Tokonaki 17 Sept, 2016

Nomipa 14:11,12; ‘Eki 32:1; Teut 9:23; Hep 3:8 

Nomipa 14:11,12

“(11) Pea folofola ‘a Sihova kia Mōsese, ‘E tuku ‘afē ‘a e ta‘etoka‘i au ‘e he kakai ni? Ko futu mo e ‘ikai te nau tui kiate au, neongo e ngaahi fu‘u mana kuo u fai ‘i honau lotolotonga? (12) Ka u taa‘i kinautolu ‘aki ha mahaki faka‘auha, ‘o hifo mei honau tu‘unga; ka u ngaohi koe ko e kakai lahi mo mālohi ‘iate kinautolu.” 

'Ekisoto 32:1
"(1) PEA ‘i he vakai ‘e he kakai ‘oku fakatotoka ‘e Mōsese ‘ene ‘alu hifo mei he mo‘unga, na‘a nau fakataha kia ‘Ēlone, ‘o nau pehē kiate ia, Tu‘u, ‘o ngaohi mai hatau ‘otua   ke takimu‘a kiate kitautolu; he ko e me‘a ki he siana ni ko Mōsese, ‘a ia na‘a ne ‘omi kitautolu mei ‘Isipite, ‘oku ‘ikai te tau ‘ilo pe ko e hā kuo hoko kiate ia."

Teutalonome 9:23
"(23) Pea ‘i he fekau atu kimoutolu ‘e Sihova mei Kētesi-panea, he‘ene, pehē, Mou ‘alu hake ‘o ma‘u ‘a e fonua kuo u foaki kiate kimoutolu; ka na‘a mou angatu‘u ki he folofola tonu ‘a Sihova ko homou ‘Otua, pea na‘e ‘ikai te mou tui kiate ia, pea na‘e ‘ikai te mou fakaongo ki hono le‘o."

Hepelu 3:8
"(8) ‘Oua na‘a fakafefeka homou loto; ‘O hangē ko ia ne fai ‘i Fakahouhau, ‘O tatau mo e ‘aho ‘o ‘Ahi‘ahi ‘i he Toafa:"

Ko e me’a ‘e 2 felave’i mo ‘Isileli ne fakahaa’i he ‘Otuaˊ kia Mosese´. 

1. Ko e angahala ‘a e kakaiˊ. ‘Oku nau langa’i Au, pëa ‘i hono faka’uhingaˊ, ‘oku nau teke’i Au kitu’a, mo ta’etoka’i Au. He’ikai ke nau tui mai kiate Au. Ko ‘enau ta’etui, kuo hoko ai ‘a e ‘ahoˊni, ko e ‘aho fakalangakë ‘i he toafaˊ (Hepelu 3:8). Ko e ta’efalala ki he ‘Otua´, ‘i Hono ivi´, mo ‘Ene palomesiˊ, kuo hoko ia ko e fakatupukë lahi. Pea ko e takele ia, ‘o e ngaahi fakalangakë lahi. Ko e ta’etui´, ko e angahala lahi (1 Sione 5:10) ko e aka ia ‘o e angahala´. (Loma 3:12). 
2. Ko ‘enau hokohoko atu he fai angahala´, ko e hā hono lölöa ‘enau fai peheeˊ? ‘Oku tauhi pë ,angahala, ‘i he fakalangakeeˊ, ko e lölöaange ‘enau fai pehee,ˊ ko e lahi ange ai pë ia, ‘a e ta’efakahoifua kiate Ia. Pea ko e fakalahi ange ‘enau angahala´, ‘i he’enau felave’i mo e ‘Otua´. Ko e kakaiˊni, ko e kakai angakehe, mo e kakai fakahähä. Ko e ofi ange ha taha ki he ‘Otuaˊ ‘i he hingoa pë, mo e fiehä, pea ko ‘ene lahiˊ ‘oku Ne valoki’i ‘enau ngaahi angahala´, kae tautefito, ki he’enau ta’etui´. Ko e lahi ange me’a, kuo fai he ‘Otuaˊ ma’atautolu´, ko e lahi ange ia, ‘o e mamahi ki Hono finangaloˊ kapau ‘oku tau ta’efalala ki Ai. 

Na’e fakahaa’i ‘e he ‘Otuaˊ kia Mosese, ‘a e tautea, kuo paasi ‘i He’ene fakamaau´, ke fai kiate kinautolu´. Te Ne hanga ‘o fakangata kotoa kinautolu, ‘aki ‘Ene taa’i kinautolu, ‘aki ‘a e mahaki faka’auha, ke tamate’i kotoa honau hingoa´, mo e matakali, pea he’ikai ha toe faingata’a, mo kinautolu. ‘Oku nau faka’amu ke nau mate, pea ke nau mate, pea he’ikai ha aka, pë va’a, ‘e toe meiate kinautolu. Ko e fänau angatu’uˊ, ko honau taau pë ia, ko e ta’e ‘i ai hanau tofi’a. Kapau ko ia, ko e fehu’iˊ, ko e hā ha me’a ‘e hoko, ki he kovinanite ‘a e ‘Otuaˊ mo ‘Epalahame? Ko e tali ‘eni, ‘e fakakakato, mo fakahoko ia, ‘i he fämili ‘o Mosese´, he ‘oku pehë ‘e he ‘Otuaˊ “ Kau ngaohi koe, ko e kakai lahi, mo mälohi ‘iate kinautolu”. Kāinga Mo’ui Fo’ou, fakatokanga’i, ‘a e me’a ‘oku fehi’a taha ai ‘a e ‘Otua´, ko e faiangahala´, mo hono hokohoko atu´. Manatu’i, kuo fakama’a kotoa kitautolu, ‘i he ta’ata’a ‘o Sīsū Kalaisi´, ‘i he’etau tui kiate Iaˊ, pea ke tau tauhi mā’oni’oni, kiate Ia ‘i loto, mo tu’a.