Tu'apulelulu 9 Novema, 2017

Siosiua 15:20-32; Senesi 3:21; 1 Sam 27:6

Siosiua 15:20-32

"20Ko e tofi‘a eni ‘o e matakali ‘o ha‘a Siuta, mo honau ngaahi fāmili. 21Pea ko e ngaahi kolo taupotu ‘o e matakali ‘o ha‘a Siuta ki he tafafonua ‘o ‘Ītomi ‘i he feitu‘u ko Tonga, ko Kapesili, mo ‘Ēteli, mo Siakuli; 22mo Kina mo Tīmona, mo ‘Ātata: 23mo Kētesi, mo Hasoa, mo ‘Itinani: 24ko Sifi, mo Tēlemi, mo Pealoti; 25mo Hasoa-fo‘ou, mo e ngaahi kolo ‘o Hesiloni (ko Hasoa ia): 26ko ‘Āmami, mo Sema, mo Mōlata; 27mo Hasa-kata, mo Hesimoni mo Pete-pāleti: 28mo Hasa-sūhali mo Peasipa, mo Sisiotia; 29ko Pā‘ala, mo Simi, mo ‘Āsimi; 30mo ‘Elitolati, mo Kēsili, mo Hoama; 31mo Sikilaki, mo Matemana, mo Sanesana; 32mo Lepaoti, mo Silehimi, mo ‘Eni, mo Līmoni: ko e kotoa ‘o e ngaahi kolo ko e uofulu mā hiva, pea ai mo honau ngaahi vilisi."

Senesi 3:21

"21Pea na‘e ngaohi ‘e Sihova ‘Elohimi ma‘a ‘Ātama mo hono uaifi ‘a e ngaahi kofu kili‘imanu, ‘o ne ‘ai kiate kinaua."

1Samiuela 27:6

"6Pea ‘ange ki ai ‘e ‘Ākisi ‘i he ‘aho ko ia ‘a Sikilaki: ‘a ē ā ‘oku kau ai ‘a Sikilaki ki he ngaahi Tu‘i Siuta, ‘o a‘u ki he ‘aho ni."

Sios 15:20 “Ko e tofiʻa eni ʻo e matakali ʻo haʻa Siutá, mo honau ngaahi fāmilí”. Ko e lisi eni ʻo e ngaahi kolo naʻe ʻi he tofiʻa ʻo e matakali ʻo Siutá, he naʻe konga ʻe fā, pea ko e konga ʻuluaki eni. Ko e kolo fakakatoa ʻe teau hongofulu ma fā, pea ʻi he tafaʻakí ʻa e ngaahi vilisi pē. ʻOku ʻikai ke kau ʻi heni ʻa e ngaahi kolo naʻe foaki ia ki he matakali ʻo Simione. Neongo ko e lahi taha ʻi he ngaahi kolo ko ení naʻe iiki pē, ka ko e fonuá kuopau pē hono manakoá. Ko e hingoa pe eni ʻo e ngaahi kolo, mo honau lahi ʻi he kalasi kehekehe pē. Ko e hingoa ʻo e kolo ʻoku tolungofulu mā valu, ka ʻoku pehē naʻe uahiva pē, naʻe ʻi he tofiʻa ʻo Siutá. Ko e hiva ia ai naʻe hili hono fakamaaú, pea naʻe hiki leva ʻa e ngaahi kolo ia ko iá, ʻo kau ki he tofiʻa ʻo Simione ʻo hangē ko ia ʻoku hā ʻi he vahe 19:2. Ko Siuta eni mo Kelepi kaeʻumaʻā ʻa Simione kuo tau lave ki ai mo honau ngaahi matakali ʻi heʻenau maʻu honau ngaahi tofiʻa ʻi he fonua ko Kenaní. Ko e fehuʻí leva, naʻe fili ʻe he kakaí honau ngaahi tofiʻá? Kapau ko ia, heʻikai ha toe tālaʻa, ʻi he feʻauhi mo taufaʻao, ka ko e ʻOtuá naʻá ne ʻoange ʻa e fonuá pea ko e ngaahi matakali naʻa nau tukulolo ki hono finangaló. “Ko hoʻo makehe atú na, ko e ngāue ʻa hai?” Ko e fehuʻi ia ʻa Paula. “He ʻoku ʻi ai haʻo meʻa naʻe ʻikai foaki?” (1 Kol 4:7) Pea naʻe pehē ʻe Sione Papitaiso. “Tala ʻe hai ʻoku ala maʻu ha meʻa ʻe ha tangata, ka ʻi hono foaki kiate ia mei langi” (Sn 3:27) ʻI hoʻo meheka ʻi he ngaahi aʻusia mo e poto ʻo e kakai kehe, kuo ngalo ʻiate koe ʻa e tefitoʻi moʻoni fakalaumalie ko ení. Pea ʻi he taimi ʻokú ke lāunga ki he ʻOtuá ʻi he ngaahi meʻa ʻoku ʻikai te ke aʻusia, pea ʻikai te ke fakafetaʻi kiate ia, ʻi he meʻa ʻokú ke ʻi ai. ʻOku fiemaʻu moʻoni ko ia ke ke toe fanongo kia Paula mo Sione Papitaiso, ke mahino kiate ia ʻoku ʻikai ha meʻa ʻe taha ʻe hokonoa, ka ʻoku mei he ʻOtuá tokotaha pē. Tali ʻa e meʻa kotoa ʻoku hoko atu he ʻaho takitaha.