Falaite 5 Sanuali, 2018

Fakamaau 3:1-7; 2:21,22; Siosiua 13:3; ‘Ekis 34:13,16; Teut 7:3; 16:21; Saame 106:35 

Fakamaau 3:1-7

"1PEA ko eni ‘a e ngaahi pule‘anga na‘e tuku ‘e Sihova ke sivi ‘aki ‘a ‘Isileli, ‘a kinautolu na‘e ‘ikai te nau ‘ilo ki he ngaahi tau ‘i Kēnani; 2(ko e kehe pē ke ‘ilo ‘e he ngaahi to‘utangata ‘o ha‘a ‘Isileli ke nau ako ai ‘i he tau, ‘a kinautolu na‘e ‘ikai ‘ilo mu‘a ki ai); 3ko e hou‘eiki ‘e toko nima ‘o e kau Filisitia, mo e kau Kēnani kotoa pē, mo e kau Saitoni, mo e kau Hevi na‘e nofo ‘i he mo‘unga ko Lepanoni, mei he mo‘unga ko Peali-Heamoni ‘o a‘u ki he Hū‘anga ki Hēmati. 4Pea na‘a nau ‘i ai ke sivi ‘aki ‘a ‘Isileli, ke mahino pe te nau tokanga ki he ngaahi tu‘utu‘uni ‘a Sihova, ‘a ia na‘a ne ‘atu ki he‘enau ngaahi tamai, ‘o fakafai ‘ia Mōsese. 5Pea na‘e nofo ‘a ha‘a ‘Isileli ‘i he lotolotonga ‘o ha‘a Kēnani, mo ha‘a Heti, mo ha‘a ‘Āmoli, mo ha‘a Pēlisi, mo ha‘a Hevi, mo ha‘a Siepusi; 6pea na‘a nau mali mo honau ngaahi ‘ōfefine, pea na‘a nau ‘ange honau ngaahi ‘ōfefine ke ‘unoho mo e fānau ‘anautolu, pea na‘a nau tauhi honau ngaahi ‘otua. 7Pea na‘e fai ‘e ha‘a ‘Isileli ‘a e me‘a na‘e tau kovi ki he finangalo ‘o Sihova, he na‘a nau fakangalongalo‘i ‘a e ‘Eiki ko honau ‘Otua, pea nau tauhi ‘a e ngaahi Peali mo e ngaahi ‘Āsela."

Fakamaau 3:4 “Pea naʻa nau ʻi ai ke siviʻiʻaki ʻa ʻIsileli ke mahino pe te nau tokanga ki he ngaahi tuʻutuʻuni ʻa Sihova”. Ko ʻIsilelí, kuo ʻātakaiʻi kinautolu ʻe he kakai tokolahi ke nau tau mo kinautolu he kuo nau fakataipe mai ʻa e anga ʻo e tuʻu fakakautau ʻa e siasí ʻi māmaní, peake ʻoua te nau nofonoa mo fakapikopiko, ka ke nau tuʻu malohi mo fepaki. Neongo ko e kau angahala ʻo māmani ʻoku totonu ia ke fakaʻauha kinautolu, ka kuo finangalo pe ʻa e ʻOtuá ke tuku pe kinautolu ke nau hoko ko e meʻasivi. He ko e ngaahi ʻahiʻahi mo e ngaahi faingataʻa ʻoku nau haʻu mei he ngaahi loto ʻo e kau angahala, ʻo nau fakahaaʻi mo ngāueʻaki mo fakamalohia ʻa e ngaahi kelesi ʻa e kau tuí, ʻi heʻenau fefaʻuhi fakaʻaho mo Setané, mo e angahala, pea mo e kovi ʻo e māmani ko ení. He kuopau ke nau nofo ʻi he māmani ko ení, ka ʻoku ʻikai ke ō kinautolu ia pea ʻoku tapu ke nau fakafuo kinautolu ki ai. Ko e fakangatangata ko ení ʻokú ne fakaʻilongaʻi ʻa e faikehekehe ʻo e kau muimui ʻo Kalaisí, pea mo e kau fai fakahāhā pe ʻi he kuonga kotoa pē. Ko e takaua mo māmani mo e kakanó ko e aka ia ʻo e kovi kotoa pē. Naʻa nau fehokotaki mo e kau Kenani ʻi he ʻenau femaliʻaki. Pea naʻe ʻomai ai kinautolu ʻo nau toe fehokotaki ʻi heʻenau lotu mo e kau Kenaní ʻo nau tauhi ai ʻa honau ngaahi ʻotua ko Peali mo e ngaahi ʻAselá, ko e ngaahi ʻimisi naʻa nau lotu ki ai, ʻi he lotovao ʻakau matolu, ko e faʻahinga temipale fakanatula. Naʻe ʻi ai pe ʻa e ngaahi ʻuhinga ke fai ki ai ʻa e manavahé he naʻe liliu pe ʻa e kovi ia ʻo lau ko e lelei, pea ko e lelei ʻoku nau ʻamanaki pe ki ha kovi. Pea ʻi heʻenau lotu ki he ngaahi ʻotua kehé naʻa nau fakangalongaloʻi leva ʻa Sihova ko honau ʻOtuá. Pea ʻi heʻenau lotu foʻoú, naʻa nau talanoa kia Peali mo e ngaahi ʻAselá, pea hoholo leva ʻenau manatu ʻo ʻikai ke nau toe manatuʻi ʻa e ʻOtua moʻoni. Pea ʻi he ngalo ʻa e ʻOtuá koeʻuhi ʻoku ʻikai ke nau sio ki ai, pea mavahe leva ia mei honau ʻātamai, pea nau kamata kotoa leva ke nau fai angahala, ʻa e ngaahi angahala ko ē ʻoku ʻi he māmaní, pea nau fai pē ʻenau founga koeʻuhí kuo ngalo ʻa Sihova ia ko honau ʻOtuá. Ko ʻetau tuʻú he ʻao ʻo e ʻOtuá ko ʻetau falala ʻoku ʻai kotoa ia ʻia Kalaisi ʻo ʻikai ha toe meʻa ʻi he māmaní ʻe toe maʻolunga ʻia Kalaisi ʻi he mate mo e moʻui.