Nomipa21:33-36
"(33) Pea nau foki ‘o ‘alu hake ‘i he hala ki Pēsani: pea hū ki tu‘a ‘a ‘Oki ko e Tu‘i Pēsani ke ta‘ofi kinautolu, ‘a ia mo hono kakai kotoa, ke fakahoko tau ‘i ‘Etilei. (34) Pea folofola ‘a Sihova kia Mōsese, ‘Oua ‘e manavahē kiate ia, he kuo u tuku ki ho nima ‘a ia mo hono kakai kotoa mo hono fonua: pea te ke fai kiate ia ‘o hangē ko ho‘o fai kia Sīhoni ko e Tu‘i ‘Āmoli na‘e nofo ‘i Hesiponi. (35) Pea nau taa‘i ia mo hono ngaahi foha mo hono kakai kotoa, ‘o ‘ikai te nau tuku hano toko taha ke hao; pea nau ma‘u hono fonua. (36) Pea tuku fononga atu ‘a ha‘a ‘Isileli, ‘o nau fokotu‘u tēniti ‘i he ngaahi potu ‘o ‘Alapā-Moape, ‘i he kauvai ‘o Soatani na‘e hanga ki Sielikō."
Teutalonome 3:1,2,10
"(1) PEA na‘a tau tafoki ai, ‘o ‘alu hake ‘i he hala ki Pēsani: pea ha‘u ki tu‘a ‘a ‘Oki ko e Tu‘i Pēsani ke fakafetaulaki mai kiate kitautolu, ‘a ia mo hono kakai kotoa ke fakahoko ‘a e tau ‘i ‘Etilei. (2) Pea folofola ‘a Sihova kiate au, ‘Oua te ke manavahē kiate ia, he kuo u tuku ia ki ho nima mo hono kakai kotoa mo hono fonua; pea te ke fai kiate ia ‘o hangē ko ho‘o fai kia Sīhoni ko e Tu‘i Ha‘a ‘Āmoli na‘e nofo ‘i Hesiponi. (10) ‘io, ‘a e ngaahi kolo kotoa ‘o e Misoa, mo Kiliati kātoa, mo Pēsani kātoa, ‘o a‘u ki Sālika mo ‘Etilei, ko e ngaahi kolo ‘o e pule‘anga ‘o ‘Oki ‘i Pēsani."
Senesi 13:12,13
"(12) Ko ‘Epalame na‘a ne nofo ‘i he fonua ko Kēnani, ka ka nofo ‘a Lote ‘i he ngaahi kolo ‘o e seakale, pea ne hikihiki tēniti ‘o a‘u ki Sōtoma. (13) Ka ko e kakai Sōtoma ko e fa‘ahinga na‘e kovi mo fai angahala ‘aupito kia Sihova."
Ko e ʻOtuá pē ʻoku taki. Ko hono ikunaʻi ʻa ʻOki ko e tuʻi Pesaní, ʻo hoko atu ia ʻi hono ikunaʻi ʻa e kau ʻAmolí. Naʻe tuʻu hake ʻa e tuʻi Pesaní mo hono kakai kotoa, ke taʻofi ʻa ʻIsileli, pea ke nau fai tau ʻi Bulei. Lolotonga ʻa e teu tau ʻa e kau Pesaní ia, kuo hoko ʻa e folofola ʻa e ʻOtuá ia kia Mosese, “ʻOua ʻe manavahē kiate ia, he kuo u tuku ia ki ho nimá, ʻa ia mo hono kakai kotoa, mo hono fonua, pea te ke fai kiate ia ʻo hangē ko hoʻo fai kia Sihoni ko e tuʻi ʻAmoli”. Naʻe maʻu ʻe he kakai ʻIsilelí, ʻa hono puleʻi hono kotoa ʻa e ngaahi fonua ʻi he fakahahake ʻo Soataní, hili ʻenau ikunaʻi ko ʻeni ʻa Pesaní, ʻo ʻikai ha taha ʻe hao, pea nau maʻu mo e fonuá foki. Ko e ongo ikuna vave ko ení, ko e konga kinaua ʻo e fai tau maʻoniʻoni ʻa e ʻOtuá, pea katoangaʻi ʻe ʻIsileli ko e kongá ia ʻo punou hū ki he ʻOtuá (Sa 135: 8-12). Ko e ʻOtua maʻoniʻoni, mo tōnunga naʻá ne fakakakato ʻene palomesi kia ʻEpalahamé (Senesi 15:7-21). Ko e ʻaho ʻe taha, ko e ngaahi angahala ʻa e kau ʻAmolí ʻe fakamaauʻi, pea ko e kakai ʻo e palomesí te nau nofoʻi honau fonuá. ʻIo, ko e ʻOtuá kuo ne tuʻu ko e fakalotolahi ki hono kakaí, ʻo ʻikai ke nau teki ki he fakamanavahē ʻa e ʻātakaí, he ko e kau saeniti ʻoku ʻi aí, ko e kelemutu pe, he ʻao ʻo e ʻOtua iviiviʻia, ko ia ai, naʻe ʻikai ngata pe ʻi hono laiki ʻe ʻIsileli ʻa hono ngaahi filí, ka naʻa nau toe maʻu honau fonuá. ʻOku fai ʻe he ʻOtuá ʻa hono akoʻi, mo fakataukeiʻi, ʻa hono kakai ʻIsilelí, ke nau ʻiloʻi Ia pea mo hono mafaí ʻene lahí, koeʻuhi ke nau lava ʻo falala ange kiate Ia mo nau talangofua kakato ki heʻene ngaahi fekau ʻoku ʻomi kia kinautolú. Pea kuo ʻomi ʻe he ʻOtua tatau, ʻa hono ʻAló, ke Ne nofo ʻiate kitautolu. Ko hotau ʻEiki, pea ke tau fai ʻetau meʻa kotoa pe ʻi he fakaongoongo kakato kiate ia.
No comments:
Post a Comment