Tokonaki 25 Novema, 2017

Siosiua 19:17-23; Fkm 4:6,12; 1 Sam 28:4; 2 Tuʻi 4:8; Saame 89:12

Siosiua 19:17-23

“17Ko hono fā ‘o e talotalo na‘e tonu kia ‘Īsaka, ‘io, ki ha‘a ‘Īsaka mo honau ngaahi fāmili. 18Pea na‘e tu‘u ‘i honau vahe ‘a Sisilili, mo Kesuloti mo Sūnemi: 19mo Hafalaimi, mo Sioni, mo ‘Anahalati: 20mo Lāpiti, mo Kisioni, mo ‘Ēpesi: 21mo Lēmeti, mo ‘Eni-kānimi, mo ‘Eni-hata, mo Pete-pāsisi: 22pea lave ‘a e kau‘ā ki Tepoa, mo Sahasuma, mo Pete-semesi: pea na‘e tū‘ulu honau kau‘ā ki Soatani: ko e kolo ‘e hongofulu mā ono mo honau ngaahi vilisi. 23Ko e tofi‘a ia ‘o e matakali ‘o ha‘a ‘Īsaka mo honau ngaahi fāmili: ko honau ngaahi kolo ia mo honau ngaahi vilisi.”

Sios 19:17 “Ko hono fā ʻo e talotaló naʻe tonu kia Isaka, ʻio ki he haʻa Isaka mo honau ngaahi fāmilí”. Ko e talotalo hono fā eni naʻe fakahoko ʻi Sailo ki he matakali ʻe fitu ʻo ʻIsilelí, naʻe valokia ʻe Siosiua, ʻi heʻenau faituai ke nau kau he vahe tofiʻa ʻi he fonua ʻo e talaʻofá. Pea naʻe tonu ʻa e talotalo hono faá kia Isaka mo hono fāmilí. Ko Isaká ko e tama ia hono nima ʻa Liá. Ko e ʻuhinga ʻo e Isaka “ʻOku ai ha totongi” ʻi he pehē ʻe Lia kuo totongi ʻe he ʻOtuá ʻa ʻene ʻoatu ʻene kaunangá ki hono husepanití (Sen 30:18). Ko e tapuaki naʻe fai ʻe Sekope kia Isaka naʻá ne pehē, “Ko Isaka ko e asi malohi. ʻOku tokoto ʻi he vahaʻa lotoʻasipi. Pea ko hono fonuá ʻoku fakaʻofoʻofa..”(Sen 49:14,15) Ko e kau tangata ʻo e haʻa Isaká ʻoku nau malohi mo faʻa ngāue, kae tefito ki he fangamanu ʻo hangē ki he ʻasi, te ne faʻa kataki ʻi he fua kavenga, pea ko hono ʻapí ʻoku fakaʻofoʻofa. Ko Isaká ko ʻene vakai ki ha meʻa ke lelei naʻe punou ki lalo hono umá ke fua hake. ʻOkú ne tuku kia kitautolu ʻa e mata ʻo e tuí, ke tau sio ki he mālōlō fakalangi ke lelei, pea ko e fonua ʻo e talaʻofá, ke fakaholomamata hono fiefia, pea ke tau ʻai ʻetau ngaahi ngāue lolotonga ke faingofua, pea ke tau fakalotolahiʻi ʻa e kakai kehe, ke punou ki lalo hotau umá kia kinautolu. Ko Isaka, naʻá ne kakapa siʻisiʻi pe ki he ngaahi meʻa fakapuleʻangá mo fakakautaú. Ko e matakali ko ení naʻe tātātelau ha lave kia kinautolu ʻi he hisitoliá. Pea ko honau tofiʻa eni naʻe ʻi ai ʻa e kolo ʻe 16, mo honau ngaahi fanga kiʻi kolo iiki, pea kiʻi meʻa eni naʻa nau ʻiloa ai ʻi honau tofiʻá, ʻia 1 Kalonikali 12:32, ko e houʻeiki ʻe toko 200 ʻi he matakali ʻo Isaká, naʻa nau mahinoʻi ʻa taimi, ko e ola ia ʻenau ʻiló mo fakamaau naʻe tokoni ki hono fakapapauʻi ʻa e ngaahi meʻa ʻa e kakaí, pea tali ʻenau angí ʻe honau kāinga kotoa. Ko e kau taki ʻo e ʻahó ni ʻoku fiemaʻu ʻa e meʻa tatau, ke ʻiloʻi ʻa e meʻa ʻoku hoko he sosaietí. Koeʻuhi ke palaniʻi ʻa e leleitaha he ngāue ʻa e siasí, kae tefito ki hono ʻiloʻi ʻo e finangalo ʻo e ʻOtuá.