi kiate ia. Ka tau ki’i sio ange´, ‘Oku popula kotoa pë, na’e fä’ele’i kotoa pë kitautolu, ko e popula. ‘O hangë ko ‘Onesema´, na’e ‘i he malumalu ia ‘o e pule ‘a Filimone´, na’e fä’ele’i kitautolu mo mo’ui ‘i he malumalu ‘o e pule ‘a e angahala´. Kapau he’ikai ke tau tafoki, mei he’etau angahalaˊ mo tui falala kia Sīsū Kalaisi, ko hotau fakamo’ui. He’ikai ke tau tau’ataina, te tau kei popula pë. Ko e me’a makehe na’e hoko kia ‘Onesemaˊ, na’a ne fe’iloaki ai ‘i he pilisone´, mo Paula, ko e tokotaha muimui ‘o Sīsū Kalaisi. Pea na’e hoko ai pë, ‘a ‘Onesema ko e kalisitiane, pea ui ai pē ‘e Paula ko hono foha (Filimone v.10). Ko ‘ene tamai fakalaumālie, pea ne hoko ko e sevāniti, (Filimone v.13). Ko kitautolu ko e kau pōpula ki he angahala´, pea ‘i he’etau falala kia Kalaisi´, kuo tau hoko ai ko e ngaahi foha ‘o e ‘Otua´, pea fakahaa’i ‘etau ‘ofa´, kuo tau hoko ko e kau sevāniti ‘a Sīsū.