Siosiua 2:22-24
"22Pea na ō ‘o a‘u ki he mo‘unga, pea na‘a na nofo ai ‘o ‘aho tolu, kae‘oua ke foki mai ‘a e kau tuli: pea na‘e kumi ‘e he kau tuli ‘i he hala kotoa, kae ‘ikai ma‘u. 23Pea foki ‘a e ongo tangata, ‘o ‘alu hifo mei he mo‘unga, pea na a‘a atu, ‘o na a‘u kia Siosiua ko e foha ‘o Nuni, pea na fakamatala kiate ia ‘a e me‘a kotoa kuo hoko kiate kinaua. 24Pea na pehē kia Siosiua, Ta kuo tuku mai ‘e Sihova ‘a e fonua ni ki hotau nima; kae‘uma‘ā, kuo vai foki ‘a e loto ‘o e kakai kotoa ‘oku nofo ai koe‘uhi ko kitautolu."
Siosiua 6:2
" 2Pea folofola ‘a e ‘Eiki kia Siosiua; Vakai, kuo u tuku ki ho nima ‘a Sielikō, mo hono tu‘i, mo hono kau to‘a"
‘Ekisoto 23:31
"31Pea te u ‘ai ho ngata‘anga mei he Tahi Kulokula ki he Tahi ‘o e kau Filisitia, pea mei he Toafa ki Vaitafe: he te u tuku ki homou nima ‘a e kakai ‘o e ngaahi fonua; pea te ke kapusi atu kinautolu."
FOKI 'A E ONGO TALAFEKAU MO 'ENA LIPOOTI KIA SIOSIUA, ʻA E TŪKUNGA ʻO E FONUA KO SELIKOÓ. Pea ko e fakalotolahi ia kuo na ʻomai ki ʻIsilelí, ki heeʻnau teu ke nau laka atu ki Kenani, pea naʻe tuʻu pe ʻi heʻena fakakaukaú ke fakalotolahiʻi ʻa e kaka, naʻá na hangē ko e kau asiasi ko ē naʻe fekauʻi atu ʻe Mosese ki Kenaní. He naʻa nau tala kia kinautolu ʻa e maʻolunga mo e malohi ʻa e ʻā ʻo Selikoó pea mo e mafai ʻo e Tuʻi Selikoó, ʻa e faingataʻa ke fai ha hola meiate ia, ka ko e ongo talafekaú ʻi he laumalie kehe kinaua ia ʻo makatuʻunga kinaua ia ʻi he palomesi faka-ʻOtuá, naʻa nau fai kia Siosiua (1:16). Ko ia naʻá na foki hao mai ai, mo e fakalotolahi kia Siosiuá, ko e fakaʻilonga ia ʻo e lelei. He naʻe tokonaki ʻe he ʻOtuá maʻa kinaua haʻana kaumeʻa lelei ʻo hangē ko Lehapí. He ko e fili ʻo e Tuʻi mo e fonua ko Selikoó. Ko ʻenau foki ʻi he nonga ʻokú ne fakahaaʻi ʻa e tokanga ʻa e ʻOtuá naʻe fai maʻa kinauá koeʻuhí ko ʻIsileli, ke fakapapauʻi ki he kakai ʻa e tokanga ʻa e ʻOtuá ʻoku nau fakamalumalu aí. Ko e lipooti naʻa na ʻomaí naʻe fuʻu fakalotolahi ʻaupito kia kinautolu. He ko e kotoa ʻo e kakai ʻo e fonuá kuo vai honau lotó, pea ʻikai ha ivi ke tuʻu ʻaki pe ha lotolahi ke fai ha tau. He ko e ʻOtuá kuo ne tuku ʻa e kotoa ʻo e fonuá ki hotau ʻaofinimá pea ko e meʻa kotoa ʻoku ʻatautolu pea ʻoku halaʻatā haʻatau toe meʻa ʻatautolu ia ʻe fai. Ko ʻene fakamatala ia kia Siosiuá. Ko e kau angahala ko e taimi ʻe niʻihi ʻoku nau fakapapauʻi pe ʻe kinautolu ʻenau toó. ʻOku nau manavahē pea mo e ongo ʻo e houhau ʻa e ʻOtuá, ko e mahamahalo pe taʻefakaʻOtua ʻo ne ʻomi kinautolu ke taʻefakatomala mo e fakaofi atu ki he ʻauha. Ka ko e kelesi ʻokú ne mafola ʻo aʻu ki he pule ʻo e kau angahala. Tukuange kinautolu ʻoua ʻe toe toloi. HOLA KIA KALAISI! Pea ko e lelei. Kapau te tau fakafepakiʻi hotau ngaahi fili fakalaumalie, pea te nau hola meia kitautolu ʻo ne fakalotolahiʻi kitautolu ke tau ʻamanaki ki he taimi kotofa, pea te tau ikuna ka ko ha ikuna kafakafa.
No comments:
Post a Comment