Teutalonome 32:39-43
"39Uē! vakai, ko au, ko au pē ia,
Pea ‘oku ‘ikai ha ‘otua mo kita:
Ko au ‘oku ou fai ‘a e tāmate, pea u fai mo e fakaola,
Kuo u tā, pea u faito‘o ‘a e lavea;
Pea ‘oku ‘ikai ha taha te ne fakahaofi mei hoku nima.
40He ‘oku ou hiki ki langi hoku nima,
Pea u pehē, Tangi ‘eku mo‘ui ‘o ta‘engata.
41Kapau te u faka‘alo ‘eku heletā fetapatapaki,
Pea ala ki he fakamaau hoku nima ni,
Te u toki fai sauni ki hoku ngaahi fili,
Pea u ‘atu hono tuha kiate kinautolu ‘oku fehi‘a mai.
42Te u ‘ai ke mākona ‘eku ngaahi ngahau ‘i he toto,
Pea ko ‘eku heletā te ne kai kakano–
‘a e toto ‘o e mate mo e ‘ave pōpula–
‘a e kakano mei he ‘ulu ‘o e hou‘eiki ‘o e fili na.
43Mou fiefia, ‘a e ngaahi pule‘anga, fakataha mo ho‘ona kakai"
‘Aisea 41:4
"4Ko hai kuo ne fokotu‘u, ‘o fai ia, he‘ene ui mai ‘a e ngaahi to‘utangata mei he kamata‘anga? Ko au Sihova, ‘a e ‘Uluaki, pea ‘oku ‘i he kimui; ko au ia."
'Aisea 45:5
" 5Ko Sihova au, pea ‘oku ‘ikai mo ha taha; ka tuku au ‘oku ‘ikai ha ‘Otua: na‘a ku ‘ai mahafu koe; ‘osi, na‘e ‘ikai te ke ‘ilo au."
Saame 50:22
"22‘a e kau fakangalo‘i ‘Otua, fakakaukau mu‘a ki he me‘a ni,
Na‘a ku hae kimoutolu, ‘o ‘ikai ha taha ‘e haofaki:
23Ko ia ‘oku ne feilaulau ‘aki ‘a e fakafeta‘i,"
‘Aisea 66:16
"16‘E fai fakamaau ‘a Sihova ‘aki ‘a e afi; ‘io, ‘oku ne fai‘aki ‘ene heletā ki he kakano kotoa: pea ‘e tokolahi ‘a e tō ‘a Sihova."
Loma 15:10
"10Pea ko e potu ‘e taha ‘oku pehē,Mou fiefia, ‘a e Senitaile, fakataha mo ho‘ona kakai."
Fkha 19:2
" 2He ‘oku mo‘oni mo totonu
A ‘ene ngaahi fakamaau:
He kuo ne fakamaau ‘a e fe‘auaki lahi,
‘A ia na‘a ne maumau‘i ‘a māmani ‘aki ‘ene fe‘auaki,
Pea kuo ne ‘eke kiate ia
‘a e toto ‘o ‘ene kau tamaio‘eiki."
KO E FAI FAKAHAOFI ʻA E ʻOTUÁ MAʻA HONO KAKAÍ. Neono ko e vahé ni ko e hiva, ko hono fakamaʻopoʻopó ʻoku lea ki ai ʻi he meʻa ko eni ʻe tolu.
1. ʻOkú ne lea ki he langilangi ʻo e ʻOtuá v.39. He ko e ʻOtua lahi ʻa Sihova, ʻokú ne fiemaʻu ʻa e langilangi. i) ʻOkú ne moʻui ʻiate ia pē. “Ko au, ko au pe ia”, he naʻe fai pehē ʻe Mosese ki he Huafa ʻo e ʻOtuá he ko ia naʻá ne ʻuluaki ʻilo ai ʻa e ʻOtuá (eki 3:14). “Ko au ko au ai pe”. Ko au ai pe, pea ʻe pehē ai pe ia ʻo taʻengata. Pea ʻoku tau ʻilo ʻa e meʻa ʻi he ngaahi vahe ʻo ʻAisea ʻa hono fakalotolahiʻi ʻe he ʻOtuá ʻa hono kakaí ke nau ʻamanaki ki honau fakahaofi kituʻa mei Papilone (Ais 41:4; 43:11,13,25 ; 46:4). ii) Ko e molumalu ʻo ʻene maʻolunga taupotu. “Pea ʻoku ʻikai ha ʻotua mo kita”. ʻIkai ha taha ke tokoni mai kiate au pe ha ʻotua naʻe faʻu ʻi muʻa ʻiate au, pea hili au ʻe ʻikai (Ais 43:10,11). iii) Ko ʻene fakaleveleva aofanatuku. “Ko au ʻoku ou fai ʻa e tamate, pea u fai mo e fakaola” (fakamoʻui) ʻi he mamaní mo ngaohi ʻa kinautolu ke moʻui ki he māmani ʻo e ngaahi laumalié.
2. Ko e fakamanavahe fakaʻulia ki hono ngaahi filí (v.40-42). “Peau ʻatu hono tuha kiate kinautolu ʻoku fehiʻa mai” Ko kinautolu ʻoku nau tuʻuʻaki atu ʻa e talangataʻa ki he ngaahi lao ʻa e ʻOtuá, mo nau fakatangaʻi ʻa ʻene kau sevaniti tonunga. Pea ko kinautolu ia ʻoku fai sauni ki ai ʻa e ʻOtuá pea ko hono ngaahi filí. He ʻoku ou hiki ki langi hoku nimá. “Ko e anga ia ʻo ʻene maʻoniʻoni, ko e fakaʻilonga motuʻa ia ʻo ʻuhinga ki he fuakava (Sen 14:22).
3. Ko e lea fakafiemalie ki hono kakaí v.43 “Mou fiefia ʻa e ngaahi puleʻanga fakataha mo hoʻona kakai” Ko e hivá ni, ʻoku fakaʻosiʻosi ʻaki ʻa e ngaahi lea ʻo e fiefia. Ko e kakai ʻa e ʻOtuá te nau fiefia ʻi he fiefia taʻengata. Ko e meʻa ʻe tolu ʻo e fiefia ko eni. i) Ko hono fakalahi ʻa e kauʻā ʻo e siasi ʻi he ului ʻa e kau senitailé (Lo 15:10). ii) Te ne hanga ʻo sauni mo e ʻekeʻi ʻa e toto ʻo ʻene kau sevaniti, ʻene mahuʻinga kiate ia. iii) Ko e meesi ʻa e ʻOtuá kuo tuku tauhi maʻa hono siasi mo e kotoa ʻo kinautolu ʻoku kau ki ai. ʻOkú ne fai meesi ki hono fonuá pea ki hono kakai pea ki hono kotoa. Ko e feituʻu kotoa pē ke manavahe pea mo tauhi kiate ia ʻia Kalaisi.
No comments:
Post a Comment