Teutalonome 11:7
"7ka ko homou mata kuo māta‘i hono kotoa ‘o e fu‘u ngāue ‘a e ‘Eiki na‘a ne fai"
Teutalonome 10:12, 21
"12Pea ko eni, ‘e ‘Isileli, ko e hā fua ‘a e me‘a ‘oku tangi ki ai ‘e Sihova ko ho ‘Otua meiate koe? ‘a ‘eni pē, ke ‘apasia ki he ‘Eiki ko ho ‘Otua, ke fou ‘i hono ngaahi hala, pea ke ‘ofa kiate ia, pea ke tauhi kia Sihova ko ho ‘Otua ‘aki ‘a e kotoa ‘o ho loto mo e kotoa ‘o ho laumālie. 21Ko ia pē ho vīkiviki‘anga, pea ko ia pē ho ‘Otua, ‘a ia kuo ne feia ma‘au ‘a e ngaahi me‘a lalahi mo fakangeingei ni, ‘a ia kuo māta‘i ‘e ho mata na."
Teutalonome 29: 2
"2Pea ui ange ‘e Mōsese ‘a ‘Isileli kātoa, ‘o ne pehē kiate kinautolu, Na‘a mou mamata ki he ngaahi me‘a na‘e fai ‘e Sihova ‘i homou ‘ao ‘i ‘Isipite kia Felo, pea ki he‘ene kau tamaio‘eiki, pea ki he fonua kotoa"
Nomipa 16:1-5, 30-35
"1PEA ko Kola ko e foha ‘o ‘Īsa‘a ko e foha ‘o Kōhate ko e foha ‘o Līvai, na‘a ne fa‘ufa‘ufono mo Tētani mo ‘Apilami ko e hako ‘o ‘Eliapi, pea mo ‘Oni ko e foha ‘a Peleti ko e hako ‘o Lūpeni.2pea nau tutu‘u ‘i he ‘ao ‘o Mōsese fakataha mo e tu‘unga me‘a mei ha‘a ‘Isileli, ko e toko uangeau mā nimangofulu ‘i he hou‘eiki ‘o e fakataha, ha ni‘ihi na‘e ui ki ai, ko e kau tangata ‘ilonga: 3pea nau fakataha mai ke fai mo Mōsese mo ‘Ēlone, ‘o nau pehē kiate kinaua, Kuo mo ‘afungi fau, he ‘oku tāpuhā kotoa pē ‘a e fakataha kotoa, pea ‘oku ‘afio ‘a Sihova ‘i honau lotolotonga: pea ko ho‘omo fakamahiki kimoua ‘i he fakataha ‘a e ‘Eiki koe‘uma‘ā? 4Pea ‘i he fanongo ki ai ‘e Mōsese na‘a ne tō fo‘ohifo: 5pea ne lea kia Kola mo ‘ene kau kātoa, ‘o pehē, ‘E fakae‘a ‘e Sihova ‘apongipongi pe ko hai ‘oku ‘o‘ona, mo ia ‘oku tāpuhā pea ngofua ke ofi kiate ia: pea ko ia ‘oku ne fili ki ai ‘e ngofua ke ofi kiate ia.
30Ka ‘o kapau ‘e fai ‘e Sihova ha me‘a fo‘ou, pea fakamanga ‘e he kelekele hono ngutu, ‘o folo ‘a kinautolu mo e me‘a kātoa ‘oku kau ki ai, ‘o nau ‘alu hifo mo‘ui ki lolofonua; pea te mou ‘ilo ai kuo fai pau‘u ‘e he kau tangata ni kia Sihova. 31Pea ‘i he ‘osi leva ‘ene ngaahi lea ko ia, ‘iloange na‘e mafahi ‘a e kelekele na‘a nau tu‘u ai; 32‘io, na‘e mafa‘a ‘e he fonua hono ngutu, ‘o ne folo fua kinautolu mo honau fale mo e kau tangata ‘a Kola, mo ‘enau nga‘oto‘ota kotoa. 33‘Io, ko kinautolu mo ia kotoa pē na‘e kau kiate kinautolu na‘a nau ‘alu hifo mo‘ui ki lolofonua, pea na‘e mapuni ‘a e fonua kiate kinautolu, pea nau mole mei he lotolotonga ‘o e fakataha. 34Pea ko e kau ‘Isileli kotoa na‘e takatakai kiate kinautolu na‘e hola ‘i he‘enau fekekee‘i, he‘enau pehē, Na‘a folo kinautolu foki ‘e he kelekele. 35Pea pā atu ha afi meia Sihova, ‘o keina ‘a e toko uangeau mā nima-ngofulu‘i tangata na‘e to‘o ‘inisēnisi."
