Tu'apulelulu 11 Sanuali, 2018

Fakamaau 4:1-3; 2:14,19; Siosiua 11:1,10; 19:36; 1 Sam 12:9; Saame 83:9 

Fakamaau 4:1-3

"1PEA na‘e toe fai ‘e ha‘a ‘Isileli ‘a e me‘a na‘e tau kovi ki he finangalo ‘o Sihova, hili ‘a e pekia ‘a ‘Ēhuti. 2Pea na‘e fakatau kinautolu ‘e he ‘Eiki ki he nima ‘o Siapini ko e Tu‘i Kēnani, ‘a ia na‘e hau ‘i Hasoa; pea ko e kapiteni ‘o ‘ene tau ‘a Sīsela, ‘a ia na‘a ne nofo ‘i Haloseti Senitaile. 3Pea tautapa ‘a ha‘a ‘Isileli kia Sihova: he na‘e ‘iate ia ‘a e sāliote ukamea ‘e hivangeau; pea ko e me‘a fakamamahi ‘ene fakamo‘ulaloa ‘a ha‘a ‘Isileli, ‘o uofulu ta‘u."

Fakamaau 4:2 “Pea naʻe fakatau kinautolu ʻe he ʻEikí ki he nima ʻo Siapini ko e Tuʻi Kenani”. Ko e ola eni ʻo e fai kovi, mo e taʻetokanga he kuo toe fai ʻe ʻIsileli ʻa e meʻa naʻe taukovi ki he finangalo ʻo e ʻOtuá. Tokangaʻi ʻi heni ʻa e mālohi ʻo e fehalaaki pea mo e vave ʻa e tangatá ki he angahala, ʻo ʻikai ke matuʻu ʻi he moʻoni ʻa e ʻOtuá. Tokangaʻi ʻa e mahaki ʻoku toutou hoko ʻi he mālōlō mo e nonga taimi loloá. Ko e nonga ē mo e melino ʻa e fonuá ʻi he taʻu ʻe valungofulu, pea naʻe totonu ke nau fakapapauʻi ʻekinautolu ʻa ʻenau lotú, ka naʻa nau holi kinautolu ke nau lotu ki he ngaahi ʻotua loí, pea ko e tuʻunga ia ki honau fakaʻauhá, koeʻuhí kuo mate ʻa Ehuti, pea nau fai leva ʻa e meʻa kovi. He ko e taimi naʻe liʻaki ʻe ʻIsileli ʻa e ʻOtuá ʻe lī kinautolu ʻe he ʻOtuá. Pea ko kinautolu ʻoku nau lī kinautolu kituʻa mei he ngāue ʻa e ʻOtuá, ʻe lī kinautolu kituʻa mei he maluʻi ʻa e ʻOtuá. Ko Siapini naʻe hau mo pule ʻi Hasoá. Ko hono tupuʻangá naʻa nau fai ʻa e meʻa kimuʻa ʻia Siapini ko eni, he naʻa na hingoa tatau pe, pea naʻe kapa ʻe Siosiua ʻa hasoa mo tutu ʻenau ngaahi salioté (Sios 11:1-10). Ka ʻi he fakalakalaka ʻo e taimi naʻe toe langa ʻa e koló ni, pea nau toe maʻu honau mafaí, pea mole atu honau tukunga kimuʻá pea ko e tuʻi ko eni ʻo Hasoá ʻa Siapini, naʻe fakatau ki ai ʻe he ʻEikí, ke ne hoko ko e meʻa tā ki haʻa ʻIsileli koeʻuhi ko ʻenau fai ʻa e meʻa kuo hoko ia ko e fakatupu houhau ki he fofonga ʻo e ʻOtua ʻo ʻIsilelí, ke mahino ki ʻIsileli kuo mole ʻenau lelei ke fakafepakiʻi ʻa e kau Kenaní. Ko e toenga ʻo e ngaahi puleʻanga ʻoku nau fuʻu tokolahi, pea ʻoku ui kinautolu ko Haloseti Senitaile, pe ko e ngaahi puleʻanga. Ko Siapini mo ʻene senialé ko Sisela naʻá na puleʻi ʻa haʻa ʻIsileli. Ko e fili ko ení naʻe ofiange ia, ʻi he ʻuluaki taimi, ʻi honau ngaahi kauʻaá, mo hono ʻuhinga ʻoku nau maʻu ai ki ʻIsilelí ʻa e faingamalie lahi ke fai kia kinautolu ʻa e meʻa hala. Naʻe tangi tautapa ʻa ʻIsileli kia Sihova, koeʻuhi ko e tuʻunga fakatuʻutamaki kuo nau ʻi aí, mo honau vā mo e ʻOtuá, pea naʻe ʻikai ke nau sio ki he founga kehekehe ke nau hao aí. Ko kinautolu ʻoku nau fakamaʻamaʻaʻi ʻa e ʻOtuá ʻi heʻenau koloá mo ʻenau tui falala kiate Iá, ʻoku fiemaʻu ke nau fekumi kiate Ia, ʻi he taimi ʻo e faingataʻá. Ka ʻokú ke faingataʻaʻia, kumi ʻa e ʻOtuá ke maʻu.