Tu'apulelulu 12 Sanuali, 2017

NOM 32:10-15; 14:24,28-30; TEUT 1:26; 30:17,18; 2 KALO 7:20

Nomipa 32:10-15

"10Pea na‘e langa‘i ai ‘a e houhau ‘a Sihova ‘i he ‘aho ko ia, pea ne fuakava ‘o pehē, 11Ko au ē ha‘anau sio ki he fonua na‘a ku fuakava ai kia ‘Epalahame mo ‘Aisake mo Sēkope, ‘e he kau tangata na‘e ‘alu hake mei ‘Isipite, meiate ia ‘oku uofulu ta‘u ‘o fai hake, koe‘uhi ā ‘oku ‘ikai te nau molomolomuiva‘e kiate au: 12ngata pē ‘ia Kēlepi ko e foha ‘o Sīfune ko e ha‘a Kēnasi, mo Siosiua ko e foha ‘o Nuni; koe‘uhi na‘a na molomolomuiva‘e kinaua ‘i he ‘Eiki. 13Pea na‘e langa‘i ai ‘a e houhau ‘a Sihova ki ‘Isileli, ‘o ne tuku ke nau he holo ‘i he Toafa ‘o fāngofulu ta‘u, kae ‘oua ke ‘osi‘osingamālie ‘a e to‘utangata ko ia na‘e fai kovi ‘i he ‘ao ‘o e ‘Eiki. 14Pea ko eni kuo mou tupu hake kimoutolu ko e fetongi ‘o ho‘omou ngaahi tamai, ko e hako‘i angahala, ke toe fakalahi ‘a e kakaha ‘o e houhau ‘o Sihova ki ‘Isileli. 15He kapau te mou foki mei he muimui kiate ia, pea te ne toe tuku kinautolu ‘i he Toafa, pea te mou faka‘auha ‘a e fu‘u kakai ni."

Nomipa 14:24, 28-30

"24ka ko ‘eku tamaio‘eiki ko Kēlepi, ko e me‘a ‘i he kehe ‘a e laumālie na‘e ‘iate ia, mo ‘ene molomolomuiva‘e mai ‘iate au; ko ia te u fakahū ia ki he fonua na‘a ne ‘alu ki ai, pea ‘e tofi‘a ‘aki ‘e hono hako. 28Tala kiate kinautolu ko e folofola ē ‘a Sihova, Tangi ‘eku mo‘ui te u fai kiate kimoutolu ‘o hangē ko ho‘omou lea kuo tau mai ki hoku telinga! 29‘E tō homou ngaahi ‘anga‘anga ‘i he toafa ni; ‘io, ko kimoutolu na‘e lau, ‘a kimoutolu kotoa pē na‘e tohi, ‘o kamata meiate ia na‘e uofulu ta‘u ‘o fai hake, ‘a ia kuo mou lāunga kiate au; 30tangi ‘eku mo‘ui ha‘amou hū ki he fonua, ‘a ia na‘a ku hiki ai hoku nima ke tuku mo‘omou nofo‘anga; ko Kēlepi pē ko e foha ‘o Sīfune, mo Siosiua ko e foha ‘o Nuni."

Teutalonome 1:26

"26Ka na‘e ‘ikai te mou loto ke ‘alu hake, ka mou paetaku‘i ‘a e folofola tonu ‘a Sihova ko homou ‘Otua."

Teutalonome 30:17, 18

"17Ka ‘o kapau ‘e hanga kehe ho loto, ‘o ‘ikai te ke fakaongoongo, kae tohoaki koe, mo ke lotu ki ha ngaahi ‘otua kehe, mo tauhi ki ai; 18‘oku ou fakapapau kiate kimoutolu he ‘aho ni te mou mātu‘aki mole ai; ‘e ‘ikai fakalahi homou taimi ‘i he kelekele ‘oku mou a‘a ‘i Soatani, ke hū ki ai ‘o ma‘u."

2 Kalonikali 7:20

"20pea te u toki ta‘aki fu‘u kinautolu mei he kelekele kuo u foaki kiate kinautolu; pea ko e fale ni, ‘a ia kuo u tapui ki hoku hingoa, te u li‘aki mei hoku ‘ao, pea te u tuku ke fakatokotokanaki ‘aki mo luma‘i ‘e he ngaahi kakai kotoa."

Fai tōtōivi ke hū ki Hevani. Naʻe toe fakamanatu ʻe Mosese ki he haʻa Lupení mo e haʻa Katá ʻa e houhau ʻa Sihova naʻe tō ki ʻIsileli fakalukufua, ne makatuʻunga ʻi he taʻe tui mo e taʻe fie talangofua ki he ʻOtuá. Naʻe fai ʻe he kau asiasí, ʻo lotosiʻi ai ʻa e kakaí ʻo ʻikai te nau fie hū ki Kenani, pea tuku ai kinautolu ʻe he ʻOtuá, ke nau hē holo ʻi he toafá he taʻu ʻe 40, kae ʻoua kuo ʻosi kotoa ʻa e toʻutangata ko ia, mei he taʻu uofulu ʻo fai hake, tuʻunga ʻi he taʻe fie angimui ki he tuʻutuʻuni ʻa e ʻOtuá, naʻa Ne fakahā ʻo fekauʻaki mo e fonua ʻo e talaʻofá. Ko e fonua ʻoku mahutafea ʻi he huʻakau mo e honi, pea tuʻunga ʻi he taʻetui ko ia ʻa e kau asiasí, naʻe lotosiʻi ai ʻa e kakaí ʻo nau taʻe fie hū ki he fonuá, pea houhau ai ʻa e ʻOtuá ki ʻIsileli ʻo tuku ke nau ʻauha pē ʻi he toafá, ʻo ʻikai ke nau hū ki he fonuá, tukukehe pe ʻa Kelepi mo Siosiua tuʻunga ʻi heʻena molomolo muivaʻe ki he tuʻutuʻuni ʻa e ʻOtuá. Pea pehē ʻe Mosese kia kinautolu, “Pea kuo mou tupu hake kimoutolu ko e fetongi hoʻomou ngaahi tamaí, ko e hakoʻi tangata ke toe fakalahi ʻa e houhau ʻa e ʻOtuá ki ʻIsileli. He kapau te mou foki mei he muimui kia Sihová pea te ne toe tuku kimoutolu ʻi he toafa ni, pea te Ne fakaʻauha ʻa e fuʻu kakai ni.” ʻOku fakamanatu mai ʻe he Folofolá, ʻa e fakatuʻutamaki ʻo e meʻa ko e taʻetui, mo e taʻe fie muimui ki he ʻOtuá, mo talangofua kiate ia. Ko e tuʻunga eni ʻoku muimui ki he ʻEiki ʻoku talanoa ki ai ʻa e punaké, “Ka ʻalu atu hoku ʻEiki ki ha meʻa, hake ha moʻunga na pe hifo ha teleʻa, te te muimui ʻo ʻikai teu fehuʻia, Te ne taki tonu ki he monūʻia. Muimui! Te te muimui, Faingofua, faingataʻa, te te ʻahiʻahi. Hala tau he mate pe moʻui. Ka ʻi ai ʻa Sīsū, te te ʻalu ai” (Himi 508:6). Kuo pau ke tau talangofua ki he ʻOtuá he meʻa kotoa pe. Neongo heʻikai tuku ʻa e holi ʻa e kakanó mo māmani. Ka ke manatuʻi, ko e fili kitaua ke hoko ko e tangata mo e fefine lotu moʻoní. Fakaongo ke tonu ki he tataki ʻoku fai ʻe he Laumalie Maʻoniʻoní.