Nomipa 15:1-7
“(1) PEA folofola ‘a Sihova kia Mōsese, ‘o pehē, (2) Lea ki ha‘a ‘Isileli, ‘o tala kiate kinautolu, Ka mou ka hū ki homou fonua nofo‘anga, ‘a ia ‘oku ou foaki kiate kimoutolu, (3) pea ‘oku mou teu fai ha feilaulau tutu kia Sihova, pe ko ha feilaulau-mōifua, pe ko ha tāmate manu pē, ko e fakaai ha tukumo‘ui, pe ko e me‘a‘ofa, pe ko ha fai ha kātoanga tu‘utu‘uni, ke feia ha ngangatu fakahōifua kia Sihova ‘aki ha manu mei he fa‘ahinga ko ē mo ē: (4) pea ko ia ‘oku ‘a‘ana ‘a e kōpano te ne ‘omi ki he ‘Eiki hono kinaki, ko e vahe hongofulu ‘o e ‘elito‘i mahoa‘a kuo natu ‘aki ‘a e vahefā ‘o e hina lolo. (5) Ko e uaine foki mōno kava: te ke teuteu ‘a e vahefā ‘o e hina ki he feilaulau-mōifua, pe ko e tāmate manu, ki he lami takitaha. (6) Pea kapau ko e sipi tangata, te ke teuteu mōno kinaki ‘a e vahe hongofulu ‘e ua ‘o e ‘elito‘i mahoa‘a, kuo natu ‘aki ‘a e vahetolu ‘o ha hina lolo: (7) pea te ke ‘atu mōno kava ‘a e vahetolu ‘o e hina uaine mo‘o ngangatu fakahōifua kia Sihova.”
Nomipa 28:12
"(12) pea ko e vahehongofulu ‘e tolu ‘o e ‘elito‘i mahoa‘a, kuo natu ‘aki ‘a e lolo, ki he pulu takitaha mōno kinaki; pea ko e vahehongofulu ‘e ua ‘o e ‘elito‘i mahoa‘a, kuo natu ‘aki ‘a e lolo, ki he taha‘i sipi tangata mōno kinaki"
Levitiko 1:2,3
"(2) Lea ki ha‘a ‘Isileli, mo ke pehē kiate kinautolu, Ka ‘i ai ha tangata ‘iate kimoutolu te ne ‘oatu ha kōpano ki he ‘Eiki, te ne fai ‘ene kōpano mei he‘ene fanga manu, mei he fanga pulu, pe mei he fanga sipi. (3) Kapau ko e feilaulau-mōifua ‘a ‘ene kōpano, ko ha pulu, te ne ‘atu ha manu tangata ‘oku ‘ikai hano mele! te ne ‘atu ia ‘i he matapā ‘o e Tēniti Fe‘iloaki‘anga, ke hōifua ai ‘a e finangalo ‘o e ‘Eiki"
Levitiko 6:14
"(14) Pea kapau ko ‘ene kōpano ‘oku fai mei he manupuna, ka ko e feilaulau-mōifua, te ne fai‘aki ‘a e kulukulu, pe ha lupe mui."
Levitiko 7:16
"(16) Ka ‘o kapau ko e tukumo‘ui ‘ene kōpano, pe ko ha feilaulau-lotolelei, ‘e kai ‘i he ‘aho ‘oku ne fai ai ‘ene feilaulau, pea ‘e kai ‘i he ‘apongipongi ‘a e me‘a ‘oku toe"
Levitiko 22:18,21
"(18) Lea kia ‘Ēlone mo hono ngaahi foha, pea mo ha‘a ‘Isileli kātoa, pea tala kiate kinautolu, Ka ai ha taha ‘i ha‘a ‘Isileli, pe ‘i he muli ‘oku nofo mo e ‘Isileli, ‘a ia ‘oku ne ‘atu ha‘ane kōpano, (pe ko ha‘anau tukumo‘ui, pe ko ha‘anau me‘a‘ofa pē ‘a e kōpano ko ia, ‘a ia ‘oku nau ‘atu kia Sihova), ko e feilaulau-mōifua. (21) Pea ko ia ‘oku ne ‘atu ha feilaulau-‘ofa kia Sihova ke fakaai ‘ene tukumo‘ui, pe ke feia ha me‘a‘ofa; pe ko ha pulu pe ko ha sipi ka ‘e haohaoa pē kae tali: ‘e ‘ikai ‘i ai ha momo‘i mele."
