Monite 8 Me, 2017

Teutalonome 16:13-17; ʻEkisoto 23:14,16; 34:20; Levitiko 23: 34

Teutalonome 16:13-17

"13Te ke fai hao Kātoanga Fale-lou‘akau ‘o ‘aho fitu, hili ho‘o utu ho‘o haha‘anga mo ho‘o tata‘o‘anga uaine: 14pea te ke fakafiefia ‘i ho‘o kātoanga na, ‘a koe, mo ho foha, mo ho ‘ōfefine, mo ho‘o tamaio‘eiki, mo ho‘o kaunanga, pea mo e Līvai mo e muli mo e tamai mate mo e uitou ‘oku ‘i ho kolo. 15Ko e fitu‘i ‘aho te ke fai kātoanga ai kia Sihova ko ho ‘Otua, ‘i he potu te ne fili ki ai: koe‘uhi ‘e tāpuaki‘i koe ‘e Sihova ko ho ‘Otua ‘i ho‘o fua kehekehe, pea mo e ngāue kehekehe ‘a ho nima, pea te ke fiefia pē. 16Ko e tu‘o tolu mālō ‘i he ta‘u ‘e hā ho‘o kau tangata kotoa pē ‘i he ‘ao ‘o Sihova ko ho ‘Otua ‘i he potu te ne fili ki ai; ‘i he Kātoanga Tapu-lēvani, pea ‘i he Kātoanga Lau-uike, pea ‘i he Kātoanga Fale-lou‘akau: pea ‘e ‘ikai te nau tu‘u mola pē ‘i he ‘ao ‘o Sihova: 17‘e takitaha ‘ene me‘a‘ofa ‘i he me‘a ‘oku ne ma‘u, ‘o taau mo e tāpuaki ‘a Sihova ko ho ‘Otua kuo ‘atu kiate koe."

ʻEkisoto 23:14,16

"14Tu‘o tolu ‘i he ta‘u te ke fai kātoanga kiate au. 16Pea ko e Kātoanga ‘o e Polopolo-ta‘u, ko e ‘uluaki fua ‘o ho‘o ngāue, ‘o e me‘a kuo ke tō ‘i ho‘o ngoue. Pea ko e Kātoanga Utu ta‘u ‘oka ‘osi ‘a e ta‘u, ‘i ho‘o fetuku mai ho‘o fita‘a mei he ngoue‘anga."

'Ekisoto 34:20

"20Pea ko e ‘olopo‘ou ‘o e ‘asi te ke huhu‘i ‘aki ha lami: pea kapau ‘e ‘ikai te ke huhu‘i, te ke fesi‘i hono kia. Te ke huhu‘i ho ngaahi foha kotoa pē ‘oku ‘olopo‘ou. Pea ‘e ‘ikai tu‘u mola ha toko taha ‘i hoku ‘ao."

Levitiko 23: 34

"34Lea ki ha‘a ‘Isileli, ‘o pehē, ‘I hono ‘aho hongofulu mā nima ‘o e māhina fitu ko eni ‘e kamata ai ‘a e kātoanga Fale-lou‘akau, pea ‘e fai ia kia Sihova ‘o ‘aho fitu."

KO E KATOANGA ʻO E TAPANEKALÉ. Ko e katoanga ko ení, naʻe fakataipe, ia ko e fatongia taʻetuku ʻo e fetalanoaʻaki ʻi he kosipelí. Tauhi ʻa e fakamamafa, “Pea te ke fakafiefia ʻi ho’o katoangá na?” Pea koeʻuhi ko e ʻEikí te ne tapuakiʻi koe, keke fiefia moʻoni. He ko e finangalo ia ʻo e ʻOtuá ki hono kakai, ʻoku totonu ke nau hoko ko e kakai fiefia. Ko kinautolu ʻoku fakamalumalu ʻi he laó, kuopau ke nau fiefia he ʻao ʻo e ʻOtuá, kae huluʻanoa ange ʻa e fiefia ʻakinautolu, ʻoku nau fakamalumalu ʻi he kelesi ʻo e kosipeli, pea ke ʻai ia ko hotau fatongia, ke fiefia maʻu ai pē, ke fiefia ʻi he ʻEikí maʻu pē. ʻI heʻetau fiefia ʻi he ʻOtuá ʻe kitautolu, ʻoku totonu ke tau fai ha meʻa ʻe ala tokoni ki he kakai kehé, ke nau fiefia mo kinautolu ʻi he ʻOtuá, ke fiemalie ʻa e kau mamahi, pea mo fakaai ʻenau ngaahi fiemaʻú, pea ke fiefia ʻa e mulí, pea pehē ki he tamai mate, mo e uitoú, ke fai honau tokoniʻi, ke tau fiefia fakataha mo kitautolu (Sione 29:13). Kuopau ke tau fiefia ʻi he ʻOtuá, ʻoku ʻikai koeʻuhi pe, ko e hā ʻa e meʻa ʻoku tau maʻu, pea ʻoku tau maʻu fakaʻaho meiate Ia,ka koe meʻa kuo Ne ʻosi palomesi ki ai, pea ʻoku tau nofo ʻo ʻamanaki ke maʻu ia ki kō atu, meiate Ia, he koeʻuhi te ne tapuakiʻi koe, ko ia aí, te ke fiefia. Ko kinautolu kuo ngaohi ʻe he ʻOtuá ʻenau fiefiá, te nau fiefia ʻi he ʻamanaki, koeʻuhí ʻoku ne tōnunga ki he palomesi kuo ne faí.

Ko e katoanga ʻo e Tapanekalé, ko ha katoanga polopolo (Lev 23:16 ; 34:22). Ko e lolotonga ʻo e pilikimi ko ení, naʻe fakatahataha ʻa e kakai ʻa e ʻOtuá, ke nau katoangaʻi ʻa e lelei ʻa e ʻOtuá, pea ke nau manatuʻi, pe naʻe fakafēfē ʻenau nofo fakataha ʻi he ngaahi teniti (ko e tapanekale mo e ngaahi teniti) lolotonga ʻenau hē holo ʻi he toafá. ʻI he ʻahó ni, ko e katoanga ko enʻi, ʻoku ʻiloa ia ko Sukote, mei he faka Hepeluú, ʻoku liliu ia ko e ngaahi palepale. Ko e lōlōa ʻa e katoangá ni, ko e ʻaho ʻe fitu, pea tapuni ki he ʻaho valú (Lev 23:36). Ko e ʻEiki ʻoku taha pē, pea taha hono Huafá. Ko e foki ki ai ʻa e Misaiá, te ne ʻomai ʻa e fiefia ki hono kakaí. Kae fēfē ko ʻene haʻu ia ʻo nofo ʻi māmani he taʻu ʻe 1000 teuteu ki ai ʻi he ʻEiki ko Sīsū Kalaisí, te tau fiefia taʻengata fakataha mo Ia.