Tusite 8 Novema, 2016

Nomipa 22:22-30; ʻEki 23:20; Palo 12:10 ; Sen 1:19; Mt 15:19 

Nomipa 22:22-30

"(22) Pea langa‘i ai ‘a e houhau ‘o e ‘Otua koe‘uhi ko ‘ene ‘alu: pea hanga ‘a e ‘Āngelo ‘a Sihova ‘o tu‘u ‘i he hala mōno fili. Ka kuo heka ia ‘i he‘ene ‘asi, pea ‘oku ō mo ia ‘ene ongo talavou. (23) Pea vakai ‘e he ‘asi ‘a e ‘Āngelo ‘a Sihova ‘oku tu‘u ‘i he hala, kuo unuhi ‘ene heletā ‘o ne to‘o: pea afe ‘a e ‘asi mei he hala, ‘o ne ‘alu ‘i he vao: pea taa‘i ia ‘e Pēlami ke ne foki ki he hala. (24) Pea hanga ‘a e ‘Āngelo ‘a Sihova, ‘o tu‘u ‘i ha hala fakaliuvaka, ‘i he ngaahi ngoue vaine, ‘o ‘aa‘i mei tafa‘aki mo tafa‘aki. (25) Pea sio ‘e he ‘asi ki he ‘Āngelo ‘a Sihova, ‘o ne fa‘aki mālohi ki he ‘ā maka, ‘o feu‘utekina ‘a e va‘e ‘o Pēlami mo e ‘ā maka: pea ne toe ‘ai hono fu‘u hapo. (26) Pea toe taha atu ‘a e ‘Āngelo ‘a Sihova, ‘o ne tu‘u ‘i ha potu ‘efi‘efi, ‘a ia na‘e ‘ikai ala tafoki ai ki to‘omata‘u pe ki to‘ohema. (27) Pea ‘i he sio ‘a e ‘asi ki he ‘Āngelo ‘a Sihova, na‘a ne tō fo‘ohifo mo Pēlami: pea puke ‘a e ‘ita ‘o Pēlami, ‘o ne taa‘i ‘a e ‘asi ‘aki ‘ene me‘a kinisi. (28) Pea to‘o ‘e Sihova ‘a e ngutu ‘o e ‘asi, ‘o ne lea kia Pēlami, Ko e hā ‘aku kuo u fai kiate koe ke ke taa‘i ai au ‘a e tu‘o tolu ni? (29) Pea tali ‘e Pēlami ki he ‘asi, Koe‘uhi ko ho‘o ngaohi pehe‘i au: taumaiā ‘oku ‘i hoku nima ha heletā, pehē kuo u tāmate‘i koe. (30) Pea pehē ‘a e ‘asi kia Pēlami, ‘Ikai ko si‘o ‘asi au ‘a ia kuo ke heka ai talu ho‘o mo‘ui, ‘o a‘u ki he ‘aho ni? he kuo u momo‘i fai pehē kiate koe hā taimi?"

ʻEkisoto 23:20

"(20) Ko eni ‘oku ou fekau atu ha ‘Āngelo ke ‘alu mu‘omu‘a kiate koe ke tauhi koe ‘i he hala, pea ke fakahū ki he potu kuo u teuteu"

Palovepi 12:10 

"(10) ‘Oku ongo‘i ‘e he faitotonu ‘a e loto ‘o ‘ene manu: Kae ngaue ‘a e fatu ‘o e angahala ko e fie sio mamahi."

Senesi 1:19

"(19) Pea na‘e efiafi, pea na‘e pongipongi; ko hono ‘aho fā ia.:

Matiu 15:19

"(19) He ‘oku mei he loto ‘a e ngaahi fakakaukau pango, ‘a e ngaahi fakapō, ‘a e ngaahi faikovi ‘a alafia, ‘a e ngaahi fe‘auaki. ‘A e ngaahi kaiha‘a, ‘a e ngaahi tukuaki, ‘a e ngaahi laukovi ki he ‘Otua."

Naʻe houhau ʻa e ʻOtuá kia Pelami, koeʻuhi kuo taumuʻa ʻa Pelani, ke ne fai ʻa e meʻa naʻe totongiʻi ki ai ʻe Pelaki ke ne faí, ke fakamalaʻiaʻi ʻa ʻIsileli. Naʻe houhau ʻa e ʻOtuá kia Pelami, ko ʻene ʻalu pe he naʻá ne ʻoange ki ai ʻa e ngofua ke ʻalu mo kinautolu (v20). Ka naʻe mahino pe naʻe palani ʻa Pelami ia, te ne leaʻaki ʻa e meʻa, ʻe maʻu ai ha paʻanga lahi. Ka ko e ʻAngelo ʻa Sihová, ko e ʻao ia ʻo e ʻOtua (Sen 22:11,15). Naʻe fili ʻa e ʻOtuá kia Pelami. Naʻe sio ʻa e ʻasi ki he ʻAngelo ʻa Sihová. Naʻe mahalo ʻa Pelami te ne malavaʻo fetuʻutaki mo e ngaahi ʻotuá, ʻo fakafou ʻi he fanga manú. Ka neongo ia, ko e “tokotaha ʻoku sió”, naʻe kui ia ʻi he ʻao ʻo e ʻOtua moʻoni. Ko e monumanu eni ia naʻe sio, mo ongoʻi ʻa e finangalo ʻo e ʻOtua moʻoni, ʻi he ʻAngelo ʻa Sihova, naʻá ne poloka ʻa e halá. 

Fakatokangaʻi ʻa Pelami ʻa ʻene fefaʻuhi mo ʻene loto lavea, pea mo ʻene totongi naʻe maʻú. Naʻe ueʻi ia ʻe heʻene loto laveá, ke pipiki ki he fekau ʻa e ʻOtuá. Kaekehe, ko e meʻa fonongá ko e fanga ʻasi, naʻe fakataumuʻa pe ia, ko e meʻa fononga, mo ʻave ʻa e ngaahi utá. Naʻe ʻi ai ʻa e makatuʻunga maʻolunga ia, ko e hā ʻa e ʻuhinga naʻe ʻita ai ʻa Pelami, ʻi he ʻikai ke ʻalu ʻa e ʻasí. Naʻe fakahaofi ʻe he ʻasí ʻa e moʻui ʻa Pelamí, ka naʻe hangē ʻoku ngali vale, ʻi he taʻemahino ki ai ʻa e meʻa ʻoku hokó. Naʻe fai ʻe he ʻasí ia ʻa e meʻa naʻe totonu ke fai ʻe Pelamí. ʻI he sio ʻa e ʻasí ki he ʻAngelo ʻa Sihová naʻe fakapapae ʻa e ʻasí ki he ʻā maká, pea ne to foʻohifo mo Pelami. Pea ʻita ʻa Pelami ki he ʻasí, ʻo ne taaʻi ʻaki ʻene ʻakau taá, pea toʻo ʻe he ʻOtuá ʻa e ngutu ʻo e ʻasi ʻo ne lea kia Pelami. Ko e faʻahinga tolalo ē ʻa e tangatá kuo maʻolunga ʻa e ʻilo ʻOtua ʻa e monumanú ia, ka e moʻua pe ʻa e tangatá ia, hono fakakaukauʻi ʻo māmaní, pea mo hono kiʻi koloa molé. Tuʻu ʻia Kalaisi pea liʻoa kakato maʻana.