Pulelulu 10 Me, 2017

Teutalonome 17:1-7; 4:19; 13:6,12,14; 15:21; Siosiua 7:11; Selemaia 7:22

Teutalonome 17:1-7

"1‘E ‘ikai te ke feilaulau ‘aki kia Sihova ko ho ‘Otua ha pulu pe ha sipi ‘oku ‘i ai hano ‘ila, ha me‘a pē ‘oku kovi: he ko e me‘a fakalielia ia kia Sihova ko ho ‘Otua. 2Kapau ‘e ‘ilo ‘i ho lotolotonga, ‘i ha taha ‘o e ngaahi kolo ‘oku ‘atu kiate koe ‘e Sihova ko ho ‘Otua, ha tangata pe fefine ‘oku ne fai ‘a e me‘a ‘oku kovi ‘i he ‘ao ‘o Sihova ko ho ‘Otua, he‘ene maumau‘i ‘ene fuakava. 3‘O ‘alu ‘o tauhi ‘otua kehe, ‘o punou ki ai, pe ki he la‘ā, pe ki he māhina, pe ki he hōsitē kotoa ‘o langi, ‘a ia ko e me‘a na‘e ‘ikai te u tu‘utu‘uni; 4pea ‘e fakapā kiate koe, pea ke fanongo ki ai, pea te ke ‘eke ke mahu‘ingamālie, pea ka ‘iloange ‘oku mo‘oni, pea pau ‘a e me‘a, ‘a e fai ‘a e fakalielia ko ia ‘i ‘Isileli: 5pea te ke ‘omi ‘a e tangata ko ia, pe ko e fefine ko ia kuo ne fai ‘a e kovi ko ē, ‘io, te ke ‘omi ‘a e tangata pe ko e fefine ki ho‘o matanikolo; pea te ke tolomaka kinautolu ke nau pekia. 6‘I he fakamo‘oni ‘a ha toko ua pe toko tolu ‘e mate ‘a ia ‘e tāmate‘i; ‘e ‘ikai tāmate‘i ‘i he fakamo‘oni ‘a ha toko taha pē. 7Ko e nima ‘o e kau fakamo‘oni ‘e fuofua ala kiate ia, pea hili ia ‘e ala ‘a e kakai kotoa. Ko ia te ke ‘ave ai ‘a e kovi mei ho lotolotonga."

Teutalonome 4:19

"19Pea na‘a ke tāngaki ho mata ki langi, pea ke sio ki he la‘ā mo e māhina mo e ngaahi fetu‘u, ‘a e hōsitē kotoa ‘o langi; pea na‘a tohoaki ai koe, ‘o ke lotu ki ai mo tauhia; ‘osi, ko e me‘a ia kuo vahe ‘e he ‘Eiki ko ho ‘Otua ki he ngaahi kakai kotoa ‘i lalo langi."

Teutalonome 13:6,12,14

"6Kapau ‘e o‘i fufū koe ‘e ho tokoua, ‘a e tama ‘a ho‘o fa‘ē, pe ko ho foha, pe ko ho ‘ōfefine, pe ko e uaifi ‘oku faaki ki ho fatafata, pe ko ho kaume‘a ‘oku ke loto‘aki, ‘o ne pehē, Ta ō ‘o tauhi ‘otua kehe (‘a ia ‘oku ‘ikai te ke ‘ilo ki ai, ‘a koe pe ko ho‘o ngaahi kui). 12Kapau te ke fanongo talanoa ki ha kolo ‘e taha ‘i he ngaahi kolo ‘oku ‘atu ‘e Sihova ko ho ‘Otua ke ke nofo ai,14pea te ke fehu‘i, mo hakule, mo ‘eke ke mahu‘ingamālie; pea ka ‘iloange ko e mo‘oni, pea kuo pau ‘a e me‘a, ‘a e fai ‘a e me‘a fakalielia ko ē ‘i ho lotolotonga"

Teutalonome 15:21

"21Pea kapau ‘oku ai hano ‘ila–‘oku heke, pe kui; ha ‘ila kovi–‘e ‘ikai te ke feilaulau ‘aki ia kia Sihova ko ho ‘Otua."

