Tu'apulelulu 4 Sanuali, 2018

Fakamaau 2:20-23; 3:1,4; Teut 8:2,16; 13:3; Siosiua 23:13,16

Fakamaau 2:20-23

"20Pea langa ai ‘a e houhau ‘o Sihova ki ha‘a ‘Isileli; pea ne folofola ‘o pehē, Ko e me‘a ‘i he hiki ‘a e pule‘anga ni mei he kovinānite na‘a ku tu‘utu‘uni ki he‘enau ngaahi kui, ‘o ‘ikai te nau fakaongo ki hoku le‘o; 21ko au foki ‘e ‘ikai te u toe kapusi ha taha mei honau ‘ao, ‘i he ngaahi pule‘anga na‘e tuku ‘e Siosiua ‘i he‘ene pekia: 22koe‘uhiā ke u sivi ‘aki ‘a ha‘a ‘Isileli, pe te nau tauhi pe ‘ikai ‘a e ‘alunga ‘o Sihova ke fou ai, ‘o hangē ko e tauhi ki ai ‘e he‘enau ngaahi kui. 23Ko ia na‘e tuku ai pē ‘e Sihova ‘a e ngaahi pule‘anga ko ē, ‘o ‘ikai te ne kapusi vave; pea ‘ikai foki te ne tukuange kinautolu ki he nima ‘o Siosiua."

Fakamaau 2:21 “Ko au foki ʻe ʻikai teu toe kapusi ha taha mei honau ʻaó, ʻi he ngaahi puleʻanga naʻe tuku ʻe Siosiua ʻi heʻene pekiá” Ko e meʻa ʻi he taʻe fai ʻe ʻIsilelí haʻanau tokonaki maʻa kinautolu, ke nau talangofua ki he ngaahi tuʻutuʻuni ʻa e ʻOtuá ʻo fai ki ai, ka nau moʻua pe ʻekinautolu ʻenau ngaahi fiemaʻu fakaetangatá, ko ia aí, kuo tuku pe ʻe he ʻOtuá kinautolu kia kinautolu, ʻo nau fakamalumalu pe ʻi he ivi ʻo ʻenau ngaahi angahalá ʻa ia te nau ʻauha aí. He ko e taimi lahi ʻoku ʻomai ʻe he ʻOtuá ʻEne fekau ʻi he Tohitapú, ʻo fepakituʻu ia mo ʻetau fakakaukau fakatangatá, pea tau tuku ʻetautolu ia ʻa e fekau ʻa e ʻOtuá, kae fai pe ʻetautolu ia ʻetau fakakaukau. Manatuʻi, ko e ʻOtua ʻa e leleí mo e tonutahá, ʻoku ʻikai haʻatau lelei. Ko e toenga ko ē ʻo e kau Kenaní, naʻe tuku pē kinautolu ʻi ai ke siviʻiʻaki ʻa ʻIsileli, pe te nau tauhi ʻa e ʻalunga ʻo Sihová, pe ʻikai, pea ʻoku ʻikai leva ia ko e ʻOtuá, ke ne ʻiloʻi kinautolu, ka ko kinautolu pe ke nau ʻiloʻi kinautolú. Pea ke nau feinga foki pe te nau lava ʻo fakafepakiʻi ʻa e ngaahi ʻahiʻahi ʻo e ngaahi ʻaitolí, ʻa ē ʻe tuku mai ʻe he kau Kenaní ʻi muʻa ʻiate kinautolu. Kuo ʻosi fakahā mai ʻe he ʻOtuá kia kitautolu ʻa e anga kākā mo e toloto ʻi he angahala, ʻoku ʻi ai hotau ngaahi lotó, ka ʻoku ʻikai ke tau loto kitautolu ke tau tui ki ai, kaeʻoua pe kuo tau ʻi ha lotolahi feʻunga ʻi he ʻahiʻahi ʻoku hoko maí, ʻo tau ʻiloʻi ai ʻoku moʻoni, ʻaki ʻetau aʻusia ʻa e mamahí. Ko e lahi ange ʻa hono siviʻi hotau lotoʻi-tangatá ko e kovi ange ia ʻe fakahaaʻi mai pea ʻoua naʻa tau taʻofi hono fai ʻetau ngaahi meʻá, he te tau lava ʻo tūkia mo angatuʻu koeʻuhí ke tau fiemaʻu ke siviʻi ʻa e anga ʻo e ngaahi meʻa ʻoku tau tuʻu mo iá, peaʻoua naʻa tau tuku ʻetau lotú, ke tau faiaka mo tupu ʻi he ʻofá, he ko Kalaisi ke Ne ʻafio moʻoni ʻi hotau ngaahi lotó ʻi heʻetau tui kiate Iá. Pea tuku kitautolu kiate Ia ʻoʻoua ʻe toe toloi, mo talangofua ki he ui ʻa e Kosipelí pea mo tauʻi ʻo fakafepakiʻi ʻa e angahala kotoa pē, pea ke muimuiʻi ʻa e maʻoniʻoni ki he ngataʻanga hotau ngaahi ʻahó, he kuo tau maʻu ʻa e hūʻanga ki he puleʻanga taʻengata ko hotau ʻEiki mo Fakamoʻui ko Sīsū Kalaisi.