Teutalonome 32:15-18
"15Ka ‘i he sino leva ‘a Sesuluni, pea ne ‘aka–
Kuo ke sino, kuo ke nga‘eke, kuo ke putoputa!–
Pea ne toki li‘aki ‘a e ‘Otua na‘e ngaohi ia,
‘O ne va‘inga‘aki hono makatu‘u fakamo‘ui‘anga.
16Na‘a nau fakafua‘a‘i ia ‘aki hani kehe,
Na‘a nau fakatupu ‘ene houhau ‘aki ha koto fakalielia pē.
17Na‘a nau feilaulau ki hani fa‘ahikehe ‘ata‘i ‘otua,
Koni ‘otua na‘e ‘ikai te nau ‘iloa,Koni fo‘ou toki tupu ni,
Na‘e ‘ikai vavana ai ho‘omou ngaahi kui.
18Kuo ngalo ‘a e Makatu‘u na‘e fakatupu koe,
Pea kuo ke fakatukutuku‘i ‘a e ‘Otua na‘e fā‘ele‘i koe."
Teutalonome 28:64
"64Pea ‘e fakamovetevete koe ‘e Sihova ki he ngaahi kakai kehekehe, mei he potu ‘e taha ‘o māmani ‘o a‘u ki he potu ‘e taha; pea te ke tauhi ai ki ha ngaahi ‘otua kehe, ‘a ia na‘e ‘ikai te ke ‘ilo ki ai, ‘e koe pe ko ho‘o ngaahi kui, ko e ‘akau mo e maka."
Teutalonome 31:20
"20he ka u ka ‘omi kinautolu ki he kelekele ne u fuakava ai ki honau tupu‘anga, ‘oku mahutafea ‘i he hu‘akau mo e honi: pea kuo nau kai ke mākona, pea nge‘enge‘e; pea te nau toki hanga ki ha ngaahi ‘otua kehe, ‘o tauhi kiate kinautolu, pea te nau ta‘etoka‘i au, ‘o maumau ‘eku kovinānite."
‘Aisea 1:4,28
"4‘Oiauē, pule‘anga angahala, kakai moū ‘i he kovi, hako faikovi, fānau fakahalahala: kuo nau li‘aki ‘a e ‘Eiki, kuo nau fakasīkaka‘i ‘a e Tāpuhā ‘o ‘Isileli, kuo nau mahu‘i ‘o fulitu‘a! 28Pea ‘e ai ha laiki ‘o e kau talangata‘a mo e kau angahala fakataha, pea ko e kau li‘aki Sihova ‘e ‘auha."
1Kolinito 10:22
"22He ko e pehē ke ta fakatupu fua‘a ki he ‘Eiki? he ‘oku ta mālohi ‘iate ia?"
KO E FAIANGAHALA ʻA ʻISILELÍ. ʻI heni ʻoku ʻi ai ʻa e fakatātā lalahi ʻe ua ʻo e angahala ʻa ʻIsileli. Ko e uho fakatouʻosi ʻo ení, ko e hē mei he ʻOtuá.
1. Ko e malú mo e fakakakano, ko e ʻafungí mo e fieʻeikí, mo e ngaahi meʻa kehe pē ʻoku nau vaʻingaʻaki mo liʻaki ʻa e ʻOtuá. Ko e kakai ko ení ʻoku ui ia ko e Sesuluni ʻo ʻuhinga ia ko e kakai totonu”, ka ʻoku mole vave honau ongoongo pea pehē ki heʻenau ʻiló mo ʻenau angatonu, he ko e tuʻumalie ʻa e vale ʻokú ne fakaʻauha kinautolu (Palo 1:32). ʻOku ʻikai haʻanu taau, kuo nau tupu ʻafungi mo fieʻeiki, pea kuo nau hiki honau muivaʻé, ʻo fakafepaki ki he ʻOtuá, pea kuo liʻaki ʻe ʻIsilelí ʻa e ʻOtua, naʻá ne ngaohi kinautolu ʻo ʻikai ha fakaʻapaʻapa ki he tokotaha Fakatupú, pea nau ʻai ke katakiʻi ngataʻa ʻa ʻenau siolalo ki he makatuʻu fakamoʻuiʻangá.
2. Ko e ʻaitolí, ko e fakatātā mahino ia ʻo ʻenau heé. Ko ʻenau malu he ʻOtuá mo ʻenau fakakakano naʻá ne taki kinautolu ki he ʻaitolí, ʻo hoko ia kia kinautolu ko ʻenau lotu ʻi he taʻe fiefakaongó, mo ʻenau saiʻia ʻi he ngaahi liliú. Tokanga ki ai, ko e hā ʻa e faʻahinga ʻotua kuo nau fili ki ai, ʻo fai feilaulau ki ai, kae liʻaki ʻa e ʻOtuá ia naʻá ne ngaohi kinautolu (v.16,17). Ko e ngaahi ʻotua kehe mo foʻou”. Ko e fuʻu taʻeʻaʻapa eni kuo nau fai kia Sihova ko honau ʻOtua, ʻo nau fakangaloʻi ia (v.18). “ʻA e makatuʻu naʻá ne faʻeleʻi koe, kuo ʻikai ke toe manatuʻi. Ko e manatuʻi ʻo e ʻOtuá te ne maluʻi ʻa e angahalá ka ʻi hono tauhi ʻa e māmaní mo e kakano, ʻokú ne fakangaloʻi ʻa e ʻOtua ia. Pea ko e ʻuhinga pehē ʻa hotau uí, ke ʻoua naʻa toe ʻi ai ha meʻa ʻe taha ʻi he moʻuí ni ke tau toe tauhi ki ai, ka ko Sihova pe, ko hotau ʻOtua ʻia Kalaisi, fakapapauʻi he ʻahó ni pea ke tau fakahoifua, mo tauhi kiate ia tokotaha pē.
No comments:
Post a Comment