Saame 106: 11,16-18
"11Pea na‘e lōfia ‘e he tahi honau kau fakamamahi:
Na‘e ‘ikai ha taha ‘e toe mei ai.
16Na‘a nau meheka foki kia Mōsese ‘i he ‘apitanga;Kia ‘Ēlone ko e tāpuhā ‘a Sihova.
17Toki mafa‘a ‘a e kelekele, ‘o folofua ‘a Tētani,
‘O mapuni ki he fakataha ‘a ‘Apilami.
18Pea na‘e tupu ha afi ‘i he fakataha na‘e kau:
Na‘e keina ‘e ha afi ‘a e kau pau‘u."
KO E ‘OFÁ, MO E TALANGOFUÁ KI HE ʻOTUÁ, TUʻUNGA ʻI HE NGĀUE LAHI ʻA E ʻOTUÁ NAʻA NE FAI MAʻA ʻISILELI. Naʻe toe fakamanatu ʻe Mosese ʻa e ngaahi lao, mo e ngaahi fakamaau, kuopau ke nau tokanga ki ai ke nau fai. Naʻa ne lave foki ki he ngaahi meʻa lalahi kuo fai ʻe he ʻOtuá ʻi honau lotolotongá, ʻo nau mamata ki ai, ʻo hangē ko hono fakahoko ʻa e ongo meʻa ko eni ʻe ua. Pea te ke ʻofa kia Sihova mo tauhi ʻene tuʻutuʻuní. Ko e ʻofá ʻe ngāue ia ʻi he talangofuá, pea talamai ʻe he ʻapositoló, “He ko ʻeni ia ʻa e ʻofa ki he ʻOtuá, ʻa ʻetau tauhi ki heʻene ngaahi tuʻutuʻuni (1 Sn 5:3). Naʻe ʻikai palomesi mai ʻa Sīsū Kalaisi, ko e talangofua kiate ia ʻe faingofua. Ko e ngāue malohi, mo e mapuleʻi kita ʻi heʻetau tauhi kiate iá ʻoku ʻikai ko ha palopalema, pe ko ha kavenga kia kinautolu ʻoku ʻofa kiate iá.
Naʻe toe lau ʻe Mosese ʻa e ngāue lahi mo kafakafa ʻa e ʻOtuá, naʻa ne fai ʻo sio ki ai honau matá. Pea ko e konga ko eni ʻo ʻene leá naʻe fakataumuʻa ki he kau ngāué. Ko e niʻihi ʻo kinautolu te nau manatuʻi honau fakahaofi kituʻa mei ʻIsipite, pea ko kinautolu ia ʻoku ne lea ki aí. ʻI heʻetau motuʻá ʻoku totonu ke tau manatuʻi mo tauhi ʻa e ngaahi fakamatala, ʻa e ngaahi fai meesi ʻa e ʻOtuá kia kitautolu ʻi he taimi ʻo ʻetau kei talavoú. Naʻaʻ nau sio foki ʻi he fai fakamaau fakaofo ʻa e ʻOtuá ʻi hono tautea mate ʻa e ngaahi fili ʻo ʻIsilelí. 1. Kia Felo mo e kau ʻIsipite naʻa nau fakapopulaʻi kinautolu. 2. Ko Tetani mo ʻApilami ʻi heʻena kaunoa. 3. Mo e ngaahi meʻa naʻa ne fai ʻi he toafa, ko honau kinisi kinautolu ne nau ʻauha ai. 4. Mo angatuʻu ʻa e haʻa Lupeni, ki he mafai ʻo Mosese pea ki he ʻOtuá. ʻOku tau maʻu kotoa ʻa e hisitolia ʻo e ngāue ʻa e ʻOtuá he ko e lēsoni ʻo e kuohilí ko e akonaki ʻo e lolotongá, pea manatuʻa ʻi he kahaʻú, ke fakamalohiʻi ʻaki ʻetau tui kia Sīsū Kalaisí.
No comments:
Post a Comment