Levitiko 23:10
"(10) Lea ki ha‘a ‘Isileli, pea tala kiate kinautolu, Ka mou ka hū ki he fonua ‘a ia ‘oku ou ‘atu kiate kimoutolu, ‘o mou utu ai hamou ta‘u, pea te mou toki ‘omi ki he taula‘eiki ‘a e ‘ū koane polopolo ‘o homou ta‘u"
“KA MOU KA HŪ KI HOMOU FONUA NOFO’ANGA´”. Ko e folofola eni, ‘a Sihova kia Mosese, ke tala ki ‘Isileliˊ. Ko e ‘Otuaˊ na’e ‘ikai te Ne fakaikai’i kotoa ‘a ‘Isileli mei Kenani, tu’unga ‘i he’enau fai angahala´. Ka ko ‘enau fänauˊ te nau hü ki he fonua ko Kenaniˊ, ka ko ‘enau mätu’a, he’ikai te nau hü kinautolu. Ngaahi mätu’a, tokanga ke fakapapau’i, ‘a e Kenani fakalangiˊ ‘ia Kalaisi, he ko e tö ‘i hono ma’u´, he’ikai ha toe matapä, ke ke hü ai ki Hevani, ki he Tamai´ (Sione 14:6). Ko e vahe ko eni´, ‘oku tokanga ai ‘a e ‘Otuaˊ ke fai ‘o e foakiˊ mo e feilaulau´, pea ‘oku ‘ikai ko ha tu’utu’uni pë, ki he kakaiˊ ‘o fekau’aki mo ‘enau lotu´, mo e hü ki he ‘Otua´, ka ko ‘Ene palomesi. Ko e kakai te nau hü ki he fonua na’a Ne palomesi ki ai, kia ‘Epalahame´, ko e ‘Otua mohu ‘i he fai meesi, ‘a hotau ‘Otua´ ki Hono kakai, neongo, ko e kau angahala kotoa pë, ka kuo Ne meesi ‘aki mai ‘a Kalaisi, ke tau mo’ui ai, ‘i He’ene ‘ofa ‘ata’atä pë ‘A’ana.
Ko e feilaulau´, pë tukumo’ui ‘aki ‘a e tenga’i ‘akau´, na’e ngäue’aki ia ‘e ‘Isileli ‘i he feilaulau´, ‘oku na mahu’inga tatau pë, mo e feilaulau ‘aki ‘a e monumanu´. Ko e ‘elito’i mahoa’a´, pë ko e mahoa’a lelei´, ‘oku mahu’inga ange ia, ‘i he mahoa’a ‘oku ngäue’aki angamaheniˊ, pea natu fakataha ‘aki ia mo e lolo ‘olive. Ko e me’a mahino, ‘oku fakahaa’i mai, mei he tukumo’ui ko ‘eniˊ, ko e “lelei taha” ‘e lava ke ngäue’aki, ki he katoanga lotu mo e hü ki he ‘Otuaˊ. ‘Oku fiema’u ‘e he ‘Otuaˊ ‘a e leleitahaˊ, ko ‘etau lelei taha´ ko Kalaisi. Tui falala kiate Ia, pea te Ne ‘omi ‘a e lelei taha´, ke fakahoifua ki hotau ‘Otuaˊ.
Ko e feilaulau inuˊ. Na’e ngäue’aki ‘a e uaineˊ ki he feilaulau inu´, (veesi.7) ‘oku ‘ai fakataha, mo e feilaulau tutu ‘o e kosi, sipi, lami pë ko e pulu, pea ‘oku hua’i leva ‘a e uaineˊ ki he ‘olita´. Ko e tokotaha lotuˊ, ‘oku ne huhua atu, ‘a e me’a ‘oku mahu’inga lahi. Pea mei heni, ‘oku ‘omai ‘a e lahi taha´ ‘i he ngaahi feilaulau keheˊ, ‘oku ne fakafofonga’i mai ‘a e tau’ataina ‘a e kau lotuˊ ‘i he ‘ao ‘o e ‘Otua´. Ko ia pē ‘a e me’a mahu’inga taha´, ka ko hotau fakatau’atāina´, na’e fai ‘e Sīsū Kalaisi ‘i He’ene pekia ‘i he kolosi´, ‘o Ne ‘ave ai ‘a e pōpula ki he angahala´. Ka tau tau’atāina, mo mā’oni’oni, ‘i he ‘ao ‘o Sihova, ko hotau ‘Otua ‘Ofa’anga´. Nofo ai, he ko ‘etau mata’ikoloa´ Ia ‘o ta’engata.
No comments:
Post a Comment