Siosiua 7:11

"11Kuo hia ‘a ‘Isileli, pea kuo nau maumau‘i foki ‘eku kovinānite ‘a ia na‘a ku tu‘utu‘uni kiate kinautolu: kuo nau ala foki ki he me‘a na‘a ku pehē ‘e tuku li‘aki; pea kuo nau kaiha‘asi foki, pea kuo nau fufū foki, ‘io, pea kuo nau ‘ai fakataha mo ‘enau koloa."

Selemaia 7:22

"22He tala‘ehai na‘a ku lea ki ho‘omou ngaahi kui, pea tala‘ehai na‘a ku fai tu‘utu‘uni kiate kinautolu ‘i he ‘aho na‘a ku fakahao mai kinautolu mei ‘Isipite, ‘o kau ki ha feilaulau-mōifua pe ko ha feilaulau kehe"

KO E FEILAULAU KOTOA KE HAOHAOA. Ko e kau lotu ʻaitoli kuopau ke tamateʻi. Ko hono moʻoni ʻo e fekau ko ení, kuo ʻi ai ʻa e fakahā mahino ai, ko e niʻihi ʻo e kau ʻIsilelí, kuo nau fai ʻa e feilaulau taʻehaohaoa, pe ko e monumanu ʻoku mele ki he ʻOtuá. Ka ʻi he taimi ní ʻoku faingataʻa mo mamafa ke fai ki he ʻOtuá hotau lelei tahá. Sīpinga, ʻa e konga ʻuluaki ʻo e meʻa ʻoku tau maʻu ʻi heʻetau ngāué, he ʻoku ʻahiʻahiʻi maʻu pē ia ke fai ha liliu taʻe feʻunga ki he ʻOtuá ʻaki ʻa e foaki ʻoku tau fai kiate ia, koeʻuhi ʻoku tau fakakaukau, heʻikai ke tau toe maʻu ʻa e meʻa ko iá. Ka ko ʻetau foakí, ʻoku ne fakahaaʻi ʻa e meʻa moʻoni ʻoku tau fakamuʻomuʻa. ʻI heʻetau fai ʻaki ʻetau foaki ʻa e toetoenga meʻá, ʻoku mahino ai, ʻoku ʻikai ke ne hoko, ko e senitā ia ʻo ʻetau moʻuí. Foaki ki he ʻOtuá, ʻa e langilangi ʻa e meʻa ʻoku ke ʻuluaki fiemaʻu ʻi hoʻo paʻangá, ho taimí, pea mo hono ngaahi talenití. He ko e lao eni ke fakatolonga ʻaki ʻa e lotú ki he ʻOtuá, ʻi hono langilangí. Ke teuteu ki ai ʻo ʻoua ʻe ʻi ai ha monumanu ʻe ʻi ai hano mele, ke feilaulau ʻaki kiate Ia, he ko e ʻOtuá ʻa e leleitaha ʻo e moʻuí, pea ko e hā pe ʻa e meʻa ʻoku tau tauhi ʻaki kiate Iá, ʻoku totonu ko e lelei tahá pē. Ko e ngaahi feilaulau ʻo e Fuakava Motuʻá ko e taipe ia ʻo Kalaisi, he ko e Lami Taʻemele mo taʻe ʻi ai ha ʻila (1 Pita 1:9). Pea ke hokohoko atu ʻetau manatuʻi ʻa e haohaoa, ʻa e maʻa, mo e taʻemele ʻa e feilaulau ʻa Kalaisí. Pea fai leva ki he ʻOtuá ʻa e kotoa ʻo e lotu mo e ʻofa kiate Ia tokotaha pe. Pea ki he ʻotua ‘o e ʻaitoli, mo e taʻelotu, ko e fakalotomamahi lahi taha ia, pea te ne tautea ʻi he maama ko ení, pea ʻi he kahaʻú foki, he ko ia ʻe ʻilo ʻi ʻIsileli, ha taha ʻoku lotu ki ha ʻotua kehe, ʻe tolomakaʻi ke he mate. Kaekehe, ko e ʻahó ni, ko e ʻaho pe toe fakamoʻoni maʻa hotau ʻEiki Huhuʻí, ʻo faiʻaki hotau lelei tahá, pea ke ʻoange ʻa e lelei taha mo e langilangí kiate ia, ʻoku ʻAʻana tokotaha pe ʻa e kololiá ʻo taʻengata.